Zomi Theory Thak Pulaakna: Set leh Setza (Engine & EngineOil)

Zopau-a “SET” I-cihpen “Engine” limlim aki-kawk hi-a, mawtaw set, puankhui set, coffee set, an-gawi set, lokho set cihbang-in pinion amici hagial anei peii nih pan-atungsiah akipeii-khawm setpeii-tawh akibawl vanzat limlim “set” kici-hi. Kawlpau toptawm (adopted) hi-a, Kawl awsuah-in aw eu hitaleh Zomi awsuah-in uun-in tom-hi. India lamkaai-a Zomite-in “Khawl” ci uhhi.

Automatic set hitaleh khutpeii set hitaleh, gankaih set hitaleh set akici hagialnei akipeii-khawm limlim akizat ciang-in anaal nading, angaat nading, abeiibaih loh nading-in anaalna za/sathau kizangh hamtang-hi. Lahpakding-in, mawtaw set sung-a setgialpeii khempeuh ahaa amawl loding, aki-negawp loding, maamtak-a agamtaang theikim ding-in setza (engine oil) kizangh-hi.

Setza-in set sung-a hagialte amuih nading, avuuikhuut nading, atawtgawp, amawlgawp nading, akipgawp nading pan-in daal/huu-a, peii-noptuam sak-in, naal zialzial sak-hi. Bawngleeng, sakolleeng cihte nangawn apeii vang leh azawl kithuahna teng-ah sathau (vokthau, sialthau, keelthau, cbt) kinuh tangtang-hi. Sathau/anaalsakna/setza akizatna tam mahmah-a, mihingte hong huh, hong noptuamsak lawmhoih khat, thahaatna khat ahihi.

Settaai (vehicle) tuamtuam lak-ah, tuhun ciang-in mawtaw-tawh Zomite kilawmta mahmah ta I-hih man-in mawtaw setza enpak lehang.

Mawtaw set acidam nading-in setza thunzah ding-a akiciangtan meelcikna om-a, atawmlua hoihlo, atamlua hoihlo, ahoihbek ciangtan kikoih-hi. Setza akithunzawh sawt-in, setpeii hagialte akipeii-zawh sawt lualeh setza niin-in hong vom gawp-a, tua ciang-in aluuiteng bua-in, setza athak, a-ang hiilhial, aciim dilhdelh thunkiik kuul-hi. Avom khin dihdiah setza sawtpi kizangh suaksuakleh set-in siatlawh ahihman-in anitluat ma-in kilaih den-hi. Tuabang-a akilaihzeel man-in set cidam-in, anasepna-ah paubaanna omlo-in manawt-hi.

Alangkhat-ah, setza kicing/kisam veelcian lo-in, mawtaw hawltheih hitah ci-a aki hawlhawl ciang-in setza nana kiamgawp, keh, niinlua cihbang piang thei-a, tua ciang-in set hagial khempeuh kitaat paatgawp-in akipeii ngei bang-in hong kipeii theih nawnloh ciang-in mawtaw hong khawl-hi. Tua takciang-in set hagial khempeuh pilh mangta, muih mangta ahihman-in setza tampi akithun hang-in (atamman penpen, athak sitset setza hiphial taleh) akimanna om nawnlo-hi.

Hihbang hun ciang-in:
“Setza”-in khialhna, paubaanna anei hi kilkel lo-hi.
“Set hagialte” angotdeuh, adualdeuh, atolodeuh hi tuanlo-hi.
Mawtaw azangh mipa-in mawtaw zattheih ciangbek-in thei-a, etkolding, puahding, hahding, zuunding, donding ahihlam atheihlohman bekbek ahihi.
Tua bangmah-in, setza beithei, kehthei ahihteh ci-in aciangtan zahvaal thun sukgawp, leetsakgawp lehang, akisap lohna munte-ah setza atuk ciang-in niinhuai-in, amah-tawh akilemlo duap (pulley khau) te tawkgawp, hoihtak kipeii thei nawnlo, taalgawp., baan-ah anel-tawh akilemlo spark plug te kawtsakleh set kiphong (start) theilo-in om thei-hi.

Zomite’ Sahkhuatuahna (Socialization: lifelong process of inheriting and disseminating norms, customs and ideologies, providing an individual with the skills and habits necessary for participating within his or her own society.) paizia leh hih setza thuluan (theory)-pen etkop theih leh amuiibunh mahmah theory khat-in ka’ ngaihsun-hi. Adiak-in, biakna, tualsung, minam, khangno, nupi cbt-a kipan kipawlna peuhpeuh-ah hih thuluanzia akitheihloh man-in akuullo/akhial kimawhsakna, kingawhna dimhi cih keima’ mimal muhna ahihi.

