Niangtui manzahding kiselna tawh kibuai in mi kaplum

Niangtui manzahding kiselna tawh kibuai in mi kaplum

Nov. 17, 2016: Egypt ah thukhenna innpi (court) in police khatin niangtui man zah ding kiselna hangin mi khat a kaplup manin thong sungah khum dingin daan pia uh hi. Egypt gam-a rights activists ten hih dan piakna pen mi tunga liamna leh mawhna bawlna hangin tua a bawlpa kipengsak hi ci-in hih thukhenna hangin lungkim zo lo uh hi. A beisa kum thum a kipanin galkap ten zawhthawh thu tawh gam ukna za a let khit nungun policete ngongtatna nasia mahmah a, mipi ten lungphona a beisa kum a kipanin nei mun mahmah ta uh hi.

Zan a gilbeem sunga khum dinga daan kipia policepa pen Egypt-te khuapi Cairo ah ningtui hai khat man dig tawh kiselna hangin mi thum kapliam in, khatin sihna tuak a, thukhenna innpi in tualthat (murder) in ngawh a, hih ngawhna pen tualthat pa’n thukhenna daan kipia a kikhiamsakna dingin thum (appeal) thei lai ding cih ahih manin mipite lungkim lo hi. Egypt gamah dam sung thongkia dinga daan kipiakna (Life sentences) pen kum 25 ahi hi.

Rights activists ten policete ngongtatna pen Egypt gam bup-ah kizeel khin a, daan piakna leh tuah ding panin peng (culture of impunity) theihna om den ahih manin policete ngongtatna nasia zaw sem hi ci uh hi. Interior Ministry in bel policete ngongtatna pen mun pawl khat sung bek-ah piang a, policete ngongtatna kikan hi ci hi.

Policete ngongtatna hangin 2011 kiphinna hong piang a, kum 30 Egypt gam a uk President Hosni Mubarak kilaih in, Mohammed Morsi in President hong len a, galkap ten July 2013 in zawhthawh thu tawh paai khia kik leuleu uh hi. Tua khit nung policete ngongtatna hong nasia kik leuleu hi. February kha in Cairo security directorate pua-ah police ten lampi-ah mawtaw hawl khat tawh mawtaw sap kiselpih in, kaplum uh a, lungphona nasia takin piang hi.

Nile City sunga om Luxor ah zong nung kum November in police ten thong sungah mi thum that uh a, lungphona lianpi piang hi. Tu kum in zong Italian researcher Giulio Regeni a sisa in kimu a, a pum tungah liamna leh bawlsiatna lim muh theih ding om ahih manin policete khut-a si hi dingin ki-ummawh hi. Ahih hangin Egyptian security services ten ko gamtatna hilo hi ci-in thal nial uh hi. Source: Al Arabiya/ Thang Khan Lian