Zo Ngeina Church leh Community ah banghang in ki zangtheilo

Zo Ngeina Church leh Community ah banghang in ki zangtheilo

Gamthumna I tunteh, midangte tawh I kithuahteh, na I sepkhopteh Jesu in savun umlui sungah lenggah zuuthak kithun theilo, savun umthak sungah lenggah zuului kithun theilo acih bangin I ki khelding, I ki puahding, I nusiatding tampi om a, Zo ngeina zanghni, Zo ngeina tawh ki makaih ni ki cici theikhinlo ahih manin tawm ahang, I ki telsak nuam hi. Bang hang hiam cih leh hih thute I tel kei leh khangnote leh khanghamte kikal ah ki theih khialhna, ki sankhialhna tampi piangtheiding a, na lianpi ki semkhawm theilo ding hi cih a beisa Zomi Innkuan sung leh Pawlpi sung, ka ki helkhakna panin ka phawk a, ngeina vai ah khat le khat ki telkhialhna apian loh na dingin ahang tawm I gennuam hi. Hici bang I genteh Zo ngeina thupilo, nusia ni aci I hi kei hi.

I gentehna in I omna gam Kumpi tungah Church or Community register I bawlciangin amau, I ki makaih dingzia, I kalsuandingzia eg: President, Secretary, Treasurer, EC te sepding leh mawhpuakna a gelhkhit ban uah Meeting I kimakaih dan ding, I ki telziading, mipite mee(vote) I khiat dan ding, sum tawh kisai I kepdan ding, I ciapteh danding leh I report danding nangawn kimtak in na neikhin uha, tuate zuimah nung, ci-a, a form tungah thukim a suaikaihna(signatures) I neihkhitteh register hong piapan uh hi. Eima deih bang or Zo ngeina banga ki pawlna ki makaih ding I ut leh limtak gelhsitse a, kumpite tung mah ah I puak masak kulding hi. Amau kumpi thukhun tawh kituak asak uh leh hong sangin register hong piading uha, kituak asak kei uh leh hong sanglo ding uh hi.

Australia Perth a Siyin Baptist te’n amau deih dan thukhun limtak bawl uham kumpi tungah puak in kumpi te’n sang uh hi. Australia aom Zomi te sungah mau bawltawm kumpi thukimpih amau bek hiding in ka lam en hi. Register I ngahkhitteh thukhun omsa bang bek in na ki semthei a, a tamzaw thukimna hi ci-in ut bangbanga na ki semkhin theilo ki kalsuan khin theilo hi. A tamzaw thukimna ci-in kumpi thukhun tawh ki tuaklo in, mi dangte siatna dingin nasem khaleng, a semte leh a thukimteng, ut in utta keileng thukhenna I tuah loh phamawh theiding hong hizel hi. Tua ahih manin ki pawlna khat peuhpeuh ah I ki helteh makai I septeh bang thupi pen hiam cih leh tua ki pawlnate in bang thukhun nei a, bangciang semthei, bang dan a ki makaihding cih leh tua thukhun zatding kumpite thukimna ommah hiam, cih I telmasak ding thupi pente lak ah khat hiding in ka ngaihsun hi. Kumpite thukimna oam leh amau seal or theihpihna tuang pah hi. Tua khitteh I zuihngap leh ki helding, na sepkhop pat ding ahi hi.

US, UK, AU citizenship khat in Kawlgam ki telna ah mee(vote) a khiat theih loh mah bangin Kawlgam mi hih na neikhat in zong gamdang a omna ah gam mi hihna a neih kei leh mee(vote) khia theilo hi. Tua mah bangin US,UK, NORWAY, MYANMAR etc, aom khat in AUSTRALIA gam thukhun zangh theilo in AUSTRALIA aom te’n zong US,UK, NORWAY, MYANMAR etc, gamte thukhun bawl ahoih mahmah phial zongin va zattheih hilo hi. A thupi ah bang hiam cih leh eima omna gam Churches leh Community te thukhun leh ki vaipuakzia I telding, I zuihding a thupi masa pen ahi hi. Tuaci bang tellopi a, Zo ngeina ah tua dan hi, Zo ngeina zanghni ci-a, ei mimal hoihsak bek tawh I kalsuan khak, I kipawl khak, na I sepkhop khak leh ki sikna, hehna, ki telkhialhna, ki khenna, Zum ki tutna in ut in utta keileng hong nungzuih pelmawh kha ding hi.

