Malaysia gamsung ah July 26 ni ciangciang Operasi pan akiman mi 5065 phakhinta

Malaysia gamsung ah July 26 ni ciangciang Operasi pan akiman mi 5065 phakhinta

Malaysia gambup muntuamtuam ah E-card akici Enforcement Card bawltheihhun abeizawh, July 01 ni akipan Immigration Department te’n Operasi (Operation) bawlkawikawi uhhi. Zanni Wednesday July 26 ni ciangciang gamdangmi akiman pen mi 5065 bang phakhinta cih theSun pan kiza hi.

Malaysia Immigration ulianpenpa ahi Immigration director-general Datuk Seri Mustafar Ali in agenkhiatna ah “Ops Mega” ci’n gambup ah Operasi abawlsung un gamdangmi thusit athuak bekbek pen mi 18,000 bang pha cihi.

Tuabang in mi tampi thu asitna lakah Malaysia gamsung ah omtheih nading, naseptheih nadingin Work Permit kician atawilo mi 5065 akimankhia ahihi. Tuabek thamlo, nasep aguan Employer (Boss) zong akiman mi 108 tak phatota hi.

Hih phalna kician aneilo gamdangmi “illegal foreign workers” tepen Malaysia gamsung ah Immigration thukhun atuamtuam palsat uh ahih manin akiman hi a, gam tampipan kihel uh cihi.

Immigration Department panin Statement akhah khiatna ah illegal immigrants lakpan in akiman atampenpen ahihleh Bangladesh gammi hi a, akigawm in mi 1520 pha uh cihi.

Tuazom ah atampenpen ahihleh Indonesia gammi hi a, akigawm in mi 1476 pha uhhi. Myanmar gammi akiman pen 429, Vietnam gammi akiman 285, Thailand gammi akiman 206, Philippines gammi akiman 261 cihbang in gamkhat bekbek pan tampipi kimankhia hi. Tualo gamtuamtuam paninzong akiman tampi mah omveve hi.

Hih akiman gamdangmi nasem te vaipen hih Malaysia gamsung aom amau gam ii Embassy tetawhzong kikup khopna kinei cihi. Adiakdiak in Bangladesh, India, Indonesia, Nepal cihte ii Embassy tetawh Malaysia Immigration Department te kikupkhopna kinei cihi. (Myanmar bel kihello zel hi)

Hih E-card akici Enforcement Card pen Malaysia kumpi in February 15 ni in hong patkhiat uh ahihi. Malaysia gamsung ah Work Permit kician neilo in gamdangmi nasem tamlua ahih manin, tuateng tawmveisung “temporary” naseptheih nadingin avaihawmsak ahihi.

E-card bawltheih hunpen tukum February 15 akipan June 30 niciangbek hi a, E-card aki zattheih hunsung pen 15 February 2018 ciang ahihi.

Operasi thuthang ihgelh ciangin ih mipih te lauthawnggawp uhhen, pataugawp uhhen cih ngimna hoihlo “ill-intentioned” kihello, kineilo hi. Koimun koiveng ah Operasi lut ahih manin, tuazah kiman, eizong kidop huai cih theihsaknopna ahihi. Thupiangsa bek kigelhzaw in, apiang nailopipi, upmawhthu tawh koimun koiveng ah Operasi lutding ci’n mipite lauthawnggawp nading thukicianlo kigelhlo hi.

More: LOGOS leh RHEMA kibang maw? ~ Lian Muan Kim

Prophet kihilo a, koimun ah banghun in Operasi lutding cih 100% akician in kitheilo ahih manin, aki gelhngamlo ahihi. Ki mawhsaknopna tawh Comment ginalo honggelhgelh tezong ami kithei veve a, alungsim puakzia uhzong alaigelh tungtawn in kitheipah, kitelpahlel ahih manin lungdamhang. Zomi Daily panin ka thuthang gelhgelh tungtawn un lauthawngna anei khatpeuh aomkhak zenzenleh Sorry mahmah, lungkham sinkham nading Operasi thuthang sangin ciamnuih leh lungnop nuihzakna thuthang lamsang hahbawlzaw tani maw 🙂 Topa’n bitna thupha Zomi te tungah hong buaksuk tahen! Sawltak #zomidaily