Zomi te leh Democracy ~ Pu Pau Za Mung

Zomi te leh Democracy ~ Pu Pau Za Mung

(Bird-eye-viewed Political Reminiscence) In Commemoration of The International Democracy Day

Thupatna: Ka zaakngei thu khatin, Sia KKC in Kawlpau in aa’-naa a kici kammal, Zokam tawh khiat(lek) ding a hanciam hi. Aa’-naa…, aa’-naa…, aa’-naa…, a tawpna ah Aa’-naa mah hilel ngeel mawk veh aw! ci, kici hi.

Tuabang keek mah hi ei!, Democracy khia ding hi lehang, a deihna, a cihnop na a laaigil, a laaingeek taktak ki bunhzo lo in, Zokamin omtheilo ahih manin, a tawpna ah, Democracy mah cihkik ding a himai hi. Ahi zongin, a cihnopna taktak bunhzo, baanzo takei lehang, a hihtheihna bang tawh aki khiat ciangin; mihonpi te’n, amau mahmah in, amau nopsak theihna ding, amau mahmah lungkim na tawh ateel( by the people, for the people and of the people) cihbang ciang tawh aki khiathei bek hi.

Aki lopthop bawl Democracy

WWII zawh ciangin Leitung Politics in, lungsim ki galdona(Cold War) aki pan hi. USA leh UK te makaihna tawh, West Block leh Russia leh Chinate makaihna tawh, East Block ci’n nam nihin kikhen hi. West Block te in Democracy bulphuhin Capitalism kici in, East Block in na leh vante bulphuh in, Materialism or Communism kici hi. NB:- Anua lam ciangin, East Block te Russia makaihna tawh Stalinism cih leh, China, Maozetung makaihna tawh Maoism cih nam nihin ki khen leuleu hi.

Hihbangaa namnih in aki khenna ah, mihing nuntakna dingin Democracy bulphuh, Capitalism in lawhcing zaw, mui bunh zawpek pek hi. Tuabang ciangin Communismte in, amau idealogy lah laih dingin thangpaih laakuh ahih manin, Capitalism te ell bawlna, eeng bawlna lungsim tawhin, Socialism Democracy, Liberal Democaracy cihbangaa ki pan, a tuamtuam in Democracy hong zaangkhai bawl, hong lopthop bawl, hong eengbawlgawp uh hi. Communism te in, Capitalism aki cihnop kei hangin, mihing nuntaakna dingaa a thupi belbel ahi, Economics tawh ki sai, Capitalism te idealogy vive zuih ding aki panta mai uh hi. NB:- China Communist Party Makaipipa, Mr. Deng Xiongping in, “ Zawhngeu’ meel, avom akaang in thupi kei; zusa a mattheih ding bek hi a thupi hi,” cita hi.

Tuhun deuhdeuh ciang bangin, a tungaa lungsim hawihlo a vomhlaite in, Democracy aki cih dinguh lah thangpaih lakuh ahih manin, Socialism Democracy, Myanmahnii Myanmah-haan Socialism Democarcy, Siikaansih daw Democracy cihbang ciang dongin hong ki lo, hong ki phuakta uh hi.

08-08-88, Kawlgam sung buai

Sitmaandaw(genuine)Democracy aki deihna hang tawhin gamsung buai ahong kipat ding ciangin, U Ne Win in a Thamadah za U Sann Yuh a awn hi. U Sann Yuh in Kawlgam ki ukna khalzo ki salo ahih manin tawlkhat khitzawh ciangin U Sein Lwin a aap hi. U Sein Lwin in zong, zozo ki salo ahih manin, Dr. Mg Mg a aap leuleu hi.

