Nutsiatsa gam ngai nawnlo Thu-um masate

Nutsiatsa gam ngai nawnlo Thu-um masate

“A nutsiat uh leitung ngaihsutpi penin a nei uh hi leh hong ciahkik theihna ding uh hun ngah ding uh hi” (Hebru 11:15). Thu-um mi nuntakna leh kalsuanna gencian mahmah a, gen kim mahmah hi.

Pianthak zawh a lungdamna leh lungmuanna pen mang kik thei mai ding a upmawh huai het lo hi. Hat lo kik ding leh bah kik ding cih pen a om thei ding a ngaihsut loh hun om tham hi. 1985 hun lai in khangno lapawl halhthak, piangthak tung, a kilawp laitak un singtang lamah Pasian thu genna ah ka paipih hi. Cik mah hun a van-gik pua a khualzin kha lo, a van tek uh kipuak in singtang lamto kawi nih kawi thum ah a kalsuan lai un khua-ul luang zungzung in hong zui uh hi. A gimna teng uh lungdamna a ngaihsun in lungkim mahmah uh hi.

Ka paina uh khuate a tamzaw nidang a crusade kibawlna sa ahi hi. Pai masak laia piangthaksa bangzah hiam a omna pawlpi vive ahi. Ka paina mun uh tampite a ka buaipih pen uh piangthaksa nungtolh leh bahkikte hi uh hi. Ka tonpih uh khangno piangthak pan lungdam mahmahte’n lamdang sa uh a, “Ahih leh, pa, a buai khempeuh in a hat lohna uh gen uh a, piangthak taktak a hih loh man uh ahi diam? “Piangthak hile uh tu a nungtolh kik mai cih om thei taktak ding ahi diam?” ci in hong dong uh hi. Amau a lungdam laitak uh ahih manin nungtolh tampi a muh uh lamdang sa mahmah uh hi. Bangtan hiam zawh in hih ka khangno paipihte zong hong bahkik uh a, amaute halhkikna ding programme bawl kikkik hong kisam hi.

Bang hanga thu-um bah kik a nungtolh om kik zel hiam? Thu-um tampite a hong bah kik na hang hoihtak a i ngaihsut leh Mosi in Israel tate a pikhiak lai in saltanna gentheihhuai tak nuai pana a paikhiatpihte’n a nutsiatsa uh gam a ngaihkik bangmah un I nutsiatsa gam i ngaihkik zelzel man uh hi pen hi. Israel tate zong Aigupta gamah nuamsatak a na om hi het lo uh hi. A duhduh uh ne a lungkim tak a om zong hi het lo uh hi. Ahih hangin Mosi in a paikhiatpih lai a gamthak zuan ding a a kalsuan lai un lamkal ah haksatna, taksapna, lauhna tuamtuam hong tung hi.

Gilkial hun, dangtak hun, lungkiat thatawl hun cihte a hong tun ciangin a saltanna uh gam ngai kha kik uh hi. Kileh kik hile uh zong a nopna ding bangmah om hituan lo hi. Bang dang hang hi lo-in a tunna ding gam lam a et loh man uh ahi hi. Nisim a haksa a tuakte uh kizo sak in mailam a tuna ding uh Topa’ ciam gam, Mosi in a lutpih sawmna gam Kanaan gam a ngaihsut loh man uh ahi hi. Eite zong i hi veve hi. Mailam saupi ngaihsun a, a upna uh bawlpa leh a kimsak pa Jesu lam en gige ding a hilhna tangte hilehang zong, ani ni a i tuah lungkiatna, lauhthawngna, phunna, siate tunga lungkim lohna, eima innsung a lungkim lohnate I kizo sak zel uh a, tuaman in mailam en a kalsuan sangin nunglam en a kilehkik utna hong om zel hi.

Pastor Nang Khan Suan
Lungdamna Aw, Nov 2014