Zomi te’n bangteng kisam ihhiam?

Zomi te’n bangteng kisam ihhiam?

I minam a khantouh theih nangin leh minam picing khat i suah theih nangin a kitangsam tampi awm ding hi.Tuate laka tamlo cik gen mawk mawk dih ni;

GAM: A masa penin zomi te in gam kitangsam hi hang.Kawlgam ah gam i neih teisam hangin i theihsa mah bangin ei’ thuneihna kizang thei lo in kawlgalkap kumpi in ukcip hi.Tua ahih man in India gam ah ei gam cia i gen theih ding gamneucik bek kisam hi hang.Tua adingin theih tawp suaha malak toh zel huai hi.Political Safeguard nei lo minam pen a bei bei ding hi mawk hi.

HAUHNA:Tu dinmunah zomite in gam kician nei lo i hih man in hauhna kitangsam hi hang.Bang hang hiam cih leh tuhun teh hauhna in vaihawm ta hi.Mihau khat pen miten simmawh lo in mai biak zaw mah lai uh hi.Pawlpi, khaw sung ah mihau khatin aw nei zou mah mah hi.Mihaute’ adingin na khat peuh peuh baih hi.I teenna gam peuh peuhah gamsung economic a kilamdang sak zo dingin zomite hau mawk leeng kuaman hong simmawh thei lo ding uh hi.Mite’ hong simmawhna hang khat pen i zawn luat man hi.Nuntakna khuk(economics) ah pan lak huai mah mah hi.

PILNA:I mimal, innkuan leh minam a khantouh nangin pilna kisam mah mah hi.Tuhun teh pilna lo tawh mi kiban zo nawn lo hi.Pilna khang sem sem a a delh a delh kuul ta hi.Nidang ciang hun hong pai zel leh laitan nei lote’ khasum san nang tam nawn lo ding hi.Tuhun ciang eimite gamdang kinak pai mah mah hi.Ahih hang gamdang a tung tampi takten nasep hoih a ngah theih loh na uh pen laitan niam luat man ahi hi.Pilna pen hah kat huai hi, gam kician i neih loh zen zen hangin, i awmna gam ciat ah office nasem leh mi lian tampi tak awm mawk leng vaihawmna ei khut sungah awm kha ve ve ding hi.

KIPUMKHATNA:Ki pumkhatna cih ciang kithutuahna cihna zong hi kawm pah hi.Zomite pen pau tuam tuam zang i hih man in kipumkhatna ki sam phadiak hi hang.Bang hang hiam cih leh pau tuam tuam zang i hih manin mite in i kipumkhata i thahat ding hong hazat man un Divide and rule Policy cih dan te pawl hong zang nuam thei uh hi.Ki pumkhatna mah thupi hi, ki pumkhatna in hatna, gualzawhna ahi hi.

KIDEIHSAKNA:Ki deihsakna, ki itna, ki pahtawi siamnate thupi mah mah hi.Zomi leh zomi mah kideih sak ding.A lawhcing khat a awm ciang ki pahtawi siam ding, a talent te a meet bawl sem sem theih nangin thape siam ding cih dan te pawl hoih hi.Khat leh khat ki thupi simlo, ki el, ki haza cih khawng hoih lo hi.I hih theihna mun ciat pan midang dang sang in Zomi leh Zomi mah ki deihsak masa ding.
I minam, i khawsung, i innkuan a khantouh theih nagin mimal tung pan ki pan masa hi.Mimal khat kimin mawh paw ciat hi hang.

N.Pau Tun Thang
Mumbai, India