Muanpu leh Manno – 5
Manno te inn tung khin tading cih ciang Thangpu leh Mangnu bel niangtui khawng awm panpan uh ahih manin nitak sawt nailo tawh kibang hi. A nu in lah lupsan khin, a pa zong a niangtui dawnkhin leh lupna lam zuan ding hita ahih manin a holim nop teng a Tukbel tep kawm in Thangpu tawh holim buahbuah a, Mangnu in bel apa lum mengmeng leh a deih hi.
“Thangpu, nang kum bangzah na phata a?”
“Kei kum 43 pha pan ing ei Pa Pum”
“Aw, tua leh Mangnu sang kum 10 val mah kikhai uh cia mate!”
“Himawk mah inteh. Ka lapawl sinpih masakte pawl tu in nupi, ta 2, 3 nei khinta uh hiven”
“Aw…. ka tukbel tumta, kei na lumta ning maw…”
“…. mangpha”
“Dena na gennop banga u Thangpu?”
“Bang pen maw?”
“Mangnu… nong ci a”
“Aw, ken tua bang nong gen ding umlo e”
“Bang hong gen ka u Thangpu?”
“Ken zong hong ngai hiveng’ na ci hilo maw”
“Ka zuau hilopi, u Thangpu”
“Na zuau ci khang e Mangnu”
“Ciangsan in nang hong it mah bangin ken zong a galkhat pan nang hong it hiveng..”
“………………”
“……. Ciangsan hong it zah mah in kei kong itna zong lian ding ahi aw, na theihloh hang u Thangpu”
“Mawkmawk ciai Mangnu, nang pipi hong ngai ngam kei ning e”
“Banghang in maw u Thangpu???”
“Va ciah phot ning maw Mangnu”
“Tulai aw, kei kiang khatvei hong hawh sunsun ciah ding na gen pah zawzen, hong ngaihloh tuak si cia”
“Ngaih leh ngaihloh lam hilo, zan sawtta hilo maw”
“I thugen khek kei ve u Thangpu”
“Mangnu, nang bel na ut peuh tawh kiteng thei hiteh. Na deih peuhpeuh gen lecin hong deihlo omlo ding hi. Kei bang milmel tawh na kiten ding bel na nu leh pa in hong deihlo lua ding cih ka theihsa hi..”
“Ken deih peuh leng e leh U Thangpu”
“Nang na deih hang na nu leh pa thukimpihna zong kisam ding hi ei”
“U Thangpu, nang tawh om ciang ka lungmuang”
“Mangnu, kei lah mite hong ciamnuihna ah Ciangsau tawh hikhin ing a, ko gel zong kituak lel ung. Kuamah a hauzaw, cih zong omselo, a pilzaw cih lah omse lo, ka neih ka lam uh zong kikim, ka lungsim ngaihsutna ciang uh zong kikim, ka duh ka deih uh zong kikim. Nang banga nuamsa khinsa khat adingin koh khawng nuntakna ah hong kumsuk kik ding hilecin hamsa sa mahmah ding na hi aw”
“Kisin peuh leng hih thei ning. Nang zong kisin peuh lecin hithei inteh, ong ngaihsun ve maw u Thangpu”
“Ciangsau lungsim ding zong hong ngaihsut sak ve maw”
“Amah banga ka melhoih loh man maw u Thangpu”
“Melhoih leh hoihloh hikei, i nuntakna a kikim hileh Upate in kitenna ah zong nupa nuam suak zaw ci uh hi. Nang adingin nang mah banga mihau, mipil, misiam leh a noptat khinsa mah kituak ding hi ei. Nong genloh hang na lawmpa bel ken thei ngei ing e”
“Kua ahia, na theih?”
“Ka theih pen maw, nunglama Bu Kap hi”
“Aw, Bu Kap maw. Hingei mah ung. Aman zong hong ngai mah. Ken zong ka ngai hi. Ahi zongin amah a sepna lamah, ka zak hiauhiau danin namdang nungak khat tawh minsia ci veh aw… a lawmnu bang gai ta ci liang uh. Kei a theilo ka hizen veh!”
“Kua midang te ahia? Pammaih si e”
“A minam zong a sepna gamte ci. Thailand tawh gamgi lam ahih cianga maw”
“Banglai ci uh ahia. Nung kha zong inn hong ciah a, noh kikhawl lai hilo nai vua?”
“Ciah mah, kikhawl mah ung. Ahih hang amah maitai vetlo, a lungsim suakta vetlo pi”
“Aw himaw. A lawmnu gai, nang kiang hong gen ngamlo. A lungsim tawngah lah nang hong deihzaw ding. Ahih hang a langkhat ah amah awkta si. Hehpih huai zawsop e.”
“Amah zong a mai mial peuhmah hiveh. Ken thei zolo. Ka dot hang zong hong gen lo a. A pai kik khit ciang lai hong khak. Tua pan ka theih hipan.”
“Aw, himawk maw. Na theih in bang na ci a?”
“A um lo himai ing. Ahih hang ka ngaihsut kikkik ciang ka ihmut khawng hong suak in, ka tha hong kiam hanhan. Ka ihmut na pan ka khanlawh ciang a takpi mah hizen…. na sa lua ing”
“Bu Kap ki awi si e maw. No gel kituak peuhmah hive uh cin.”
“Aman zong hong itlo hilo a, a gaisak nu zong a deih ci masa kei uh. Tua nu in a puan sawpsak, a puan nawt sak, a inn hahsak, a nek ding singgah, theipuam, a tui a ha puak den ahih cianga a tawpna ah amah zong kisuanglah in awk kha dan hi… noh pasal te bel…”
“Hong thuakpih peuhmah ing e Mangnu”
“Nong telsiam ka lungdam, u Thangpu”
“Itna i cih pen neih leh lam leh sum leh pai tawh a kipelh theilo ahih hang, a kizop luat theihlohna zong om veve e maw. A hau leh ahau kiteng leh lah a zawngte cimawh semsem ding. A zawng leh a zawng bek kiteng leh lah nuntakna kikhek ngeilo ding…. leitung bel maw…”
“Hilua ei u Thangpu. Ka neih ka lamte thupi sa nawn keng. Lungsim ciimtak, siangtho tak, huaihamna hazatna tawh a kidimlo nuntakna thak a lunggulh hi ing. Neih leh lam in hong lungnopsak hang, hong lungkhamsak ciang gimhuailua. Simple living, high thinking a cih Gandhi nuntakzia bang thupi a sa lua hita ing…”
“Philosopher pi khat asuak na hi mawk veleh. Na thuakna bel hong hehpih peuhmah ing…”
“Nong hehpih leh kei kiangah hong omden ve maw u Thangpu…”
“Mangnu, thungetna ah hongphawk ning. Kithanemsak ken.”
“Lungdam ing u Thangpu….”
“Zan sawtta in kei na ciahta ning maw”
“Hong ciahsan kei ve u Thangpu”
“Ciahsanlo cih bang omthei ding maw Mangnu”
“Hong giaksuak ve…”
“Kei koi ah lum ding tua hileh?”
“Ih maw……….. ”
(zop lai ding)
Hau Za Cin
Phuitong Liim
Comment piaknop aomleh...