Zomite aading muhtheih kipumkhatna ~ Suang Khen Pau

Zomite aading muhtheih kipumkhatna ~ Suang Khen Pau

Thupatna :: Mangte in, “Kipumkhatna in thahatna hi,” ci uh aa, Kawlte in ahih leh , “Bawnghonte kikhenleh sahang in tuah hi,” ci-in ei Zomite’n bel, “ Nupa kilungtuak khua khat in zolo; khua khat kilungtuak khua kua in zolo,” cih paunak ih nei hi. Singkung a tangpote tukbaih-aa: a khawlpote puk hak hi. Khauzang khat sangin a kihekkhawm namkhau botsat hak zaw hi. Tua bang mahin ih minam dinmunah Zomite ih kipumkhat ding kisamta bek hilo in, a kul hi ta hi.

A kikulna thu Khristian biakna tung tawnin ih en ding hi. Amasa-in Zomite hong kikhenkhamsak thute ih suutphot dingaa, tua khit ciangin kipumkhat nading a kisapzia enin , a tawpna ah kipumkhatna ih neih theih nadingin sepkhop-bawlkhop theih ding thu pawlkhat ka hong sung ding hi. Zomite’ kipumkhat theih nading lampi a khunsawm ihi hi.

I. Hong Kikhenkhamsak Thute (Factors Leading to Division)

Zomite tu laitak ih kipumkhat theilohna ka et ciangin a hang pawlkhat a nuai-aa bangin ka mukhia hi.

(1) Ih Tual Lungsim (Localism)

Thu tuamtuam hangin mun tuamtuam leh khuata tuamtuam ah kithehthangin ih teeng hi. Tua manin makai tuamtuam leh ngeina tuamtuam ih neiciat hi. Pau leh awsuah tuamtuam zong piangpah hi.Kizop-kivanna hamsa ahih manin khua khat leh khua khat mi tuampi ih suak hi. Kidemna tuamtuamte in zong mikhual hong tangsaklai hi. Tual lungsim neihna hong khang semsem aa, Khristian ih suahkhit ciang nangawnin tua in kikhenna piangsak hi.

Tual lungsim, kual lungsim, leh huang lungsim neihnate in eite hong kikhenkhamsak takpi mawk hi. Tual lungsim a khauhpai nadingin zong khua khat leh khua khat a mual a guamin hong hal-in ih awsuahte tangkai mawk takpi hi. Tua manin tual kibatlohna munte-ah kihuh kipanpih nopna omlo pah hi. Pheisa-liangsa ci-in ih kikhenmawk hi. Simta-zota, sakmi-khangmi ci-in ih kilo hi. I hihna bangin ih kimu thei kei hi. “Nang pa’ mei sang kei’pa mei sau zaw,” ci-in ih kidemden aa, ih kipantahnuam kei hi. Kipantah cih thadah ih kipanpihnuam keilai hi.

(2) Ih Beh Lungsim (Excessive Clan Spirit)

Tual lungsim a behlap dingin beh lungsim na omlailai mawk hi.A behpa ahihleh nasep guan nuam deuh pawlkhat ki-om hi. A behpa ahih leh sum leitawi a piabek ki-om hi. A khialh hangin a behpa ahih nakleh panpih cih bangin beh lungsim khat pen Zomite’ sungah om gige lai mawk hi.Jesuh’ beh ih hihlam ih kimangngilh denkeeii laimawk hi.Deihsakdiak leh pahtawinopdiak kinei hi.Nung pan-in tawsawn nopdiak ih nei hi. Tua in ih pawlpi sungah ahi zongin, kipawlna khat peuhpeuh leh kumpi nasepna sungah nget bangin hong ne-in no pawl, ko pawl, cih hong khangpah lian hi. Tamlo na leiileii tua bangin kideidana kulhpi ih cian sawmlailai hi.

