Mi tampite ading a manpha khinkhian mikhat ~ Lian Tuang

Mi tampite ading a manpha khinkhian mikhat ~ Lian Tuang

2015 kum bul pawl a kipan ka pa pen cidam mahmah khat ahih hangin an a nek tui a dawn ciangin thalh thei zel hi. Hih pen thulam dang pi in ngaihsun loin ka om lel uh hi.

2015 kum bei kuan lam ciangin an valh ding nangawn hamsa pian ahih manin zoto ka kilah uh leh a tawl ah sa bawk pian khat om in a manlang theithei in Zangkong lam mah zuan dingin ong kisawl mawk hi.

Zangkong a private zatote ah hoih takin a vel dekdek khit ciangun ka pa ngawl a sabawk pen cancer kipan nuam hi a, mei tawh hang leng (Tharaphy) leng hoih kik lel ding hi cih din mun ahi hi.

Mei ah hanna ding (Tharaphy) mun pen mun thum bang om hi. 1) kumpi zatopi 2) Pinlong private zatopi 3) galkap zato ahi hi. Kumpi zato ah ka dawp uh ciangin a tawm pen kha khat ngak kul ding ci mawk hi. Natna nasia lua lo banah a mai ah a ngak a kigual mi na tam khin hi. Pinlong private zato ka dawp leuleu ciangin lem mahmah sam ahih hangin sum tam bei tuak lua mahmah ahih manin ka maingap het kei pah hi.

Galkap zato pen kilamen ngam hetlo kawmkawm mah in Col. Vungh Suan Thang ka hopih uh hi. Aman ka pa zato laite hoih tak ong vel sak in hoih takin ong hopih hiathiat hi. Lai khat ong at sak in hih tawh galkap zato lupna 500 ah na pai un ci in ong pia hi

A zingciangin tua lai mah masuan in ka pata un galkap zato ka pai pah uh hi. Nat le sat banah theih ngei loh mun ahih manin lungneu in mi khempeuh mit-hek ki en liplep uhi. Ka lai puak uh ka pia uhi. Counter pam ah ka ding lingleng uhi. Lai a muh ciangun galkap zato nasemte in ong en ngeingai uhi. Tutna ah a tu dingin a sawl henhan uhi. Admition piakna counter ah ong pai sak loin ka tutna mun ah amau ong pai in zato lai teng ong et sak in admission zong ka tutna munah ong bawl sak zaw uhi.

A den ciang galkap santhum khat in special khan ah ong paipih in thawlpi ong khai hi. Thawlpi khai sungin Colonel khat le Captain nih ong pai in, ka pa kiangah Col Vungh Suan Thang pen ka it mahmah ka zahtak mahmah uh ka siapa uh ahi hi. Amah pen mi dik mahmah mi kiniamkhiat mahmah, biakna a hat mahmah khat ahi hi. Na lung nuam sak in. Natna mei han ding ( Tharaphy ) pen zingciang kipan thei pah ding hi. Mei han sungteng zato ah na om nop leh zong a lem thei pen dingin ong vaihawm sak ding ung ci in maingap le itbawl takin hopih hi.

Lungdam cih ding sangin lamdang ka sazaw mai uh hi. Ka mang hiam ka tak hiam ka ci liang uhi. Thanemna lungneuna tampi tawh ka om lai takun lamet hetlohna mun panin itna lainatna thupi takin ka ngah zenzen uh lamdang sa in a kamka mai ka hi uhi.

Special khan sung ahih hangin ko pata nangawn hoih tak kiho kha loin galkap siavuan siamah a neu a lian ong paipai in no Colonel VSThang mel theihte maw ci in ong hopih tangtang uhi. Tha ong pia ngeingai in kisapna om bangbang ong gen ziauziau un, ko tungah Cololnel pa in thupha tampi ong bawl hi. Amah pen ka it mahmah ka zahtak mahmah uhi ci phapha in Colonel pa tunga a lungdamna a itna thute ko pata tungah ong gengen mai uhi.

Zatui bei ciangin ka pa in “ciluang na lah hi sam lo I hih teh ciah lel ni, zin pan in ni sim mah in zato zuan kik zaw ni” ci in a ngaihsutna ong gen hi.

Tua ni a kipan kha nih sung vilvel nisim in galkap zato ah maingal tak le inntek takin ka pai uh a, tua khit ciangin cidam in Inn ( Tedim ) ka ciah kik thei uhi.

Hih thu I gen kik ciangin Col Vungh Suan Thang tungah genzawh loh lungdam leh a diak in ama nuntakna pha tawh u le nau minam buk bek hi loin biakna nangawn a twisang mahmah Lt.Col. Vungh Suan Thang bang mi manpha mahmah I neih lam a gen nuam I hi hi.

Amah bangin ama nasepna mun ah minam dang biakna dangte nangawn in it in ong zahtak sak ding mi manpha tampi I neih beh nading I thungetna hi sak ciat ni. Lian Tuang