Zomite Pau le Ngeina

Zomite Pau le Ngeina

Zomi sisan i neih zongin Zomite pau a theilo peuh mah hunkhat ciangin Zomite sung panin cimang ding uh hi. Ngeina theilo mi peuhmah nam thupitna theilo uh hi.

Gam tuamtuam ah Zomite tamta i hih manin khangthakte in ei pau hong manggilh ding uh sangin i Ngeina a tungsa te a ki pat i maimang sak ding lauh huaizaw in ka mu hi. Gamdang genloh Kawlgam Kawlpi a kipat a khang lam a, a khangkhia zawten zong Zongeina ka theihlohpi a ci tampi om thamtham hi.

Kampau:

Zogam panin Zanggam Kawl hon lak ah i tunteh nu le pa ten tate Kawlpau a theihsunsun uhtawh hopih nuam pah, Mizo gam tung Mizo pautawh tate hopih nuampah..cih bangin i om na minamte pau tate theih loh ding lauman hiam, a zangh nuam phadeuh mi ki om hi. A sawtna ah Zomite tateng mah hong ki khawl theizaw, nuam kisa zaw na pi in, a kampau uh pen amau minampau hi peuhmahlo, namdang pau bekbek hong pau bualbual uh hi. Mel le sa panzong i muhbek tua minam hi ei’, i cih mi pen amau minam pau a zangh lo a, a ki lawmlo minam dangte pautawh a pau uhteh et lawm hetlo hi. Mi mangthang a ki ci hite aive maw ci-in ih zak ngei hih mite peuh aitam ih cih hun om hi.

Hun hong pai toto in, nau hong neih in a tate uh Kawlmin, Mizo min..cihbang hong phuak pah uh hi. A min phuakten Zomin a phuak uh hangin a ta neihten min behlap tawm in Kawlmin, Mizo min behlap se uh hi. Pi le pu zahtaak lohna hong ki behlap to pah hi. Thupha a taisan ki patna suak hi. Tua panin a tate un ei pau a theih ding zah in theilo, amin takpi uhzong Zomin deih nawnlo uh hi. Hih bang mite Zomi ahih uh hangin a tawpna ah a omom na minam a suak, mi mangthang a ki ci mite ahi ta uh hi.

Tu-in ahihleh India, Malaysia le Thai panin gam tuamtuam ki tung ciat hi. Ei mite zong ki om khawm zawdeuhta ahih manin ei pau a theilo ten theihbeh zazen zaw uh hi. Tuaban ah minam dangte kiangah aom uh ciangin minam dangte zong amau nampau ciat a thupit sakna uh hong mu uh ahih manin nampau theihloh pen haina hi ci-in amau le amau in hong mu khia uh hi. A hizongin tua mun ah Ngeina tawh kisai ki zanghlo ahih manin ngeina lamsang minam dangten bang ngeina cih a ki pat ei ngeina zong a kizatna tam theihlo uh hi. Ei pau bel a hunzui in hong hamciam thei uh aa, manggilh tanghial ding bel haksa mahmah dingin mu ing. Zomi tamsim om khawm lak ah ei pau theilo te mi lamdang pi khat ahih ban ah koi mun koimun a om zongun alamdang mite mah hilel ding uh hi.

Ngeina:

Ngeina theilo khat in nam thupit dan telzo taktak lo uh hi. Gamdang ah ih ngeina zat hun ding pen tam aneih ki om lo ahih manin ih Ngeina pen tawmtawm in maimang kha in ka lam-en zaw hi. Zomite zong khuakhat ah ki om khawm ngeingai ta ahih manin ei paubel ki zangh mahmah in, ahizongin ih Ngeina ki zangh mello hi. Zat na ding mun/hun ih neih keileh zong khakhat in khat veita hiam, kha thum ah khat veita hiam? ZCF khawngah ki lawmtatna leh ngeina ki theihsakna khat in lahna khat om zel leh naupang khangthakte adingin hoih mahmah dingin lam-en ing. Tua hikei leh khangnote’ genloh a picingsa pawlkhat in manggilh zawlai ding uh hi.

Ko mun koimual ah ih om zongin ih Pau le ih Ngeina te in minam hihna kem penpen hi. Mi hing hong piangsak pa in, Minam ngeina leh pau hong neihsak ahih manin amau deihna a zuih minam ih suakna ding deihna tawh ngaihsut khak sunsun teng kong gelh khia hi.

Pau leh Ngeina veitna tawh

Thawn Tuang
Zomi Angvaan