Zo ngeina ah zong Pawlpi sung leh ki pawlna ah ki hici makaihding cih thukhun omlo in khua khat le khua khat beh khat le beh khat nangawn I zuu hawm, I sahawm zia aki banglo pawlkhat om hi.

Gentehna in:

1. Mo I piteh khua pawlkhat ah mo te’n sa hong gawh uha tuateng kine in sahawm dingteng kipua hi. Tua sapuak, sahawmzia zong ki banglolai hi. Khua pawlkhat leuleu ah a mopi lam te’n sagawh in ann vaksak kul hi. A dang khat leuleu ah Zo ngeina ah mothu asun uhteh a thusun a kisan theihteh I zuu dawnta ni ci-in a zuu tawi uh dawn uha, aki santheih kei uh leh innteklam te’n dawnlo uh hi. Tu hunteh zuu hawm cih zong a zanghlo om in, a zangh te’n zong thusunna ki sanma in a dawnkhin zong, omta leuleu hi. Tua leh Zo ngeina koi hizaw dinga, hih dik pen hi ci-a midangte koi pen hilhzaw mawkding I hi hiam cih khangthakta ding hong phawksak hi.

2. Zo ngeina ah si I delhteh a misite inn ah ki tunga a lemkei leh zong mi site tawh a kinai pente inn ah kitung hi. Si galna kipia a I ciahdingteh sum I neihkei leh I meltheih, I tanauta ki leitawi hi. Si delh ci-in I utna khat peuh ah tung, misite sihgalna peuh lamsapding a ngen cih bang om ngeilo hi. Tuhunteh mi pawlkhat leuleu si delh ci-in misite kiang lah tunglo misite ki naipih pente kiang lah tunglo in a ciahdingteh misite kiangah a lamsapding sihgalnate a ngen peuh omthei hi. Koi pen Zo ngeina hizaw ding hiam cih khangthaktading hong phawksak hi.

3. Nopna dahna ah thusa I septeh, zuu tawite leh sumlutte limtak ki ciamteh in zatna leh a lutkhempeuh inntekte tungah limtak kigen a, inntekte thukimna omlo pi-in ki zangh, kihawm cih bang khanglui Zo ngeina ah omlo hi. Tu hunteh mi pawlkhat leuleu in inntekte dongselo in a kisapsapna ah zangh mengmeng in zatna zong limtak hilhlo, ciamteh kullo hi, aci pawlkhat om leuleu hi. Koi pen khangthakte kiangah Zo ngeina hi ci-in I hilhzaw diam?

Pawlpi dangte tawh I kipawldingciang leh na I sepkhopding ciangin zong khat le khat kikal ah zuiding, sepkhopding ciangtan na omleuleu a, ei hoihsak, eideih danin na khempeuh hitheilo hi.

Gamthumna I tunkhitteh I paunak ah “sing om lohna ah gua kizangh” acih bangin ut in utta keileng, a midang omtuanlo ahih manin makai I seploh a phamawhna Pawlpi leh ki pawlna mun omthei ding hi. Tuaci bang munte ah buaina tamkhollo dinga, a semtheiding omta leh a qualify hetlo pawlkhat makai a ut manun khangthak te’ khembawl in Zo ngeina paulap in Zo ngeina theilo uh a hihteh I Zongeina ah tua bang omkei veh aw, Zo ngeina zanghni aci Church leh Community ki makaihnate ah I omkhak leh kitel khialhna omthei ding cih aki phawksak nuam hi hang.

I deihna bulpi ah Zo ngeina ciang bek tawh lungkimlo in I omna gamte thukhun leh ki vaipuakzia I telding, a hoihte I zuihding leh Zo ngeina hoihte a kizat theihna mun leh hun aom leh zong I zatding, I zuihding ki deihsak hang. Khaibawi