Kya-phiat Asozah(Interim Government)

Dr. Mg Mg huntak ciangin gambup ki ukna in, ki sia semsemin, ki sawngsaw-lawi gawpta hi. Tuabangaa ahih ciangin, gamsungin muanhuai nawn hetlo in, a uut a dahun ki gamta gawp hi. Ngawng ki tanh tawh, aki satlumh, aki dawwtlumh, aki thatlumh, a hingtanghaa aki haallumh tawh amun mun, aciangg cianggah ki hi kheokho in, nuntakna in lauhuai mahmahin, lungmuanna ding a om hetkei hi. Kong pua nangawn aki pial ngamlo ding zahdongin ki patau in, dip humhsa vive in ki om tawntung hi.

Tuabang aki hih laitakin, Tamadah Dr. Mg Mg in Kyaa-phiat Asozah(Interim-Government) phuan ding, ci’n thu hong ging hi. Tuabangaa thu ahong ginna tawh kizui in, minam dangte aa ka zaakkei hangin, Zomgamah, Phalam, Khalkhate bek hilo, ih sanggam, Sihzaangte mahmah nangawnin zong, gamuk na sungah bangci panmun lak ding cih, ki gingsa, gelsa leh ki sehsa bangin omzo uh a hihna uh nangawn thu ahong ginglai hi. Tua laitakin, Zomi a kicite ahih uh leh, bangmah ki genna omlo in aki dai hiithiat lel hi. NB:- Sanggam, Sihzaangte bang ki muangmah mahuh hi. Banghang hiam cihleh Dr. Mg

Mg Mg keekkeek bang, amau aipeeng bangphial liangin a ngaihsut uh ahi hi. Tuabang ka cihtheihna in, Maj. Cin Khua Mangin, a sihma in ahong genngei thu in, University a kahlai peekuh aa, Dr. Mg Mgte innkuan tawh aki theih zawhna uh, a inn banguh ah sungtum pusuakin akhing asa a neekngeina uh ahihna; tuabek hikei, 1956- Parliamentary Democracy ki teel tungtaangin, Pu A. Lun Pumin meekuang a luiina na tawh kisai in, thusia a neihna ah, Dr. Mg Mg Sitni in la in, Tedim ah hong pai a hihna khawng hang ahi hi. Maj. Cin Khua Mangin, Dr. Mg Mg bel, uncle bang ciliang hi.

Ki lung himawh

Tuabang khuahun sia mahmah in aki om laitakin, University a kahlai aa Khah-sah-zah( University Chin Literature and Culture Committee) aa a makai ngei, Putaang Nang Lian Thangin alawm agual ngeite tawh ava kimuh na ding; midangte zia leh dan va en aa, ei Zomite zong bangkhat peuhpeuh ngaihsun in kipat ding vaihawm kul ahih na ka gen hi.

Amah zong a lawmluite ahi, tulaitak aa Dr. Lian Hmung Sakongte tawh va ki mu in, CNU(Chin National Unity) hong phuanuh hi.Tua laitakah kei, Central Committee ah Treasurer in hong seh baanuh ah, Tedim, Phalam, Haka cihbang, Township tawh ki zuiin CNU Section in aki khenna ah, kei Tedim leh Tonzaang Township Section ah Chairman dingin hong sehuh aa, Putaang Neng Hau Kimh, Secretary dingin a sehuh hi.

NB:- Tua hunlaitakin, hihbang aa Naingngaanzee ki pawlna phuatna in, nasepna (kumpi nasem ki hi laitak), neih leh lamhaa ki pan nuntakna, luang ki khaamaa aki sem ahi hi. Banghang hiam cih leh Mahsahlah kumpi in tuabang ki pawlna aki phuat lohna ding, ngaattakin a kham man ahi hi.

CNU (Tedim Section) Hawm leh sepkhiatna

A khatvei na sepkhiatna

A masa bel ki khopna, Pasodanaa Pu Thawng Do Thang’ inn( a masa in, PZMte’ inn) ah ki bawlin, mi 70 val kikhawm hi. Mihonpi ki lawpthei mahmahin, tha ki ngah mahmah hi. Ki lawplua liangin, pawlkhatkhatte bangin, avaal akaan, a uanglua in hong ngaihsun uhaa, kumpite lehdo ding, kawi ah luum, kawi ah teii, kawi ah thau ci’n, gamsung beel dingzah dongin, hong dingin, khuttum zialin thu ahong genuh hi.

