Makai hoih i cih pianpih maw sinna ~ Cin Khaw Mung

Makai hoih i cih pianpih maw sinna ~ Cin Khaw Mung

Thupatna :: Makai hoih i cih in “pianpih theihna-maw, sin-pilna?” Ahih keileh “sinna tungtawn pan a tua pilna leh pianpih theihna tawh makaih na,” koi hi zaw ding hiam? Mi khempeuh makai hi thei na pi’n a lawhcing leh lawhcinglo bek om hi. Tua ahih manin ih makaihna ah deih bangin lawhcing kisa lo, tangzai ih sak kei leh bang ki sam hi ding hiam cih ngaihsut huai mahmah hi.

Tua ahih leh makai hoih, a lawhcing i cih te kua te hi ding hiam?

Tua ahih manin makai lawhcing leh makaih zia tel a, makai hoih ih cih te a pianpih uh maw sinna tungtawn pan hi zaw maw cih gen ni.

Pianpih makaihna

Inn sung makaihna ah pianpih theihna ciang hi thei sam na pi’n, ahi zongin mipi makaih nang taktak ah bel pilna, sinna mah kitangsam hi. Sinna-pilna tawh ahi lo, Pianpih pilna ciang bek tawh mipi makai hihna ah ki muibun zo taktak lo hi.

Makaihzia tawh kisai ngaihsutna (theory) tampi om hi. Tua lak pan ‘Traits theory’ ngaihsutna ah “Mihing pen hihtheihna nam khat teitei (inherited) tawh piang hi” ci hi. Hih ngaihsutna pen Gordon Allport in 1950 kum khawng pan in hong ngaihsun khia in hong zang hi. A ngaihsutna ah makai ih cih pen pianpih hi cih ahihi. Hihtheihna khat teitei tawh mun khat beekah makai lawhcing hi ding hi cih ahihi. Tua khit ciangin, ‘Great Man theory’ ngaihsutna in “Makaite pen asuahtung a kipan makai a piang dingin telkhol (destined) hi” ci hi. Hih ngaihsutna pen Thomas Carlyle in 19th century khawng pan in hong minthang sak mahmah hi.

Tua ahih manin hih te gel ngaihsutna ih et ciangin, makaihna ih cih pen pilna leh sinna tung tawn pan hilo in, makai ding ahisa a, mihingte piang cih na ahihi. Ahi ding tawh kibang na pi’n hi khin khollo hi. Hih bang dan lungsim leh ngaihsutna a nei makai pawlkhatin pilna, theihna sangin Pasian ompihna leh Ama makaihna kitangsam zaw lel hi ci uhhi. Zomi sungah zong hih bang dan lungsim tawh nungta a makai a sem kitam lua ahih man in khantoh zah ding leh, muibut zah ding in ki lawhcing zolo hi zaw hi.

Sinna tungtawn pan makaihna

Tua ahih leh Makai hoih ih cih pen pianpih ahih leh sinna bang hang kisam nawn ding ahiam? Makaih theihna talent tawh a piang thei a om zongin, pattahna leh sinna tungtawn pan in makai hoih ong piang hi zaw hi. Makai hoih ih cih pen sinna tungtawn pan hi cih 1940 kum khawng pan in Kurt Lewin leh alawmte in ‘Behavioral theory’ cih Iowa University, Ohio State University leh Michigan University pan in telkatna (research) hong bawl khia uh hi. Tua amau ngaihsutna in “Mihingte pen hilhna, sinna, ngaihsutna leh muhkhiatna tungtawn pan in makai hi thei pan hi” cih ahihi. Tua ahih man in makai muanhuai leh belhtak peuhmah pen sinna tungtawn pan leh a phutkhak thulela tungtawn pan a khangkhia to te ahi uhhi.

Awka in a genna ah, “Makai hoih ih cih pen pianpih ahih leh mi khempeuh makai hi thei hi. Bang hang hiam cih leh mi khempeuh ki suak tek hi ci hi. Ahih hangin mi khempeuh makai dingin, kipattah lo in, hoihtak in sinna neilo hi” ci hi. Tua ahih man in makai hoih ih cih te pen sinna tungtawn pan ahihi. Ahih hangin pawl khat bel pianpih talent a nei bel om mah hi.

Arete in leitungah makaihzia aki kanna (survey) ah, 52.4% pen sinna tung tawn pan makai a sem te lawhcing bek uh hi ci hi. 19.1% pen pianpih theihna bek tawh makai a sem te hi a, tua bang mite pen a lunggulh zah un lawhcing kisa zolo uh hi ci hi. 28.5% pen pianpih theihna leh sinna pan ahihi ci hi. A hoih pen ah bel pianpih khuak ciim ngiatin, sinna leh pilna tawh thuah khawmin makai sem leng bel lawhcing penpen leh muibun zo penpen ding hi.

Thu khupna

Tua ahih manin, pianpih theihna-pilna tawh makai ki sem thei mah hi. Ahih hang muibun taktak leh makai hoih taktak a suakzo mi tawm mahmah hi. Bang hang hiam cih leh a muhna uh toi in, zai zolo deuh pah a, theihna leh a tel thu uh tawm zaw deuh pah ahih man in makai picing taktak suak zo lo uhhi. Sinna tung tawn pan a makai semte mah mazang zaw leh muibun zo zaw hamtang uhhi. Tua hi a, Pilna mah thupi ahih manin Zomiten pilna thupi ngaihsutin sin tangtang in, zong tangtang ni.

Zomite pen pilna sangin sumlepai akin masa zawte hi hang. Ih omomna ah sum nei peuh leng na khempeuh hi thei lel hi ci in om kha thei zel hi hang. Ahih hangin atawptawpna ah pilna nei te mah ih-eng kik zaw veve hi. Tua ahih manin sum thupi ih sak zah khat mahin, pilna thupi sak ni. Pilna lo tawh bang mah kikhuasuak zo kei, kilawhcing zo kei cih phawk den ni. Makai sepna ah zong pilna mah tawh kop leng tangzaizaw hi cih phawk kawm sa in nungta tek ni.

Pilna in makai lawhcing bek hong suaksak lo in, khansauna, hauhna leh pahtawina zong hong pia thuah lai hi (Paunak 3:16). Cin Khaw Mung (PhD cand.) Yemyung Graduate University, Seoul, South Korea (September 12, 2019)