Kipawlna Set Hagialte kituak tak-a akipeii nading-a akisam setza-pen kipawlnalam theihneihnate (organizational norms & values), kipawlna sung-a zatding daansehte (ethics), kipawlna’ dinna tuplehngiim., thukhunpi., septawhthuah thusinna (practical training) cihbangte ahihi. Hih thuguite-pen Kipawlnalamsang Setzate ci-in meelcik ciatpak-ni!

Zomi sung-ah tuni ciangciang akician kalsuanzia-tawh akalsuan ngiatngiat pawlpi omlo-a, online suahtaakna ziak-in: “Makaai kisam” aci-tawh, “Nungzuui kisam” aci-tawh., makaai akisa pianpiante leh makaaite’ maai amunuamte-in “Makaaite’ cihbangbang manding, eek ne-a hongsawl lehzong neding” cihphial zahding ahizong-in., mipi’ lak-a om bang-a akisehte-in, “Makaaite kicianlo, muanhuailo, citaklo,….” cihbang-in minam sung-ah pingpong kisaat den-hi.

Muanhuai akisa mahmah, siamsinna-zong saang akisa mahmah te-nangawn hong kipan uh-a, hihmeel-hi cihding omlo zahdong-in angei-mah hidenkeei lel-hi. Mipi’ deihdeih makaai kicianpi mahmah hi uh-a, pilna siamna-zong hawmthawm a-omlo vive-mah banghang-in angei-mah bang denkeei? Mipite’nzong bangbang hileh pil sa, lian sa, belhtaak sa, muanhuai sa-in kibeel-a, athu-zong kimang hinapi banghang-in angei-mah bang denkeei?

Kipawlna-pen Michael DSHung-in ka’ gelhsa hong quote ngei mahbang-in “kipawlna tam seemseemleh minam aphungcing seemseem” himah-hi. Zomite’ kipawlna tepawl-pen minam phungcin nading tawsawn khatbeek a-om kei-hi. Minam ki-elna, kitukalhna, kilangneihna-a kipan minam cinatna virus suakvek mawk-hi. Virus-pen kithat ngamlo-hi, banghanghiam cihleh virus sih nading zatui kizanghleh pumpi sung-a nunna leh tha hongpia lungnoneute-zong siding ahihman-in virus-pen akhanloh nading-in kikhal (control) bek-a, kithat lo-hi. Hih-pen Zomi sung-a kipawlnalam kalsuanna-a zatding thuluan (theory) nihna ahihi.

Thuluan masa: Set leh Setza veelkiik lehang, Zomi sung-ah kipawlna kiphut to phangphang, bangmahpi-meellah omlo, angei-mah bangden cihpen atung-a “Makaai mawhsakna” leh “Nungzuui mawhsakna” nihte anihtuak-in maan-hi cih kei mimal muhna ahihi. Maantuak mahmah-hi, ahizong-in kipawlna akhantoh nading, akhangkhin gamlian nampite’ kipawlna bang-a aphungcin nading-in ahihleh anihtuak-in akisampente hilo. Makaai khat-in makaai dinmun-a om ahihlam kithei leh-a, mipi-in amau’ dinmun athei ciatding thupipen-hi. Vaaihawm siam leh siamloh hilo-in, makaai khat-in mipi’ suahtaakna alang, mipi-in makaaite’ suahtaakna alang — alang tuaktuak kizahtaak sak, kipibawl sak peuhleh khanlah nading omlo-hi.

Zomite’ kipawlna apiicing ngeilo zahdong-a angei-mah abang sakden thugui-pen “Kipawlnalamsang Setzate (KSZ)” aki-neihloh, aki-theihloh, aki-zatloh manbek ahihi. Gentehna-in, hih KSZ-te omlo-in kipawlna ka’ patleh, “Agangpi sumkeem., aniino sumsuut., apano thuzeekpi., apapi lungtah huhpi,….. cihbang-a paiding baih mahmah-hi. “Makaaite-in sum kiciantak zeeklo, zonglo, ama’ aituam-in zangh” akicih ciang-in, tua upa panmunleen tengpen naakphehsa ahihman-in, “Nang makaaite’ thuthu na-manding., thunial kuullo., gensiasia loding,….” cihte-tawh akihum ciang-in cikmah hun-in tua kipawlna sung-ah set hagialte kituak tak-in leh hoihtak kipeii thei ngeilo dinghi.

Kipawlnalamsang Setzate aki-theihloh, aki-neihloh, aki-zatloh, aki-awlmawhloh man-in kipawlna bangzahta-in aki-phuh denkeei hang-in angei-mah hiden lel-hi. Tuabang-in minam hualpi kalsuan ahihna-mah ki-bulphuh ahihman-in a-omsa pawlpi-lah thupisim peuhmahlo, thupisim taakding salo, akiphut thakte-lah napniit vetlo, zahpihlel cihdaan-a khuasak-pen ngeina (culture) khat bang-in minam sung-ah po/hing khinta-hi. Tua hi-a, kipawlna-ah makaai khat acihtak teeltaal man-in bangmah lawhzo lo-hi (keimah mimal’ muhlehtuah taktak ahihi). Mipi buppi-in makaaite’ thu mangding cihbel apiang ngeilo thu ahihi. Thu kimangding cih buaubuau-zong dictatorship te’ lungtang ahihi.

