A citak siksekpa thungetna ~ Tg. Samuel Nas

A citak siksekpa thungetna ~ Tg. Samuel Nas

Khatvei lai in siksek in nek a zong mipa khat om hi. Amah pen mi citak hi a, kul leh kisam om bangbang pen thalawp takin a sem den mi hi. Himahleh a nasepna ah a hahkat zahin metna ngah khollo a, kamsiatna tuamtuam in bawm thuahthuah zel lai hi.

Nikhat pen a sai ah a lawmte khat hong hawh hi. A lawm in, “ Lawm aw, lamdang ka sak gige thu khat om hi. Nang pen Pasian thu um leh midik mahmah khat na hi hi. Hi pen kei bek hilo in mite in zong hong theih dan leh hong gen dan zong hi. Ka theihsiam hetloh pen bel hi zaha hoih hi napi cin bang hangin hizah takin haksatna thuak na hiam cih thu hi… “ ci-in a dong hi.

Siksekpa in dam takin a dawnna ah, “Siktum hoih pipi temtawng hoih mahmah a sekkhiat dingin ka sai ah tam veipi hong kipuak hi. Tua sikte pen ken ka la a, amasa penin mei-am sa mahmah sungah ka khul hi. Sik pen vaam hoihin a sat mahmah tan ka ngak a, tua khit ciangin lakhia in ka sekpi neih hoihpen tawh zah hetlo in khet cihtakin ka khenkik leuleu hi.

‘Deih bang pian ta ei’ ka cih tak ciangin hun sakin tua sik pen tui vawt sungah ka pap suk leuleu hi. Vawt leh sa kikheng vatvat ahih manin sik pen zong ging sausau bek a, ka room sung pen meikhu tawh kizel khin zel hi. Hi bangin sik pen tem hoih mahmah ka suahsak matan tam veipi ka lumlet kikkik hi. A tamzaw pen khatvei bawl bek tawh hoih pah ngeilo uh ahihman zong hi.”

Siksekpa zong tomvei sung hong khawl dide phot a, tua leh damin a thugen hong zomkik hi… “Sik tampi tak pen, hi bangin ka bawl tak ciangin thuakzolo in a kitan pahpah pawl om hi. Tuate pen a zattaak tem hoih suah thei nawnlo ding cih thei ka hih manin ka kongkhak kianga ninbawm sungah ka khiaziau lel zel hi.

Tua hi in, kei zong e, ka nuntakna ah khatveivei Pasian in haksatna meikuang sungah hong khul hun om zelin thei ing. Sekpi tawh hong khet hun zong om ka sa a, ka sat mahmah laitak tui vawt sungah hong pap suk vat hun zong om in ka thei hi. Haksa bel sa veve ing. Ka thuaknate genzawh hi kei. Himahleh Pasian kiangah thu ka ngen zel a, “Topa aw, ka tunga piang bangbang pen nang deihna bang hi ta hen. Na deih bang lian lim(shape) ka suah matan pen hong seksek lai inla, hong koih mawk kei in. Nong seknate a theisiam ding leh a thuakzo ngiat dingin zong ka sungah tha hong guan in. ‘Zattaak loh’ ci-a innkiu khat ah hong kikoih mawk ding pen ut deklo hing…’ ka ci thei zel hi” a ci hi.

Hih siksekpa cihtakna in eite zong a citak ngiat dingin mimal kim tha hong pia ciat ta hen.

Topa aw, taak lua ka hih leh hong su nem in. Nem lua ka hih leh zong hong hal taak in. Nang a hing Topa. Nang deihna bang hi ta hen, nang deih bangbang. Amen! @Tg. Samuel Nas