(3) Ih Pawl Lungsim (Denominationalism)

Tual lungsim leh beh lungsiam sangin a siahuai zaw khat in pawl lungsim neihna ahi hi. Pawl lungsim neihluat manin unau-pata, sungta-putu ih ki-innlamtanh lianlianlai mawk hi. Ih Khristian nuntakna sungah ih picing nailoh man hi zawkha dingin ka um hi. Hih pawl lungsim hong khauhlua ahih manin Tuitphum, RC, AG, EBC cih bangin kigim neihna om aa, tuiphumte in ‘ko a innpite hi ung,’ cih lungsim hong neipah hi. Pawl dangte in zong miluite-piangluite ci-in thupisim deksuaituanlo hi.

Tuiphum sung nangawnah ko TBC, ko ZBC no ZBCM cih bangin kilangmuhna lianlai mahmah mawk hi. Pawl lungsim neihna lianlua ahih manin unau sanggam khat hi gegu na pi, dongtuakna nagawnah kidon kilkello cihzah dongin Khrih hong itna ih pawlpi sungah ih neuseekseek hi. Pawl lungsim hong uangluat ciangin thupomziate nangawn dongah, “Huate upna peengte, hiate limsangte, ko pen upna laingil neite,” cih bangin ei aabek mah man ih sa liuleu mawk hi. A taktakin ei thupom pen ei adingin a dik pen ahi zah khatin mite’ thupomte zong amaute adingin a dik pen ahihlam ih muhsakkha kei hi. Hih pawl lungsim neihna in ih minam sungah unau-sanggam khat ih hih lam muh theih nading ih mit hong tawsak lailai hi.

III.Kipumkhat Nading A Tawsawn Thute (Factors Leading to Unity)

Kipumkhatna tawh kisai-in hong tawsawn thu pawlkhat om aa, tuate a nuai-bangin kong sungkhia hi.

A. Pasian’ Thu Tungtawnin Etna (Theological Imperative)

Khristiante’ biak Pasian in Tothum Pasian(triune God) ahi hi. Thumgawm Pasian khat ahi hi. Pa Pasian, Tapa Jesuh Khrih leh Kha Siangtho ahi hi. Pa Pasian pen vannuai-aa piang mihing, ganhing, sihkung-lopa, tuipi-mualmau, nuntakna nei leh nuntakna neilo na khempeuh a bawlpa (creator) in hong kilang hi.A bawlsa nate puahin kemin a zuun Pasian (sustainer) zong ahi hi. Tapa Jesus Khrih ahih leh Pasian’ bawlsa mihing leh nate a gumkhia (savior) dingin hong pai ahi hi. Kha Siangtho ahih leh mihingte tawh omkhawm aa, a siansuah (sanctifier) ding in hong kilang ahi hi.

Tothum Pasian khat ahih hangun a nasep uh a tuamtek ahi hi. Tua hi-a Zomi Khristiante kipumkhat ding ih cih ciangin kipumbatna (uniformity) a cinuam ka hi kei aa, ii kibatlohna sungmah panin kipumkhatna (unity in diversity) a gennuam ih hi hi. Pa pen Tapa ahihloh mah bangin Tapa zong Kha Siangtho hilo hi.Ahi zongin amaute’ Pasian hihna sungah pumkhat ahih mah bangin Zomite zong ih kipumkhat theih nading a pulaaknuam ka hi hi. I biak Pasian zong kipumkhat-in Tothum Pasian ahih leh eite zong banghangin kipumkhat theilo ding i hi hiam?I pawlpi’ minte lobuang eite’ kilamdanna mahmah ka muzo het kei hi.