Tua hi-a, thumang mekmekding, muanhuai gemgamding cihte hilo zaw-in, minam-in zialehtong, gamtatluheek, nuntaakkhuasak ahoihte ahoih-a amuh theih nading, asiate asia-a amuh theih nading, thuluan tungtawn-a sepsuahzia muhkhop siamding, ahoih lunggulh kimciat theiding cihte bek-in kipawlna cidam sakthei bekding-hi. Tualo-in, minam sung-a na’ muanpen khat keekkeek-in kipawlna hongphut zong-in angei-mah bangden dinghi.

Kipawlna kithupisim lohna-pen minam sung-ah virus khat hi-a, atung-a “ngeina khat hongsuak” I-cihsa mahbang-in amanpeuh, pawllehgual hoihkhom nei akisa peuhpeuh, maaitang singhawng belhngam peuhpeuh, dinmun-zong kitellopi-a makaai uutna peuh-tawh kipawlna, pawlpi hong kiphutphit maimah ahihman-in, atuabang ciatciat kithupiibawl nading a-om kilkel lo-mah hongsuak-hi. Hih virus-pen atung-a I-gensa mahbang-in that lehang mipihte ataangpi-mah naa-ding, sukhading, tangteel sihtan bangding…, ahihman-in virus thahsawm lohding thumasa honghi leuleu-hi.

That cihciang-in sisak, beisak, nungta nawnlosak cihna hi-a, tuabang lian-in atung-a minam lungpuak-pen kisisak, kibeisak pak theilo-hi. Angiim-a ngiimding hi naailo-hi, banghanghiam cihleh I’ ngiim beklehzong honkhat ngotsat pahding-hi. Akeugaw khinsa ciing-pen tuidiah lohpi-in kuai lehang ngottan, kitan phekphek-a, tuidiah masa lehang duai mahmah-in deihdeih-in kizen thei-hi. Virus-zong thahding ngiim lo-in, kamkaih letsiamding, akhanloh nading naakpi-a khalding ahihi. Hih khalna bangcibang-in sepsuah theiding I-hihiam cihleh ataangpi kithuzaaktuahna leh akhangkhin gamliante’ tawnzia thuukkan siamna honghi dinghi.

Tulaai khanghun-ah minam virus athat-nuam kitam simsim ahihman-in tua ngiimna aki-muiituum hunsung-in tua virus kikhal (control) manlo-in pun cihtak pung-hi. Virus-pen ‘khal’ I-kipat khitzawh bangtanhiam khatciang-in kitatsat sak khalehang ataw pan-a patkiik, apatna pan-a patkiik kisam denkeei-hi. Minam virus ‘khal’ kipan tani-ei ci-a I-kipat phet-a kipan zopsuak tohtohding, sihdong-a zopding ahihi. Virus Khalna zatui-pen hunmaan kuul-a, kitatsat hetlohding kisam-in, neekding aki ciangtan zah-bekmah, avaal/akisam omlo tak-a zatding akuul ahihi.

Virus khal ding-pen minam sung-ah tam mahmah-a, gualbaan sahkhuatuahna siamzil lo-in tuate I-khal sawmleh pingpong kisaat kihi dending-hi. Gualbaan Sahkhuatuahna Siamzil-pen Zomi sung-ah kithupiisim thei naai mahmahlo, behlehphung hauhna, phungcinna ciang-tawh kingam mahmah, hauhna ciang-tawh kingam mahmah dinmun kihilaai ahihman-in virus khalding haksalaai mahmah dinghi. Sumnei zawdeuhte-in lawmlehgual ahauh lawh laaina minam kihi ahihman-in sum tampipi akingah theihna siamsinna (engineering, business, accountant, nursing, mechanic, electronic,….) cihlam bekbek I’ tu I’ tate I-deihsak sawnsawn laai uhhi. Sum ciangbek kimu/ki-en thei dinmun-ah ki-omlaai ahihman-in minam virus-pen ama’ khan-in akhangkhang dingmah ahihi.

Minam I-khual ding-a, minam I-it dinghi. Tute tate’ siamsin nading lamzing-ah sumlehpaai bekbek mitsuan lo-in, Justice-tawh akizom Sociology, Social Science, Social Work, Socio-economic, Psycho-sociology, Psychology, Law, Criminal Justice, Social Justice, Politics- Political Science, cihte alungluut theih nading-uh’n thunthunding, haanthawnding, lungkimpihding, tuate bek-tawh minam virus kikhal zo bekdinghi ci-in lungdeih sinthu kahong sung-hi.

Zomi Pasian’ Thupha!

Zokhai

T. Zokhai ITNA-IN GUABANG HINNA-HI
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560