A sia sungpan i ngah hamphatna ~ Sia Do Khup
“……Topa na Pasian un samsiatna pen note a dingin thupha-in hong heisakzaw hi.” Thuhilhkikna 23:5 Pasian nasem bekbek luang 70 val leh i it i ngaihte’ luang tampi tawh man kipia ahih mah bangin siatna, dahna, kahna sung panin a kip ding hamphatna tampi zong i ngah hi.
KI-IT, KIVEINA HONG KHANGSAK HI.
Hih Covid pulpi tuah hun laitakin bangmah sem lo a om ding pen mawhna bangin kingaihsun ngiat ahih manin khangno tampitak leh maikai tampi kipumpiak ngiat uh a, a nat lawh zong omin a sih lawh nangawn om hihang.
Hih pulpi hun sungin bangmah pia lo a om ding pen mawhna bangin kingaihsun ahih manin nek tangtang mah kipiakhia ciat ahih manin i mipihte tampitak nuntakna kihonkhia zo hi.
Thatang kipiakhiate nek ding zat ding sum leh pai a piakhia om kei mawk leh lockdown cih khawng kibawl zolo ding hi. Zatui tawh kidelh kawikawi cih bang kisem zolo ding hi. A piakhia, a kuankhia, a kipumpiak om lo himawk leh bang zah i si zen tam maw? ngaihsut ngam huai lo hi.
Hih pulpi sungah thungen lo a om ding pen mawhna bangin kingaihsun ahih manin i gambup thungetna tawh kidim hi. Topa lamah i kihei kik thei hi. Pasian nasemte manphatna kitel semsem hi.
PAU LEH HAM KIDEIDANNA PAWLPI KIDENNA BEI HI.
I gamah pulnatna hong tun ciangin oxygen tawh kisai a sem masa lam i hi kha hi. A Nu a Pate adingin khitui tawh oxygen ngen a hong paite kiangah “Nang kua pawlpi, bang pau zang, kua minam?” cihte kidot om nawn lo hi. USA a om Manglek in a khua Tuitum adingin a lei oxygen bung 20 nangawn a Kawl a Zo cih deisan om tuan loin ki-hawm beisak kha zawzen hi. I loh kik ciangin a man khang ahih manin amah sum a, i mipihte a meet suak hi.
More: Itna Banzal ~ Sia Do Khup
KITOT KISEL NOPNA LUNGSIM KAWI TENG BEISAK HI.
Thu khat peuh a kipost ciangin a kisai tawh kisailo tawh ciak ngeingai a, kizahpih kikosiatnate hong bei a, “Hong it ing, hong dahpih ing, cihte a kipan a sem a piakhiate tungah “Thupi si ee, lungdam huai si ee” i ci thei ta hi. I hazatna lungsim hoih lo teng Covid in gai khin ahih manin i met lawh mahmah hi. Mai lamah minam thupi minam gina i suah lawh ding ka lamen mahmah hi. “……Topa na Pasian un samsiatna pen note a dingin thupha-in hong heisakzaw hi.” Amen. Sau lua zel kha leh tu a zah sut phot ni maw. Evan. Langh Do Khup (Khuata mipa)
Comment piaknop aomleh...