Lengtong Pauno thugenna tungtawn in thalakna

Lengtong Pauno thugenna tungtawn in thalakna

Lengtong Pauno in Pi Niang Don tutpih nizan in a thugente ka ngaihngaih ciangin micim ahih loh lam ka tel a, miciim ahihlam zong ka tel hi.

Lungsim a om khempeuh thusuak hi ciin a gen khia pah zuahzuah mi ahih lohlam ka telna pen ama kammal mah ngai lehang kitel hi. Amah in hici’n ci hi. “Kei pen a ciakciak thei pawl ka hi a, bang gen ding cih sangin bang gen lo ding cih pen kei ngaihsut hizaw hi” ci hi. Hipanin kampau kidawm mahmah cih kitel hi.

A nungta lai mihingte in lametna ih neih ding ong hanthawn hi. Ama genna ah, “US ka tun nop manin ka kisihbawl kei ding hi. Hing lehang a kitung ding hizaw hi. Gui-awk sawm keng!” ci hi. US taanzung ah nihvei pai a, ahihangin lawhsam hi. Lungkia tuan lo, gui-awk sawm het lo ahihlam gen hi. Tungtuang vai a gen bang pen zaaknop khia lua mahmah hi.

Himah hi, natna tuamtuam in eite hong bawm a, nisimin mi bangzah kipua khia hiam cih pen a kithei zo ding hinawn lo hi. Nidangin Kalaymyo ah nikhat in mi 5 a sih leh lamdang kisa hi. Tun ahileh ka gaal zakna ah nikhat mi 40 val a kipuak khiat hun om ta hi. Van innpi zuan a hong ciahsante in a na thuak nawn lo ding uh a, dahna lungkhamna leh tulai thupiang hanga hagawina cihte nei nawn lo ding uh hi. Amau a hampha hi cih ding hi.

(Kawlpi cilo a Kalaymyo ka cih tangtang zawkna pen Pu Kam Lam Khup in “Kalaymyo pen Kawlpi cici lehang Kawlte a piapia suak hi hang” ci ngei hi. Ken tua thu pom lua ingh!)

Natna tam kawmkal ah ei a nungta lai tengin lametna ih khah suah loh ding thupi hi. “Lametna a nei nawn lo mihingte pen a nuntak lai uh hangin a hawmpi hi ta uh a, gamsa bangin nungta ta uh hi” ciin mipilte in gen ngei uh hi.

Meei hong kaai in, van hong ging a, guah hong zu in keek hong kia a, khua hong phia ziahziah hi. Ahihangin tua teng a ven khit cianga nisuak pen etlawm in nuntak gimnam mahmah hi. Tua nisuak melhoih pen ih lungsim mitkha tawh mitsuan gige in ih lametna bei sak kei ni. Ih sih lezong a hampha, ih nuntak lezong a hampha, Pasian in hong sap hun ding kithei lo ahihmanin kigingkholsa in om den ni.

Hih hunsia sungah Zomite ong huh ong van, neihsa a piakhiate leh hun leh thatang a piakhia Zomi khangno uham volunteer teng zahtaakna kong pia hi. Na kipiakkhiatna uh mawk suak het o taw ei! Zomi Quavadis