A Siangtho biakpiakna ~ Dr. Mangsan

A Siangtho biakpiakna ~ Dr. Mangsan

Pasian’ la sakna tawh kisai in kei experience tawmkhat gen nuam ing. Ka pianthak khit kum nih khawng ciang in Pasian aa ding bek aa nuntaknopna lungsim bekbek in ong zo aa leitung nasep thupi leh nasep hoih cihte nusia ding in Topan hong samkhia hi.

Tua hun aa kipan in Topa in bang ding aa ong deih hiding hiam ci in ka ngaihsut ciang kei uukna leh (ka siamloh hang)ka septheih pen ahi lasak na lamtawh hi kha ding hi ci in ngaihsun ka hihman in leitungla peuhmah sa nawnlo in Pasianphatna labek sa ta ning ci in ka khensat aa tua aa kipan Pasian’la solo album 2 bang bawl ngei ing.

Mihing ngaihsutna pan hoih mahmah hi “kei utna teng khempeuh leitung aa ding zangnawnlo aa Pasian aa ding bek zangta ing ei”ci in angtang mahmah in miten zong thupi ong sa mawhlo hi.

Ahi zong ka tel tohtoh thukhat in, la kasak ciang ” Topa’n minthanna ngahta hen” ka cih pong hang ka lungsim tawngtaktak ah amin thang nuamtaktak pen KEI MAH ka hi lel hi. Pasian phat kacih hang kei leh kei akiphat nuam leh lasak khitciang miten” siamtakcei, thangahtak ing ei” ong cih ding alam en den ka hi lel hi.

Tua pen” Pasian Pahtawina”cih min kapuak sak hang ka lungsim tawng taktak ah kei leh kei akipahtawi nuamlua hizaw ing aa tuapen WORSHIP GOD hilo in WORSHIP MYSELF ongsuak ta hi.

Satan in tuading a deihden hi a Eden huansung pek lai in a ngimna pi in “Note Pasian nabang ding uh hi” cih ahihi. Pasian biakpiakna pianawnlo in ei leh ei kipia ding cih ong hitakpi ta hi.

Alamal te athu te maan in hoihmahmah napi ka lungsimtawng taktak pen Pasian mai ah siangtho hetlo, hoih hetlo hi. Topa in i septe sang i lungsimtawng ong en zaw den hi.

Sepna athupi hilo in ThuManNa athupi hi bek hi. La sa ding salo ding cih hilo aa Pasian hongsawl pen i sep masak photphot ding ahihi. Asiangtho Biakpiakna tawh Pasian alungkimsak taktak masa pen Abraham hi.

(Tua ciangin Abraham in a nasemte kiangah, “Hih lai-ah la tawh na om un. Kei le tangvalpa hua lamah pai-in Pasian ka va bia ding uh a, note kiangah ka hong paikik ding uh hi,” a ci hi.PIANCILNA 22:5 TDB)

A it luat atapa neihsun Pasian kiang ah Biakpiakna aa pia ngam ahihman in Pasian lungsim tawng sukha lian hi.

Abraham in Pasian tung ah a it angaih penpen leh ama nuntakna buppi nangawn piakhia hi.

Tu in eiten tuazahpi in i sum ngamkei zong i lasak nopluatna , i thugennop luatna cihte ciang sum ngam photphot samlo ding maw?

I supngam taktak khitciang i lungsim Pasian aa ding bek in siangtho taktak pan ding aa tua hun ciang i lasakna leh i thugenna te in ASIANGTHO BIAKPIAKNA taktak ong suak pan ding hi.

Pasian bek pahtawinopna’ lungsim siangtho takpi tawh biakpiakna pia in, i deih i ut khempeuh nusia in Topa’ singlamteh lampi ah vazui ni.

Bible Verse : Tua ciangin Jesuh in a nungzuite kiangah, “Mi khatpeuh ka nungzui a suahnop leh, ama deihna bangin gamta nawn loin, a singlamteh kisuanin hong zui ding hi. MATTHAI 16:24 TDB

(Hih anuai aa zong 2017 lai aa ka aat Article hi hong post kik vet ning) “NUAM IN LUNGDAM IN NA DIANG UN” Luke 6:22-23

Biakpiak kikhopna tetawh kisai in alawp ziahziah leh alam adiang ziahziah nam ki om aa , alang khat ah khutlapna Amen piakna khutbetna nangawn a deihlo zawzen ki om ta leuleu hi.

Amasa penpen in tua bang pawlpi lungsim leh mihingte’ phuahtawm thukhun leh ngeina te pan i suahtaak masak photphot ding kisam hi.

[‘Hih mite in a kampi bek uh tawh kei hong zahtak bawl uh a, ahi zongin a lungsim taktak uh kei tawh kigamla hi. Mihingte’ phuahtawm thukhamte, Pasian’ thukham zahin mite tungah hilh uh ahih manin kei hong biak hangun a kimanna om lo hi,’…. Matthew15:8‭-‬9 ]

I lungsim takpi tawh suakta tak in Pasian phat ziahziah ni ci in amasa in gen nuam hang.

Lawpna tawh ki sai in ah: I pianthak ciang Pasian tung ah i lungdam i lungkim luamahmah ahih man in ki phatphat nuam ki lawp, ki lam ki diang nuam hi. Tua pen ahi ding mah ahihi. I lungdam theih kei aa leh pen Lungdamna ding THU neinai lo hi lel ding hi hang.

