Pentecost Ni leh Pawlpi Piankhiatna ~ Lang Khan Khai

Pentecost Ni leh Pawlpi Piankhiatna ~ Lang Khan Khai

1. Zeisuh Thawkik Zawh Ni 50 Ni (Pentecost Ni) Thupiang: Christian pawlpi pian ni pen Pentecost ni hi ciin Lai Siangtho siamte in gen hi.  Sawltakte Lai Siangtho, alian 2na sung ah, “Pentecost ni hong tun ciangin Zeisuh a um mi khempeuh mun khat ah kikhawm uhi.  ….. leii tawh akibang meikuang bangin amaute lak ah hong kithehhang a, tuate in mi khempeuh sukha kim hi.

Amaute khempeuh Kha Siangtho tawh kidim uh a, tua Kha in minam dangte pau tawh amaute apau theisak hi.  Tua laitakin pawisiim dingin gam tuamtuam panin ahong pai Jewmi biakna ahahkat mi tampi takte Jerusalem khua sung ah a om uhi.  …… Amaute in hih thugen mite pen Galilee mi vive hilo ahi hiam?  Tua hinapiin banghangin amaute thugen pen eima pau ciat tawh za ihi hiam?”, ciin kikum ngeingai uh a, Jew gam 12 leh Rome gam 1 pan ahi uhi.

Pawlkhatte in mawhsak uh a, Peter in, “Note upmawh bangin zukham ankham kihilo hi.  Zingsang lam hi a, zukham hun zong hilo hi,” ciin athuteng agenkhit ciangin, “Topa tung ah huhna angen khempeuh in hotkhiatna ngah ding uhi ciin Lai Siangtho sung ah kigelh hi. Tu laitak a na muh na zak uh nate pen kote tung ah ahong piak tua Kha Siangtho ahi hi,” ciin teltakin agen ciangin mipi lungsim nakpi takin sukha a, Peter leh Sawltak dangte kiang ah,” Sanggamte aw, bangci gamtat ding ka hi uh hiam,” ciin adong uhi.

Peter in,” Na mawhna uh kisik unla, Zeisuh min tawh tui kiphum ciat in.  Tua hileh, Kha Siangtho na ngah ding uhi.  Pasian kamciam pen note, na suanlehkhakte, gamlapi a om mikhempeuh in Topa sap mi khempeuh aa dingin abawl ahi hi,” ciin adawng hi.

Mi tampi in ama thugen umin tui kiphum uh a, tua niin mihing tulthum bang kibehlap hi,” cih kimu hi. Topa tung ah, ” Topa aw, Kei hong hon in”, aci mi khempeuhte Topa in honkhia a, gupna ngahin anuntakna kikhel, ahoihlam ah kilamdang a, nidang nuntakna tawh kibang nawnloin athak, ahoih, agina lam ah kiheisak hi.  Zomite in Dawithoih lai nangawnin Pasian umte ihi a, Pasian hoih lua ahih manin biak kullo hi ciin ngaihsunin Dawite kiang ah adeih ngahna dingin ngen a, ahuncin Khuado Pawi ni ciangin Dawi kici peuhmah inn, huang leh khuasung panin tei leh nam tawiin singlehsuang satin kihawlkhia hi.  Zomite in asiam thupisakin Pheisam nekik, Gulpi ne kik lo ciin asiam ding teeltawm uhi.

Tun zong, isiam ding ahoihpen Ahing Pasian teel leng,  miginalo pen akicite nangawn khelin migina, mihoih atangsak nuam den Pasian anei ihi hi.  Tua ahih manin atunga Lai Siangtho ah imuh mah bangin ipau leh igamtatte nangawn, midangte in azak ciangin amau pau bangmahin Pasian in na zasak ding a, thugen lasak siam keng cih paulap neiloin amah muang ngam peuh leng, ikampau igamtat zia dingdan nangawn hong hilh nuam den Pasian anei  ihi hi.  Hong ne kiklo, hong nusia ngeilo, isiatna ding ageel ngeilo Ahing Pasian belh taak mahmah hi.