B. Mihing Hihna Tungtawnin Etna (Anthropological Imperative)

Leitung-a piang Zogam a kicihna mun-aa teng Zomite pen mihing mah ih hikhawmciat hi. Mihing ih hih zahkhatin mihing zia-le-tong, nuntak-khuasakzia, ngeina leh lai, kampau leh ham a nei minam mah ih hi hi. Lunggulhna (will), theih theihna (cognition) leh khentat tawn theihna (violation) ih neiciat hi. Tua mah bangin nuntakna kha (soul) a neitek ih hi hi. Tua ahih manin kipumkhat theiloh nading thu a omkei hi. Mihing ih hih manin mihing neihding-a kilawm ki-itna, ki-lemna, thumanna leh suaktakna tawh ih kipawlkhop theih ding ahi hi. Mihing hikhawm bek thamlo-in minam khat Zosisan nei vive ih hih manin ih kithuhual theihloh nading thu mahmah om lo hi. Tu hun pen kikhenkhap hun hi nawnlo aa, kipumkhat hun hita hi. Kigensiatsiat hun hinawnlo-in kipahtawi hun hi ta hi. Kilangpan hun hi nawnlo aa, kipanpih hun hi ta hi. Kitelkhialh hun hi nawnlo-in, kitelsiam hun hita hi.

C. Pawlpi Tungtawnin Etna (Ecclesiological Imperative)

Zomite lakah Khristian 95% ih hita hi. A nungta Pasian um-a Khristian biakna a biate ih hi hi. Tu laitak-in pawl tuamtuam (denominations) ih hih hangin I biak Pasian kibangin, i up kibang-aa, ih laisiangtho a kibang ahi hi. A taktakin hih pawl tuamtuamte pen gamdang pan-aa hong pai sangmangte hong ken hilel hi.Judson sangmangpa pen America gamah a omlai-in Tuitheh (Congregationalist) mi hi aa, sangmang nasep sem dingin hong pai-in India a tun ciangin Tuiphum (Baptist) a suak ahi hi. Judson sangmangpa pen Tuiphum na suak keileh tulai tak-aa a kituiphum sak mahmah nang-le-kei zong tuiphum hi keek khalo ding hi hang.

Tua hi aa, i pawl lungsimte pen sangmangte hong puak pawlpi tungtawn-aa hong piangkhia ahihna kiteel mahmah hi.Tua bang ka cih ciangin sangmangte a mawhsak nuam ka hi kei hi. Amau zong amau hunin a hoih pen ding ngimna mah tawh hong pantah uh ahi hi. Ahi zongin tu-in pawl kideidan-aa ih kilangbawlbawl leh sangmangte’ mawhna hang hi nawnlo dingaa, nanglekei mawhpuak hong hita ding hi. Pawl lungsim neihluatna in kipumkhat nadingin hong khaktan tawntung hi. A minin pawl tuamtuam ih hih hangin ih To khat, upna khat, tuiphumna khat leh laisiangtho khat a tawikhawm Khrih sungah innkuan khat ih hih manin ih kipawl theihloh nading bang thu om zenzen ding a hiam?

D. Tual Nuntakna Tungtawnin Etna (Sociological Imperative)

Zomite pen minam khat ih hi khawm aa, lampuan zawngkhawmte ih hi hi. Zogam ah tengin, Zo sinsan, Zo lungsim nei-in Zo an ne aa, Zo ngeina tawh a khangkhiate ih hi hi. Zomi-in piangin Zomi mah aa a si dingte i hi hi. Tuinaak khat dawn khawmin lociingkhat khokhawm aa, pumbuuk khat zangkhawmin tulpi khat a neikhawmte ih hi hi. Nopna-dahnaah a ki-uapliailiate ih hi aa, a bawng nuntak (communal life) minamte ih hi hi.Zuhai-sakbak a tangkhawmte ih hi aa, zulim-salim a kisuah masakte ih hi hi.Tua ahih manin banghangin ma pangkhawm theilo mawk ding ih hi hiam?

Biakna lam panin kipumkhat theih nadingin ka etpak ciangin a tungaa thute ka lungsim sungah hong suakpak thute hi aa, kipumkhat nopna lungsim ih neih ngelngel leh bel ih kipumkhat theih nadingin thulela tampi mah omlai ding hi. Lai simte in ih ngaihsut beh ding kong hanthawn nuam hi.