Ahi zong alangkhat ah : A lawp khempeuh, alaam adiangkhempeuh apiangthak hi zenzen lo hi. Thu umlo mite zong pawi khatpeuh ah lawp,laam,diang,kap lua lel hi. Tua ahihman in apiangthak te lawp mah aa , ahi zong alawpnak leh apiangthak cihbang hi lo hi.

Tuhun ciang in akoi koi ah lawptak aa lasak ziahziahna pen khanlawhna နိုးထမှု aa ki ngaihsun hi. Ahih na ciang om kha thei mah hi. A နိုးထ te lawp mah hi.Ahih hang alawp khempeuh a နိုးထ hi lo hi.

Tu hun a alawp ziahziah leh lasak khawng anop ziahziahna pawlpi te i et ciang “NUNGAK MELHOIH NONO ATAMNA LEH KHANGNO MUSIC SIAM ATAMNA PAWLPI TENG HI DEUH HI”

Tuapen abangdan himawk aitam !!?

(1)Khasiangtho in nungak hoih omkei leh nasem thei lo maw? (2)Khasiangtho in la leh music ging kei leh nasem thei lo maw? Zum huai lua mahmah hi hang i ngaihsut zia pawlkhat te pen. Tu hun aa atam zaw i lawpna te pen a la tawh kisai semawk lailai hi.

Tua la khat pen kisa leh kapziah ziah. Aih keh diang ziahziah. Pasian’ nasepzia tawh kisai lo zaw in a la tawh kisai keeimawk hi. Ala TIMING zekaai te ciang kapding ,a timing manlang te ciang diang ziahziah ding!

Formula hi mai! Khasiangtho zia hilo in la timing zia tawh akap adiang peuh kihi mawk hi. Tua la te aki phuahma Khasiangtho in nasemtheilo aa omcip maw leh! Khasiangtho in mihing khat i laphuah peuh a အားကိုးkeei ding samawk hi hang.

A la a thupi maw PasianKhasiangtho’ nasepna athupi? TopaZeisu ong gupkhiatna singlamteh tung ah lasakna cih bang om dihdih lo hi. Lasak man aa miten Nuntakna angah ding hi dihzen lo hi.

Nuntakna apia thei pen la cihbang hilo aa Khasiangtho bek ahihi.[Nuntakna a piathei pen Pasian’ Kha hi a, mihingte’ hihtheih bangmah om lo hi.JOHAN 6:63a]

Tua i kahna te pen Khasiangtho zong hikha thei mah ding aa ahih hang atam zaw pen Emotion leh ” The Power of Music ” hi lel sawnsawn hi.

Pasian’la hita kei leh leitung la te zong aki kap ziah ziah mah hi lel hi. Micheal Jackson te lasak khawng mitampi kapziah ziah in puk ziahziah uh hi.

MichealJackson atheilo piteek khat bang in muleh “Khasiangtho in nasem tak ei”peuh ci kha mai lai thei ding hi.

Eisak pen Pasian la hi aa amasak pen leitungla dawila, ei zong kap, amau zong kap…i kahna ahang taktak pen aki bang pian hi lel hi.

Music leh a la in i lungsim ong zogawp hi lel hi.Khasiangtho in ong lawng hilo in la(music) in onglawng cihding hi.

Crusades leh Conference khawng aa akap ziahziah te anuntakna uh va en taktak leng atamzaw pen Khalam ah ong picing hanhan tuan lo uh hi.

Pasian in alawngtakpi hi leh kilamdan na om limlim mahding hi ven.Tun ki lamdang peuhmah lo kumsim aa va kapzel vadiangzel hi mai !

Avek aa aci hi peuhmah khang aih hang atam zaw tua ci mawk hi.A ngei mah bangbang lel, ci leh sa buai aa buai buai veve. Lamna dianna tawh kisai in zong LasiangthoThak sung ah aom mah hiam ci in i et ciang om mah hi.

Pasian tung ah lungdamna takpi tawh lamna dianna pen ahoih mahmah khat hi. “NUAM IN LUNGDAM IN NA DIANG UN” Luke 6:22-23 ci ahih man in dian ziahziah ding mah hi pah hi. Suakta tak inTopa tung ah lungdamko in lam in diang ziahziah ni. BANG HUN CIANG?..

[“Mihing Tapa’ hangin mite in hong mudahin hong tuamkoih a, hong simmawhin migiloin hong seh ciangin thupha ngah na hi uh hi. Vantungah na thaman ding uh lian mahmah ahih manin tua bang na tuah uh ciangin nuamin lungdamin na diang un….. LUKA 6:22‭-‬23 TDB]

Ei hauhnop minthannop vangliatnop man aa dian ding hi nawnlo aa Topa tawh gentheih hamsatna thuakkhawm kha i hihman in kipak leh angtang tak in lam in diang khawm ziahziah ni.

More: Covid hunsung kikep danding pawlkhat ~ Dr. Mangsan

[Ka itte aw, note’ upna hong kize-etna-in gimna haksate na thuak manun a thu lamdangpi-in ngaihsun kei unla, na lungkham ngaihsut kei un. Tua bangin Chrish tawh thuakkhawm le-uhcin ama minthanna hong kilat ciangin note lungdam mahmah ding na hih manun, tua banga na thuakna uhah na lungdamzaw un……Christian hihna hangin gimna na thuak uhleh kuamah in maizum ngaihsut kei unla, Chrish min hangin na thuak manun Pasian tungah na lungdam un. 1 PETER MASA 4:12‭-‬13‭, ‬16] Dr. Mangsan