Zomite’ dinmun le milip thupitna (Politics of Population) ~ Suan Mang

Zomite’ dinmun le milip thupitna (Politics of Population) ~ Suan Mang

Tulai internet sungah eimi pawlkhatin Zomite “ta nih bek neih ding hoih hi” cin agengen pawlkhat om a thu thei mello pawlkhatin ahi, ahoih takpi mah isak khak ding ka lunghimawh simsim hi. Tua ahihmanin tulai Zomite dinmun leh population politics tawh kisai i ngaihsut piakna dingin thu pawlkhat kong luikhia nuam hi.

Singapore in 1972 kumin “Stop at Two” policy cih khat zangin nupa kop khat ta nih ciangbek nei thei ding cih upadi kumpiten bawl uhi. Kum-10 val azatkhit uhteh agamveng Muslim Malaysia, Endonesia te amuh uhciang lungmuang zo nawnlo uha 1987 kum PM Goh Chok Tong hun ong tun ciangin “Have Three or More If You Can” cih policy ong zangto kik uhi. Ta tampipi akineih ngam nangin Baby Bonus cihbang na pia in, huhna tuamtuam tawh na panpih uhi. Ahihangin mimal atawmuh banah ta tawm nei theilua uh ahih manin gamdang pan pilna, siamna neite nak zol mahmah uh a pilna neite ading in EP, citizen ngah nang haksa khollo hi.

China gam in zong 1979 pan kipan One-Child-Policy zangin Zero Population Growth target in na nei uhi. Hih policy hangin ta numei neikhate in nau phiatsim (abortion), thatsim uha tuni tanin naungek million 200 val in sihlawh uhi. 1980s, 1990s ciangciang dong khangno thahat tammamah lai uha tua human resource pen gam khangto dangte a demzawhna thubulpi na hihi. Tua khangno thahat workforce teng hangin Japan te kanto in leitungbup economy ah No-2 na mun ong la to zo uh ahihi.

Tun ahih leh one-child-policy hangin khangno sangin piteek puteek tamzaw ta uha Gamteek (Aging Nation) kici liangta hi. Khangno thahat nasem/work force tawm ahihmanin nasepthaman khang, vanman khangin a export uh kiama, sipuazi khantohna/growth rate zong kiamkik ahihmanin akumpite pataukik mahmah ta uha “ta numei neikhate in khat neihbeh thei lai ding” cih thukhun ong behlap leuleu uhi. Asawtlo in one-child-policy pen ong bei dingin lametna kineita hi.

Israel gam a kiphuh tung 1948 kum pan kipanin akiim apaam ah Arabte population azah 60 in na tamzaw uha,a gam zaina azah 650 (Arab gam-21) bangin na zaizaw uhi. Nasem ding, lokho ding, galdo ding kicing zolo uh ahihmanin leitung kiu li panin Jew minam akici khempeuh kaikhawm uhi. Israel taktak teng ong bei pian ciangin Israel ut tepawl ong kaikhawm leuleu uha pansan (proof) tuamtuam zongin Israelization ong bawl uhi. Eimite adiakin India lampan Mizo, Kuki, Hmar, Paite lamte a tultula simin na samlut khinta uha tampi la lai ding uhi. Tua mite pen tulaitak Palestiniante tawh akituhtuhna uh ahi Gaza kuamteng khawngah tengsak uh a gal manawk dingin zang uhi. Tuni ciangdongin mimal population akhantoh nangun lampi namkim zongin nak panlak mahmah lai uhi.

USA te in zong leitungbup panin refugeete kumsimin a tulza kiim ta alaklutna uh pen pilna, sum le paai,galhatna te bek hilo in mimal mahmaha athahat gampi khat asuah zawh nanguh ngimna bulpi khat ana hi gige hi. Leitungbupa khuak hoihpen, tha hoihpen, siamna hoihpen ahoihpen kici tengteng kaikhawm, gawmkhawma USA in atawntunga No.1 na ah a om zawhden nanguh hanciamna ahihi. I gamah tunai thupiangte en pak leng: Rakhine ten ta tawm nei in peemta, Bengali-Rohingya ten ta tampipi nei uh ahihmanin kum 50 sungin innteek Rakhinete minority ong suakkik uha tunin a Pupa neihsa gam vuah lengla bangin omkik ta uhi cih i mu ding hi.

Muslim ten Kawlgam ah majority asuah zawh nanguh planning hoihtakin na nei khikhian uha kum tampikuaman kitheihpih khollo hi. Kawlgam sunga Muslimte’ inn, sai, mosque(biakinn) maite ah akisuang “786” cih laimal akhiatna i thei kha hiam? Hih laimal pen Muslimte’ thusim ahihi. 7+8+6=21 hi-in, “21st century sungah Kawlgambup Muslim gam suahsak zawh nang hanciam ni ” cihna ahihi. Bang tawh=mimal population tawh. (ong CCOC vai zawzen uhi). Tulai mipil khenkhatin agenciangin Mongolte, Rome ten thahatna tawh, English ten Galvan tawh gam na keek uha, Muslim ten ahihleh milip tawh gamkeek uhi na ci uhi.

