Zosuan (Zomi suan) ihcih ciangin ~ J. Thang Lian Pau

Zosuan (Zomi suan) ihcih ciangin ~ J. Thang Lian Pau

1. Kei muhna pan Zosuan sungah tangthu sulkan siam (historian) minthang khat ahi, B. Lalthangliana, M.A. ahi hi. A mah in Zosuan teng group (or) nam 12 pha sak hi. Tuate in Asho, Chho, Halam, Hmar, Lai, Mizo, Mara, Miu-Khumi, Ralte, Zomi, Thadou-Kuki leh amang khinte. Ahi zongin Southern Chin hills- sung a om Ke Le Awm in Zosuan teng pen Asho, Kcho, Khumi, Lai, Naga leh Zo ci-in lom(nam) guk suah leuleu hi. (By- J. Thang Lian Pau)

2. Kei muhna tawh behlap to ta leng: Asho, Chho (or Kcho), Miu-Khumi (or Khumi) mite Kawlzang (Kalay valley ) simlam (Southern) Chin State – Mindat Tsp., Kanpelet Tsp., Paletwa Tsp. sung leh Chittagong Hills Tract-ah tengte ahi uh hi. Lai & Mara-te Chin State – Matupi Tsp. leh Mizoram – Mara District sungah teng uh hi. Mizo & Ralte (or Galte) Mizoram lai zang tengah teng uh hi. Hmarte Lamka District simlam leh Mizoram mallam ah teng uh hi. Halam-te Tripura sungah teng uh hi. Zomi & Thadou-Kukite pen Mizoram malsak, Manipur, Tedim gam leh Kalay-Kabaw valley ah teng uh hi. A mangkhinte Meitei leh Naga lakah teng uh hi. (J. Thang Lian Pau)

3. B. Lalthangliana’ khen dan bel tam lua ka sa a, Halamte Thadou-Kuki sungah guan ding ahi hi. Ralte i cihte pen tulai tak a dinmun uh zui-in a hihna (Indentity) uh pen Mizo sungah hiam,Zomi sungah hiam guan ding ahi hi. Mara pen Lai (or) Pawi sungah guan ding ahi hi. Thadou-Kukite leuleu pen Zomi sungah guan ding hi. Tua banah Hmar zong Mizo hiam Lai hiam ah guan ding hi. Tua danin Asho, Chho, Khumi, Mizo, Lai, Zomi ci-in lom (nam) guk hong pha hi.

4. Pu Kee Le Awm in Zosuan sungah Naga te na hel a, ahi zongin ken hel huai kasa nawn kei hi. Tua hi leh Kee Le Awm khen dan pan Zosuan pen Asho, Kcho, Khumi, Lai leh Zo ci-in nam nga kisuah thei hi. Aman Zosuan sungah B. Lalthangliana’ khen danin Hmar, Mizo, Ralte, Zomi leh Thadou-Kuki guang hi. Ahi zongin Zomi leh Mizo bel kampau ‘G group’ leh ‘R group’ a kicih zel bangin lom khat suah theih/ gawm theih ka sa kei hi. Zomite ‘R’ aw neilo nam tuam vilvle i hih manin. i pau tawh haksatna om hi. Tua hi a, Zosuan teng a tawm thei penpen a ka khenna pan Asho, Chho, Khumi, Mizo, Lai leh Zomi ci-in lom (nam)guk ka suah hi.

5. Kei muhna khat leuleu ah Zomi sungah phung 14 om hi. Tuate pen Dim, Galte, Gangte, Khuano, Ngawn, Paite, Saizang, Sihzang, Simte, Teizang, Thadou, Vaiphei, Vangteh, Zou. ahi hi. A hi zongin tulaitak dinmun tawh en leng Galte (or) Ralte pen hel dingin buai huai (nawngkai) pian ta hi. Ngawn pen Zomi sungah a hel kitam het loin, a hih hangin amau pen Zomi taktak hi uh a, Falam Tsp. sungah a om man un akituam koih kha mawkmawk hi ding hi hang. Vaiphei leh Sihzang pen Suantak suan tuak ahih man un lom (nam) khat ahi hi. Tua mah bangin Vangteh leh Paite zong mi nam (Lom) kibang ahi uh hi. Tua banah Mizo sunga nampi Sailo-te pen Lushai (Mizo) phung, (lom) hi lo a, Zomi sul sung pan asuak mah ahi uh hi. i lai hi. (By- J. Thang Lian Pau)

6. A tawpna-ah Zosuan sung pan Lai, Mizo leh Zomite akinai penpen te i hi hi. A dangte bel ttawm khat tuam pian veve uh sa ing. Zomi sunga phung 14-te pen i vekin Songthu tate (or) suan vive i hi a, Ciimnuai pan suak vive leh Ciimnuai pan khuasat khia vive i hi hi. I khanggui kan tek leng Songthu-ah kimat kim hi. (By- J. Thang Lian Pau)

Note: Zosuan (Zomi Suan) i cih ciangin Zomi sungah Unau a kici teng hipah hi hang. Tuun sung khat piang Cimnuai tate i kici thei hi. Minam khat i cih ciangin ngeina (Traditional Culture) kibang, gamtat kibang teng kici thei pen hi. I omna tenna hong kibat nawn loh ciangin Sim le mal ah kithehthang hang a, Unau nam khat hihna a kibuai hi lel tak hi.

A taktak in Zo bekin Zomi sungah Phung/nam khat min bek ahi hi. Tua hi a Zomi (Zo Peoples)/ Zomi gam/ Zomi Lai/ Zomi pau/ Zomi Ngeina/ Zomi nam puan/ Zomi beh le phung cih bangin kici thei bek ding ahi hi. Tua mah bangin Zosuan ci in a tom in i lawh ziauziau hangin, Zomi Suan ci leng dik (Man) pen kha ding hi. J. Thang Lian Pau