Sanggam aw, tuniin,”Topa Zeisuh pen ka Honpa leh kak Gumpa-in ka sang hi. Ka nuntakna ahoihin hong khel in,” icih hunhunin I Pasian nuamin lungdam a, isap hunhunin hong dawng hi.  Tuniin Siate mai ah ki-ap ding lemlo kha thei ding hi.  Nangmah khukdin-in ki-ap inla, “Topa, Nang kong zuan hi.  Hong sang in.  Ka hibangin hong zuan ing. Hong sangin,” ciin Topa tung ah kiko in. Tua bangin na ki-ap leh tuni a kipanin nang pen nang nuntak sung leh na innkuanpihte aa dingin thupha na hitakpi ding hi.

2. Pawlpi (Church) leh Christian (Khazih Nungzuite) Min Pianna:

Pentecostt ni-in pawlpi piang a, min kivawh nailoin anung ciangin Paul hun ah Antiok khua thu-um mite “Christian – Khazih nungzuite” ci-in min kilo a, tua hun a kipanin Christian hong piang hi. Pentecost niin Pawlpi piang hi ci-in igentheihna pen tua niin pawlpi mi tulthum kibehlap hi cih imu hi.  Zeisuh nungzuite khit ciangin pawlpi mi alut masapente hiding uhi.

Ahi zongin Church – pawlpi icih pen Zeisuh tung a kilam pawlpi hi a, leimite pawlpi min phuah tawmtawmte hilo hi.  Zeisuh tung a kilamlo pawlpite tawh vangam tunglo ding a, pawlpi min tawh vangam kitung loin Zeisuh umte bek vangam tung ding hi.  Mihing phuahtawm pawlpite pen Zeisuh thu tangkona ah ngeina leh ukna deihna leh sepzia akituakteng omkhawm hizaw hi.

Pawlpi min in vangam hong tun ding hilo a, hih pawlpi min tawh Pasian leh Zeisuh min koici bangin thangsak thei ding ka hiam ci-in nasepna mun ahi hi.  Pawpi tawh Pasian nasepna atangzai theihna ding leh Topa Zeisuh thu agen ding atamzaw hanciam ding hi a, ei pawlpimi deih manin pawlpi dangte gensiat leh langpan ding hilo hi.  Adiakin misi tungtang thugenna ah ama pawlpi bek athupisak leh amaan hi aci Pastor leh upa makai om thei hi.  Ei pawlpi bek dik hi, maan hi icih leh misi ciangin ei pawlpi bek sigal hong pai ding hi.  Nopna dahna ah pawlpi tuamtuam ihih manin Zeisuh thu mah limgenin, Christian nuntakna ah ahaksa anuamte hawmsawnin pawlpi doctrine, sandan leh ngeina peuh gen kei thei leng, hoih mahmah ding hi.

3. Pentecost Kha Siangtho Sung ah Vangliatna Om Hi:

Topa Zeisuh nungzuite in Pentecost ni Kha Siangtho angah ciangin hangsan takin thu gen ngam pah uh a, agen ding thute zong, Kha Siangtho in hilh ahih manin amah um mite tung a Pasian piak Kha Siangtho in atuam mite tung ah na lamdang piang hi cih kimu hi.  Amasapenin ikampau nangawn, mite zaktheih kammal hong suaksak hi.  Akisap leh cina damsak theihna vangliatna, akisap hunin Kha Siangtho pilsaktawmna, ahunzui a Pasian minthanna dingin lamdang nate kimukhia hi.

Pentecost ni kampau pen amau pianken pau hitaleh, midangte in azak ciangin amau pau tawh kamkhum za cihna ahih manin theihlo pau sangin itheihpau tawh Pasian nasepna tangzaizaw hi cih kithei a, theihloh pau pen angahpen leh Pasian kikal kihona leh thungetna ah alo theilo akisam khat ahi hi cih zong, kilang hi.

Kamtuam pau azanglote sangin azangte tung ah Pasian vangliatna tampi kimuzaw hi cih mikim theih thu ahi hi. Banghangin Pastor leh Pawlpi makai minthang pipite kiang ah thungensakin kipailo a, pil isakloh leh gina isaklohte kiang peuh ah paiin thungensakte cina damin, lungkham mite lungnopna angahna zong, Kha Siangtho vangliatna hang bekmah ahi hi.

Tua ahih manin Pentecost Kha Siangtho vangliatna in tuniin na nuntakna hong lawngin kilamdanna khat teitei, Topa in hong piangsak henla, Pasian gam leh minmal nuntakna ah nidang sangin ahoihzaw Topa in thupha hong pia ta hen. Lang Khan Khai, Zomi Khristian Aw