ZYA pan Zomi Community Development Center khat neihding lunggulh pulaakna

ZYA Myanmar Head Quarter pan Zomi Community Development Center khat neihding lunggulh pulaakna

Leitungbup a om Zomi tengin kipawlkhawm in Kawlgam, Kalaymyo ah Zomi Community Development Center khat neihding lunggulh mahmahna tungtawn in Leitungbup a om Zomi te tungah athu ala ZYA mintawh tangkona kong nei masa uh hi. Zomi te mintawh vaithupi khat peuhpeuh ihawm ciangin midangte leitang leh munlehmual kikawm den a, lemthei mahmah lo ahih manin bangbang hitaleh ZYA mintawh Kalaymyo huamsungah leitang eka 10 leikhiat zawhna ding geelna nei hihang. Ngaihsutna ah leitungbup gam 30 val aom Zomite kipawlkhawm in mapang peuhleng piangzo mahmah dingin lamen hi hang.

Kawlgam sum in tein 3000 mandingin kigeel a, block 3000 in kikhending hi. Block( Kuat) khat tein 1 in kigelkhia a, mi 3000 kipawlkhawm thei leng alem mahmahding hipah hi.

Tutung pen tutangkona hiphot a, asawtlo in Zomi innkuan kipawlna , Biakna kipawlna , pawlpi tuamtuam, innkuan leh mimal panin Zomi Community Development Center adingin mapanna neihkhop dingin huhngetna kinei ding cih hi. Mailam ah Zomi khangsawnte adingin igam leh igou hoih penpen khat hiding ahih manin mapangkhawm in isepkhop ding ilunggulh mahmah hi. Hih ading ZYA makai ten piakhiatna kipan pah ziahziah a, tein 150 val kingahta hi.

Hihpen avaihawm ZYA ahihhangin Zomibup neihsa ding ahih manin akuamapeuh in innteek panciat in ma ipanding akihanthawn nuam phapha hi.

Hih Zomi Community Development Center phualpi sungah kimawlna tuamtuam leh khantohna tuamtuam te suakta takin isep theihna ding lunggulhna hi cih zong pulaak beh nuam hang.

Rev. Pau Khan Khai (ZYA International Consultant) in “Israel gam in thupha a ngahna ding un Israel minam khempeuh in –Pay-Every–Penny-Save-Israel( Pepsi )acih bangin eizong Zomi Khangsawnte thupha dingin Zomi Community Development Center ineihzawhding thupi hi” ci-in thapiakna hong neihbeh hi. Kam Suan Mung (President, ZYA Head Quarter, Kalaymyo) November 27, 2019