Kawlgam Vaigam ah Zomite minuaia i om thapaihna pen i khuak, i pilna, i thatang, ihanciamna Vaite sangin aniamhzawk hang na hipeuhmah lo hi. A mimal population ngiata apumlelh ihihi. Mimal itawmkawmkalah Burma, India leh Bangladesh gam thum ah kikhenthang lailai ihihmanin minampi dangte ban zolo, dem zolo ihihi. Kawlgamah Democracy/Federal hoihtakin ong om henla.. i cihcih hangin democracy kivaipuakzia ah a thupipen leh anunungpena thukhen pen mimal Mee/Vote ahihi.

Chin State Hlutdaw ah Tedim-Tonzang lamte i vote tawmlua ahihmanin District nangawn i phukhia zo kei hi. “Chin State i common language dingin Lai pau zang ni” cin State Innpi ah thu ong ki sung zenzen henla Haka, Thantlang, Matupi, Falam teng ong pangkhawm mawk lehuh anang zolo ding himawk hihang cih bang ka ngaihsut ciangin lung himawh huai kasa sim mawk hi. Gambup level ah e leh … haksa zaw kan lai ding hi.

Kalay-Kabaw Valley ah Zomi/Chin vote tam ineih zawka Zogam isuahsak khak ding pen Kawlte na patau mahmah uhi. 1967 kumin Kabaw valley a isanggam Kukite 20,000 val bang Newin kumpi in ahonin na hawlkhia khin uhi, tua pen “Khadawmi Operation” cin minthang hi. Akhiatna pen “ahunlap” cihna hi a ahunlap in Kuki/ Zomi/ Chin te majority isuah loh nangin adalna uh ahihi. En ahihleh tuadan zaipi, saupi ngaihsun khollo in nekzonna anop zawkzawkna izotna in Kalay-Kabaw kuam teng iluahzo dek phial mawkmawk ta hi.

I nunglam khang generation 1-2 leh et kik leng i Pu i Pa ten tu a ei khang sangin ta na hau zaw uhi. Atangpi average in atawmpen ta 5 bang na nei uhi. Tua sung teng Zomite ki punga, Zogam panin mundang ah ki pemkhia ngeingai in mun tampi iluahzo uhi. China gamah one-child policy Mao Tse-tung in agen masakpen 1958 kumin population 600 million val na phata uha, tun azah nih 1.3 billion pha uhi. Ahihang tuniciangin ta tam neih ding ong gelkik san ta uhi.

USA ten zong kumsimin gamdangmi a thein asim lalutin a gammi na suahsak sawmlai uhi. Singaporete leh Israelte pil mahmah uhin zong hau mahmah lel uha ahihang milip population khantoh nang mah na nak hanciamh san mahmah uhi. Zomite dinmun e leh tuate tawh i kiteh thei nai hiam? Mimal milip population tamlo in gam kiluah zolo, gam kikemcing zolo, gam kikeek zolo, gam sungah thuneihna kinei zolo hi. Mimal, milip in cinlo in Nampi isuah ding haksa hi cih itheih cian mahmah hoih ding hi. Tua hangin i Zomi politicians ten kipumkhatna a gengen uh na hihi, “sak leh khang kigawm nang” cih ana gelgel uh na hi gige hi. Mimal, milip kicinna i thupitna teltakin na mu uh ahihi.

Tua ahihmanin Zomite adingin ta 1-2 bek ineih nang kiciangtan ding hun hi nai peuhmah lo hi. Tam anei zozo in neih dingin kihanthot ding hizaw hi. Gam thumna tungte bang AUS, USA, EU khawngah kumpite ong vakpih hilel hi. USA bangah ta tam nei ten food stamp tampipi ngahin kum simin tax return $10,000 valval ngah uhi. Australia ah ta 5 pan atungsiah neite pension kipia in nasep zong kul nawnlo hi ci hi. College university zong nu le pa kahsak tangtang lo in kikah zo lua ahihi.

Piancil 26:4 “Na suan-le-khak te vana aksi zahin ka tamsak dinga, amaute hih gam khempeuh pia-in, na suan- le-khak tungtawnin leitunga minamte thupha ka pia ding hi” cih enleng Zomite adingin Topa deihna bangci dan ahitam cih i mu thei ding hi. Khanglui paunak thupil khatin “Ngasa ten atam sihpih a, mihing ten atam hinpih hi” na ci hi. Zomite akhang, apung ding leh gual tungtuang dingin Topan Thupha hong pia tahen. Suan Mang (USA)