A 68 veina Zomi Nam Ni Malaysia ah nopcitak kibawl

A 68 veina Zomi Nam Ni Malaysia ah nopcitak kibawl

A 68 veina Zomi nam ni leitung muntuamtuam ah akibawl mahbang in Malaysia om Zomi te in zong 20 February 2016 ni in Kualalumpur Khuapi Chinwoo tualpi ah zing nai 11 am -4:00pm dong nop citak in kibawl thei hi.

Zomi nam ni thukong hon na ZSM pan Sya Kam Lian Mung hong nei in Zomi bup hibang in mapang khawm a Zomi nam ni ibawl khop thukituahna thupi ziate leh kiitna te athupi zia hong gen khia hi.

Zinmangpi…. Dr Hau Za Cin hong kihel thei a, Zomi ading in pilna thupi pen ahih na leh minam lian akhangto minam kip isuah theih na ding in Ngeina leh Lai thupi tak in puah in zun ding hanthohn nei hi. Zomite khan khiat na tibet Kawlgam tunna Khampat khuapi pan Zogam ten totona leh Zogam pan leitung muntuamtuam ah ahoihna te mun athei asin ding in Pasian in Zomi hong lapsang na thupi tak in hong gen mipi tha kingah mahmah hi.

Zongeina la leh lam tawh Laipian, ZCCM, ZEC Cheras pan nop citak la hong sa in hong lam uh a mipi in khutbetna tha kipia ziahziah hi.

Music hongtum sak Zomi tumging siam te leh Deihpi Falcon te in asiamna uh sitlo tum in mal ziahziah uh a mipi te in et ciim thei mahmah lo uhhi.

Zominam ni ah Latawh mipi tha hong pia Lengtong Pauno, Zomi vocal band, Mun Khai, Sawbua Mung , Hua Huai, JK Mang, KiKim, LG Thangboi, CingCing, , TZ Khaipi,Stephen Muang , Daniel Thangpu, Summuan, Huaipi, Sian Cin te in a awsiamna te uh sitlo in thupitak leh zaknop tak in Zomi namni apai mipi te lasakna tawh tha pia ziahziah uh hi.

TanghCiing Puanpi Athumveina ZAM, leh ZOCUS te in Dr Cin Sian Pau pahtawina in pia uh hi. Dr Pau pen Zomite ading in Ngeina leh Lai tawh kipawl in puah in zun ngeina vante kepcing bek hilo azat nuam ding in puah siam ahih na tawh kipawl in Tangh Ciing Puanpi ZOCUS silh sak uh a, Lukhu pen Dr Hau Za Cin in khusak in pahtawina lai pi pen ZOCUS President Zomi nam pi te mai ah thupi tak in pahtawina pia uh hi.

Tanghciing Puanpi amasa pen GZA te Dr Pau Khan En, Dr Chin Do Kham , Dr Gin Khan Khual FGA biak innpi sung Zomi buppi mai ah kipia ngeikhin a, Anih veina pen Malaysia mah pan in Pu Chin Sian Thang Pahtawina in pia uh hi.

Zomi cup Champion Anlangh khua te in ngah uh a, tutung Zomi namni mipi mai ah Sya Khoi Tuang leh Dr Cin Sian Pau te in pahtawina Champion Haipi piakna nei uh hi.

Malaysia ah Zomi Nam ni ading in sumtang zanih tawh pawlpi sawm leh li in mapang uh hi. . Khaua kipawlna tawh mapang zanih apia sawm leh giat pha in zakhat mapang khua sawm guk pha hi. Atuam vilvel sawm nga tawh mapang khuakhat,, leh Za leh sawmnga Mapang Khuakhat , leh Zali tawh mapang Khua khat, kihel kim tek uh hi.

A 68 veina Zomi nam ni ading in Banner Design Peter Mungpi (Paukxii) in hongbawl sak in Video Camera Zomi Daily leh Photographer Khampu te hanciam tak in ciamtehna bawl sak hi. Hau Thang