III. Kipumkhat Nadingin Bang Sem Ding? (What should we do for Unity?)

Kipumkhat theih nadingin a kibang ngimna(common vision) leh a kibang kungmui (common goal) ih neihkhop ding kisam pen ding hi. I minam bupin kungmui kibang ih neihkhop ciang bekin na ih semkhawm thei pan ding hi. Tua kungmuite lakah pawlkhat a nuai-aa bangin kong pulaaknuam hi.

(1) Zomi Hihna Thupisakkhawmna Lamah (Towards New Identity)

Ciimnuai masiah ih tangthu pen a kigenzelzul lai ahi hi. Ahi zongin ih pulepate’ khang-aa kipan tuni dong Zomi-in a kilo minam ih hi hi. Eile-ei ih kisap ciangin Zomi ih kici aa, mite’n hong sap ciangin Chin hong ci uh hi.Zogam sungaa om midangte in Tedim hong ci leuleu uh hi.Chin leh Tedim cih pen mite hong sapna hi aa, mite tawh ih kizopna-ah sangsiam-aa ih zatsiam ding thupi mahmah hi. Ahi zongin eilehei ih kisap ciangin Zomi ih kicitekthei hi. Tedim Kampau Zomite’ sungah awsuah zui-in Sihzang, Saizang. Teizang, Dim, Khuano, Losau, leh Zo etc., cih bangin a ke ki-omlai ahih manin tuate zong amau mun ciatciat-ah ih thupisak ding kisam hi.Zomi hihna sungah tua bang-aa a ke a ke-in, a bil a bilin, a khil a khilin ih omna in kimuhdah, ki-etsat, kipampaih nading hilo zawin ih hoihna honglak hi zaw gege hi.

Sihzang mi, Zo cih bangin ahi zongin a kilonuam ih om dingaa, tua zong ih thupi sim ding hi. Tua bang aa omna in ih Zomi hihna a kiamsak zong hi tuanlo-in a hoihna a pulaak ahi zaw hi.Paak huan sungah singkung nam tampi a om ciangin a etlawm pan hi zaw hi.Bangbang ahi zongin tuni dongin Zomi mah ih sangkim theipen ding hi. Ahi zongin mite’ hong sapna zui-in Chin ahih keileh Tedim a kicinuam a omleh zong, “Keng” sa-a thalnialpah ding zong hi ka sa tuan kei hi.Tuate in Zomi’ bei nading hilo zawin a thupit nading ahih lam phawkhuai ka sa hi.Tua ahih manin mite hong sapna zong thupisa-in eile-ei ih kimuhna zong thupisa-aa Zomi ih hihna ih kilat sak ding kungmui-in ih neikhawm ding hi.

(2) Pupa’ Ngeina Zo ngeina leh Zolai Thupisakna Lamah (Towards Promoting Culture and Literature)

Zomite’n a kibang kungmui ih neihkhop theih nadingin i ngeina, i pauleh i laite thupisak ding hi hang. Ih ngeina pawite ahi zongin ki-it kingaihna late ahi zongin kepcing ih sawm ding hi. Ih Zopuante aa kipan ih vanzatte dongin thupisak ding hi hang. A diakdiakin minam khat-aa picing takin ih din theih nading ih lai leh ih kampau mahmah ih zuun ding kisam ka sa hi. Gentehna in tu laitak-in ih minambup in ih lai ih thupitsak theih nadingin Zomi Christian Literature Society ah kigawmkhawmin puahkhawm leng hoih mahmah ding hi. ZCLS in pawl kideidan lo-in a kilut thei Zomite’ lailamah khantoh nading a vaihawmpi ahih manin tua kipawlna-ah kituahin mapang khawmleng ih kithutuak baih pen ding hi.

