Pasian in deihna khat hong nei gige

Pasian in deihna khat hong nei gige

Jonah in Pasian’ sawlna mang loin a lehtai ciangin ngapi gil sung tunga ngapi gil sungah sun thum leh zan thum sung om hi. A taktak in ci le’ng, mihing khat tuipi sunga om ngapi gil sungah sun thum leh zan thum om cih pen si leh kilawm mahmah ta(sih hun mahmah ta) ahi hi. Ahi zongin Pasian in Jonah kisikkik in ama kiangah kiheikik ding leh Neniveh khua-ah thugen dingin deih lai ahih manin a nuntakna laksak lo hi.

Pasian in ama deihna a taangtun’sakna nungah Jonah in Pasian’ sawlna bangin Neniveh khuapi-ah lungdamna thu hong taangko a, Kumpipa a kipan gam mi khempeuh in mawhna kisikkik in Topa’ lamah hong kiheikik uh hi. “Pasian in amau hihnate mu a, a khialhna uh panin a kihei uh a muh ciangin kisik a, amau tungah hih dingin a cihsa siatna a tungsak nawn kei hi.” Jonah 3:10

Eite’ nuntakna zong tua bang mah ahi hi. Pasian’ thu-um(Christian) khat hinapi-in Topa’ deihna bangin nungta kalsuan loin ama deih lohna lamlamah i lehtai thei zel hi. Tua bang himah ta le’ng, Pasian in tuni ciang dong hong nungtasak in, nuntakna hu hong kawm’ lai ahih manin, deihna khat hong nei gige ahih lamtak i phawk gige ding kisam hi. I lampialna(i lehtaina) panin kisikkikna tawh ama kiang zuan a, i hih theihna bangbang tawh ama minthan’ gamzai nading leh midangte’ phattuam nadingin ma i pan’ ding pen Topa’ deihna ahi hi. Tua bang hi peuh leh eite’ hangin mi tampitak in Topa’ hoihna hong mu dinga, mi tampitak Topa’ kiangah hong ciahkik in, Leitungbup dongah khanlawhna lianpi hong piang ding hi.

Mi tampitakte’n sihna hanmual lam zuan mah ta leh, tuni ciang dong na nuntak theih laina a hang pen, “Pasian in deihna khat hong nei gige,” ahih hang ahi hi. Atelsiam dingin Topa’n thupha hong pia ta hen. Amen!

Khazih sungah,
David Tuang