Chairman pa in, tuate a khohna ah;

Tua laitak ih gamah ki ukna kisia manggta ahihna; ih nuntakna in muanhuai hetlo, ciktak ciangin ih si kha tamh, cih bekbek tawh aki khuasak lai takin, ei leh ei ih kihuut, ih kikhual, ih kivaanna dingaa CNU ki phuan ahihna; Amau cihbangin, kumpite lehdo in langpan in, gamsung bel ding ki himah leh zong, tua in ki naakkhialh lua mahmah ding ahihna;

tuabangaa ka gen thu in ngaihsut hak hetlo ahihna; ei sangaa a pilzaw, a siamzaw, a hauzaw, a lianzaw aa, amun agam mahmahuhaa kipan, singkung lopaa, leitangh leh tuite, duihte ahawih zaw pekpek nate in zong, kum 40- valbang kumpite na leh do in ana langpan uh hangin, tuaciang dong zozolo bek thamlo, a inn, a lo, a neih a lamhteng khempeuhuh vut leh vai suakin, a minam mahmahuh zong a mangg ding a hihnate aki ngaihsut khialloh khak ding;

Ei gamah ankhing ki khamhlo, tuabang mival(zin leh leeng)te ih piak ding gengenloh, eimau mahmahin zong an ki kham ngeilo baanah, tuabangin gamsung beel ding hi lehang zong, ih bukna ding duih hawih, sawllbawwk gina zong omlo lai ahih nate zong aki ngaihsut khakloh ding lung himawhin gen ahihna;

Tuabang bek hikei lai, a lungsimuh, ei aa bangdan hi palpallo, picing, khauh, kho, sak, kip mahmah lai uh hi. Tuabang ka thugen tawh ki zomin ka zaakngei thukhat tawh ka behlap in ah;

1961- kumin, 2nd Chin Rifles Bn, Patein ah ka paileh; Coy khat gamkuan ahong tun uh ciangin a thugen uh ka heemzak in;

Gamsung beelte khua khatah lut cih a zakuh ciangin ava delhuh leh, a thu ngahna bangun kuamah na omlo ahihna; khuamite a baandot uh hangin kuamah peuhmah ki dongh theilo in iimcip bikbek uh ahihna; a cihna dinguh a theihloh ciangin, inn nupi ommuang khat a dotuh leh tua nu in zong theilo mah acih veve na; Tua ciangin, tua nupi nu sitbawlin, lauthawn, sat, akhut a nunglam ah lehhen, sing tungah khai in abaan abaanin a situh hangin theilo mah ci veve. A thusitte in zong a cihna dinguh a theih nawnloh uh ciangin, akam panin tui athun uhleh, a gil vah hanhhanh in gennuam tuanilo lai; tuabangta tawh a kampan tui a thunthun uh hangin asih dong mah gennuam tuanlo hi, ci uh hi.

Zomite in gamsung bel ding hi lehang, adangdang gengenloh, ih lungsim mahmah muanhuai, gina hetlo ahihna; A tungaa nupi nu banglo in, MI, SB2, Sahtunglung, Palikte in thu sit zong hinai beeklo, thu ava ko, ava puak dingte bang ih hilai hi. Ih lungsim mahmah picing nai hetlo hi. NB:- (a). Tuatungtaangin khauhtakin kholo hileng, nih leh thum bangin gamsung abel
takpi ding uh ahi hi. (b). Tua lai aa 2nd:Chin Rifles aki cihte in a nidangaa bang hi nawnlo,a min bekbek mah hi’n, a CO pa aa ki pan, Officer te zong Zomi om nawnlo, a sia leh a nau
taang pawlkhat bekin Zomi a hilai uh hi.

