ZTK-2 Taangkona No. 7

ZTK-2 Taangkona No. 7

No.7. Zogam (Chin State) leh gamgi kizawng Regional, Divisionte leh Statete ii gamgii suangciante, Belpawlkhawm Kawlgam (Union of Burma) ong pian nading aa kaPu kaPa te un, thukimna suaikaih kum, 1947 laitak aa bang aa phuhkik ding lunggulhna ka pulak uhhi.

Zomi ulehnau,
Hih No.7 na pen Tedim CMBC Biakinnpi aa April 26, 2015 nitak taangko lai in kihel khalohi.
Tuma hunkhat lai in, Kawlgam suahtak laakma kum 10 lai 1938 kum aa Zogam leh Kawlzang gamgii suangciante pona mun kangah bangbang kong khahkhia ngei hi. Tuadung zui hileh Kalaymyo leh Tedim gam gamgii Singunau kiim khawng aa pai ding ahihi. Kawlgam tawh Belpawl khawm gam phutding i thukim lai aa zang leh kham gamgi zong hipahhi.

Tu’n ahihleh, Tulsuk lui kiang, zangtak zong ahinailo zang ding kipat phet ah “Kalaymyo pan kong muak uhhi” cih mitmuh gige ahihi.

Hih gamgii leitang vai pen, Zomite’n i phawkkhaakloh hang Kawlgam suakta tak in ki ukna ong kol henla, Statete ii thuneihna ong omleh leitang khutpi cia khat thuneihna ong lian mahmah dinghi.

Tu tadih in bel a gualheu zozo, Kawlmi atamzaw pan na peuh in deih ciacia eu, sut, la thei hiphot aa, minam tawm mualtung mite’n etbek simloh icih nading omlohi. Aphal, ahai hituanlo hihang.

Hibang lunggulhna i pulaak hangzong ong kipia pahding cih lamet omlo mahhi. haivai phial a sa pawl khat zong om hihang. Ahihhang kapu kapate ii gam hiciang hi cih mangngilhlo, atheilo hilo ihihlam i lahkhiatna ahihi.

“Hihte’n a gam alei uh phawkvilvel, ciamteh vilvel ve uh ee, khiim tawh, zuau tawh, vau tawh akingah tuanding dan hikei” ong kicih beekding, naupang gualheu bang aa adeihdeih na vuah gamgii ong phuh uhhang mihai hilo ahihman un tawmbek kisuang tuamding, hunkhatteh leitung ong kiheihei leh khahsuah veve ding cih atheihkholh nading uh deihna bulpi hiphothi. Akihennep kholh nading uh lunggulhna ahihi.

Leitung ong ki heihei leh hun khatciang hih i lunggulhna lahkhiatna te in man ong nei dinghi.

Gtn. in tutak Bunglung (Yarzakyo) khua gei ah dam(tuibem) lianpi khat kilam hi. Mual leh mual kikal ahihman in Zogam sung aa kilam ahihi. Hih tuibem pan aa tui tawh Kalay-Kabaw zangkuam teng ah lo kikho ding aa tui pan meitha kila dinghi. Zogam pan aa phul, Zogam sung aa kilam ahihi. A kizat theih nakleh haza peuhmah khang. Zatluat dinghi.

Gam khangto khin, ki ukna a kol na gamte ah gam khat, kumpi khat khutnuai ahih uhhang, state khat leh khat sum kila, tax kidong tanghtangh hi aa, ei kiang ah zong tuahun ong tung loding kici theilo hi. Tuahun ciang i tui zuak ding, i meitha zuak ding, i gam puahna aa nei ding hipahhi.

Hibangte pen pawlkhat in kumpi langpanna, lehdona sakhial kha uh aa, hilohi. Akilawmlo huaihamna, gualheuna, ki deihgawhna, ki hazatna, ki simmawhna, ki nuainetna, ki thupi simlohna tehangin i gam ah kilemna tuni dong a om zolo ahihi.

Belpawl gam (Union of Myanmar) i lamsawm taktak aa, lungmuanna, daihna, kilemna gam i sawm taktak leh minam khat leh khat, minamte neihsa gam, leitang, ngeina, kampau, biakna cihte kizahtaksak, kithupi simsak, kitheihsiam loh in gam khangto kisuak ngeilo dinghi.

Ipu ipa te hunlai pek in leitangin thunei aa huang, logam gii khin bek zong na zeksak mahmah uhhi. “I luang in sawngthei hi” naci uhhi.

Tu’n zong gamgi omsa, suangcian omsa mawk khinkhin kei un, na luang na ban un sawng kha ding hi cih deihsakna tawh a gen i hihi. Akta duh gawl kilawh khup thei hi.

Tua mah bangin, tanglai aa i khua i tui ciat ii khuaveng tetawh i gamgii tezong hoihtak in kepcing ciat ding kong hanthawn nuamhi.

Hunkhat lai aa gamgii suangciante po na munteng mah khat vei hihlai attachment ah kong khahkik dinghi. A kem nuam khatpeuh i om khaak leh cihna ahihi.

Lungdam,

Hang Khan Lian
Block 646#13-115
Jalan Tenaga
Singapore 410646