(3) Zogam Khantoh Nadingin Pankhopna Lamah (Towards Sustainable Development)

Thupha ngah minam ih kicihkeii sam hangin Leitugnah Kawlgam a zawng pen a hihna a khangsak pen Zogam-aa teng ei Zomite ih hi aa, 40% om hi, hong kici hi.I pianna Zogam khangto deknailo cihna hi. Mangkang kumpi in Zogam hong lak ciangin galkapbu khat in “ Pasian in leitung abawlin Zogam a hoihin lem manlo hi,” ciliang hi. Tua hi aa, Zomite’ kipumkhat theih pen nadingin Zomi Khantohna Committee neih ding kisam ka sa hi. Kayinte in neikhin uh hi. Tua bangin nei theihleng, “Zomi ahih keileh Tedim” cih nengnengte tawh ih buai mannawn kei ding aa, Zogam khantoh nading ahi; khuakim motor lam tun nading, khuakim in tuitha tawh mei a ngahzawh nading,khuakimah pilna a kisin theih nading, cidamna lamah khantoh theih nading, khuakimah kihona phone a om nading cih bangin ih semkhawm theih ding hi.

Zomite tomno sungin a khantoh theih pen nading ka lungngaih ciangin meitha(electricity) ngah ding kisam ka sa pen hi.Gentehna-in Meitei gun khakin meitha ngah lehang: anhuan nading sing kitom nawnlo ding aa ih gam hong nosuak kik ding hi. Huihlak kizopna hong khangto ding aa, phone leh internet-te deih bangin zang thei-in online tung pan leitungah ih zin kawikawi thei ding hi. Nisim ih nuntakna-ah tua meitha tawh na kisem ding a ahih manin ih living standard hong sangtuam mahmah ding hi. Meitha zang-aa sum bawlna private business kisem theih dingaa nasep manlang bek tham lo-in nasem ding zong hong tam mahmah ding hi. A khangtokhinsa gamte bangin mualkhat leh mualkhat sikkhau zangin ih kikawm ziauziau thei ding hi. Zomite khantoh theih nadingin mei ginatak (electricity) ngah thei leng lam bann pen dingin ka um hi.

(4) Khristian Mission Semkhopna Lamah (Towards Partnership in Mission)

Zomite pen biakna mi, biakna uukte ih hi hi. Mission ih semkhawm ding hi. Mission Board khat ih phuankhawm dingaa tua panin sangmang ih puak ding hi. Kua pawl kua pawl cilo-in kideidan hetlo aa, tua mission board ah huhna sum ih puak lel ding hi. I pawlpi bulphuh lo-in Khrih leh lungdamna thu ih bulphuhzaw ding hi. Kha mangthang manin pawlpi ih phuh leh pawl’ min bulh sese lo-in Church of Christ (Khrih’ Pawlpi) ih cihsawm lel ding hi. A hih kei leh a kiang-aa a naii ompen pawlpi khat ih ap ngamlel ding hi.Tua bangin mission semkhawm lehang ih kipumkhat baih pen ding hi.

Thukhupna

Hih thului in Zomite’ kipumkhat theih nading biakna tungtawnin etpakna hi aa, a hampi petmah ahi hi. Hih bang danin ka et ciangin kipumkhatlah nading lampi peuhmah ka mu kei hi. A diakdiakin kungmui ih neihkhop ding thupi pen hi. Aituam (private) sep lo-in minam tangin (national movement) sep ding thupi ding hi. A toi lungsimte ih tanzausak ding hi. A kawite ih seektang ding hi. A phawkte ih tamkimsak ding hi. A diakdiakin minam huamin Zomi Development Network cih bang khat phuanin khantohna ih seppah ding kisam ka sa mahmah hi.

Tu ni ciangciang ih minam bupin ih sepkhop bangmah omlo ahih manin ih veeikhop omlo aa, ih neihkhop kungmui omlo mawk hi. Neihkhop kungmui a om masiah kithuhual tak-aa nasep ding thubaihlo kha ding hi. Hih bangin minam bup kipumkhat theih nadingin kithusimna (recognition), kisansiamna (acceptance) leh lungsim kipiakna (openness) cihte ih neihloh phamawh ding hi. Amasa-in kipumkhat nopna lungsimah ih kituah masa dingaa, tua khit ciangin ih minam aading leh pawlpi aadingin ma ih pangkhawm ding hi. Suang Khen Pau, Myanmar Insititute of Theology, Insein, Yangon