A Lian A Kang Tokhom Thukhenna ~ Rev. Zam Khat Kham

A Lian A Kang Tokhom Thukhenna (The Great White Throne Judgment) ~ Rev. Zam Khat Kham

A. Thukhenna Nunungpen: A Lian A Kang Tokhom – Kum tul maanna a bei ciangin mihingte’ tangthu ah a tawpnapen dingin a lian a kang tokhom thukhenna thu Laisiangtho sungah kigen hi (Kilaakna 20:11-15). A beisa huna midikte thu a kikhennate, leitunga nungtalai Israel mite leh Gentile-te thu a kikhenna tuamtuamte tawh kibang lo-in, hih thukhenna pen a tawpna thukhenna ahi hi; a kigenna i et ciangin mi gilote bek thu a kikhenna ahihna kimu thei hi.

B. Vantung leh Leitung A Kisuksiatna

A lian a kang tokhom thukhenna a kipat ma-in, Kilaakna 20:11 ah, “leitung leh vantung taikeekmang hi; amaute’ om nading mun kimu lo hi” ci-in kigen hi. Leitung tangthu a kikhin ding hi ta a, Kilaakna 21:1 sungah, “leitung masa beimang hi; tuipi om nawn lo hi” a cih mahbangin piansakna masa kisusia hi. II Peter 3:10-12 in “Vantungte aw ngaihpi tawh beimang dinga, a sunga nate mei tuisuaksak dinga, leitung leh a sunga na khempeuh kangtum ding hi” ci-a a genna pen ahi hi. Tang 11 ah, “hih nate khempeuh tuimang ding hi” ci lai-a tang 12 ah, “vantungte mei-in kangtum dinga, a sunga om nate sa lua mahmah-in a tuimang ding hi” ci-in na gen hi. Tu laitaka vantung leh leitungte a kisusia khin ahih manin awngthawlpi sunga ah a lian a kang tokhom thukhenna om ding hi.

C. A Sisa Mi Gilote’ Thawhkikna

Kilaakna 20:12 ah, John in, “a sisate, a neu a lian-in Pasian’ mai-a ding mu hi.” Kilaakna 20:13 ah, “Tuipi in ama’ sunga om misite hong puak hi; sihna leh hell in zong amau’ sunga om misite hong puak uh hi” ci-in gen beh lai hi. A sisa migilote kithokiksaka thukhenna thuak dingin Pasian’ mai ah kidingsak hi. Thukhennpa pen Topa Zeisu ahihna John 5:27 ah “Pa in thukhen naidng thuneihna zong pia hi, bang hang hang hiam cih leh amah mihing’ Tapa ahi hi” a cihna ah kilang hi.

D. Mihingte’ Nasepna Laibute Kilem

Kilaakna 20:12 in, “Laibute kilem hi: nuntakna laibu ahi laibu dang khat zong kilem hi: laibute sunga kigelh bangin misite amau’ gamtatna bangin thu kikhen hi” ci-in hong gen hi. “Mi khempeuh amau’ gamtatna bangin thu kikhen hi” ci lai hi (v. 13). Hehpihna a thusim lote thu a kikhenna ngaat mahmah hi. Khazih lo-in mawhna maisakna om lo-a (Sawltak. 4:12), ama’ hehpihna a nial mite thu a kikhen loh phamawh hi.

A gamtatnate uh a ki-etkik bek hi lo-in, Nuntakna Laibu sungah a minte uh ki-en hi. Mi pawlkhatte’ upna bangin Nuntakna Laibu pen nuntak tawntungna a ngah mite’ min kiciaptehna ahi a mi nungta khempeuhte’ min lak panin hotkhiatna ngah lo mite’ min a kiphiatkhiatna ahi zongin thukhenna bel a kibang hi lel hi. A min uh a kimuh kei leh, nuntak tawntungna a ngah lo uh hi pah hi. a thuak dinguh kitangko a, Kilaakna 20:14-15 ah, “Tua ciangin sihna leh hell meiliipi sungah kikhiasuk hi. Hih pen nihna sihna ahi hi. nuntakna laibu sunga a min kigelh lo khempeuh meiliipi sungah kikhia hi” ci-in kiciamteh hi.

Hih lai-a thu kikhen mite pawlkhat a dangte sangin a hoihzawk hangin, nuntak tawntungna a neih lohna un amaute thukhen ta hi. Nuntak tawntungna a nei lo mi khempeuh amau’ nasepna leh Khazih a nialna uh tungah thu kikhena meiliipi sungah kikhia hi. A dahhuai thu taktak bel, amaute’ ading leh hotkhiatna a ngah mite’ adingin Khazih a sih veve na thu ahi hi.

II Corinthians 5:19 ah, “Pasian in Khazih sungah leitung amah tawh kilemsaka, amaute’ mawhna bangin a mawhpaih kei hi” ci-in kigelh hi. I John 2:2 ah Khazih pen “eite’ mawhna kithoihdamna hi: eite’ ading bek hi lo-in leitung buppi mawhna ading ahi hi” ci-in kigelh lai hi. Meiliipi sunga kikhia hih mite Khazih’ lamah kiheii uh hi leh hotkhiatna a ngah thei lua mahmah dinguh ahi hi. Amaute Pasian in a it loh man leh Pasian’ hehpihna in a hot zawh loh mana tua mun a tunguh hi lo uh a, a up loh man uh ahi hi.

Lungdamna thu a za kha lo mite in leitung nate tungtawna Pasian’ teci pannna a nialna uh hangin thukhenna thuak uh hi (Rom. 1:18-20). Amau zong a neih uh khuavak nial uh ahih manin thutang takin thu kikhen hi. A lian a kang tokhom thukhenna pen Khazih a Honpa uh leh a Topa ua a sang nuam lo mite’ thu a khenna hi a, khasiathuai mahmah hi.

Dotna

• 1. A lian a kang thokhom thukhenna leh tua ma-a thukhennate a kilamdanna bang ahi hiam?
• 2. A lian a kang thokhom thukhenna koi-a om ding hi a, tua ma-a thukhennate tawh bangci bangin kilamdang ahi hiam?
• 3. Tu laitaka leitung a kisauksiat nading thu gen in.
• 4. A sisa migilote a thawhkik nading thu Laisiangtho in bangci gen ahi hiam?
• 5. A sisa migilote bang thu bulphuh-in thu kikhen ding ahi hiam?
• 6. Bang hangin a sisa migilote thu a kikhenna khasiathuai deuh ahi hiam?
• 7. A mangthang mite in a tawpna ah bang tuak dinguh cih thu i theihna in bangci bangin Khazih ading kha mangthang mat nopna lungsim hong neisak ahi hiam? Rev. Zam Khat Kham