A nihvei na sepkhiatna

Hih ki khopna zong, a masa aa mun mah hi’n, mi 60/70 ding hong pai in ki lawpthei mahmah hi. Ahi zongin, avaal akaanaa ngaihsutna a neite in Chairman pa meidawii lua ahihna; hawwmthawhhuai ahih manin a panmun pan in a khawlna dingin a gen hangun kuamah in a sangzo kei hi. NB:- Kei bel, ka meidawii kei hi. Ahi zongin, bangmah thu gina lopi hang tawh in ka gul sih nuamkei hi.

A thumvei na sepkhiatna

Daw Aung Sann Suh Kyi in Shwedagon Zianpiandaw aa a thu genna ah, Zomi nam puan silhin ateek akhang, numei naupang donghtakin,ki gualsa in aki paitaak leh, mi tamlua ahih manin mi honpi lakah ki awkcipin ki cimawh dektak hi. Aki sihsuah ombuanglo in ki suakta mialmial hi.

A livei na sepkhiatna

Gandhi Hall ah, Zomi honpi ki kaihkhopna(Assembly) khat ki nei hi. Tua laiah, Zomite lawpthei mahmahuh in mimal in 600-700 dingbang hong pai uh hi. Pu A. Lun Pum aa kipan Zomi Wazianh Naingngaanzee tama lui tampitak zong hong pai uhin, Democracy tawh kisai thu ki gensak hi. Thu hawih, thupi, thu manpha tampi tak ahong ki genna ah, Pu A. Lun Pumin in;

(a). Abei sa hunin ah, Myanmah Laanseen Party in, Socialist Democracy dan tawh, Hlutdaw kikhopna khatah, a simtham aa mekhiatna(Secrete Vote- button system) tawh thu khensatna aki neihna ah, Hlutdaw Kusale nihin kankuatna button(a san) a meekuh leh a zingciangin Hlutdaw Kusale nih Hlutdaw ah, ki paisak nawnlo hi.

Aki kaansim leh, azaan aa kankuatna button a meekte nih ahi hi. Tuate in, Phalaam panin, Pu Ngun Hluai leh Haka panin( amin theitel nawnlo) khat ahi hi. (b). U Nu hun, Parliamentary Democracy lai in, gambup biakna, Naingngaandaw Baa-taa (State Religion ) ding vai Parliament ah aki kupna uh ah, U Nu in Kawlgamah Kawlmi tampen ahih manin Buddist mah Naingngaandaw Baa-taa in aki bawl dingin thu asunh leh, Capt. Mang Tungg Nungg (Rtd:) in zong dingto pahlianhin; Kawlgam sungah Buddist in tam pen ahih hangin, Buddist biakna in, India gampanin hong pai ahihna; Christian in lah Western Country panin hong pai ahihna; tuate khempeuhin gamdang biakna vive a hihna; Kawlgam sungsuak biakna asit taktakin Dawibiakna ahih manin, Dawi Biakna in Ngaingngaandaw Baa-taa a suahna ding, kuamah awlmawh hetlo, hangsan takin asuu-tuan ahihna; ahi zong in tua tawh kisai in bangmah thu ki sitna, thu ki dotna, azee kizuuna omlo ahihna; tua in Siitmaandaw Democracy ahihna hong gen hi.

A ngavei na sepkhiatna

18-09-1989 ni in, Pu Khual Za Kham’ innah meeting aki bawl laitakin, Sr. Gen. Saw Mg. makaihna tawh galkap in, Naingngaandaw Aanaa la ahih manin, tua ni in bangmah thukhensatna cihbang ki hih manlo hi.

Tuama in standing order te baanah, galkap kumpi in, mihonpite a khallna tawhin, mi 5- sangin a tamzaw kikhawm theilo ding cihaa ki pan, upadi atuamtuam ngaattakin, behlapin a suaksak lai hi.

Kei zong, meeting ki bawlmah leh zong, a upadi uh aki palsatkhakaa bang mahlo tawh aa aki awkkhak ding lau ka hihmanin, kei kep CNU tawh kisai lai teng khempeuh Secretary pa ka khakaa, a thu zong, ki cingtakin ka telgen hi. Amau tuabang kawmkal ah ahih nop veve uh leh zong amau thu ahihna ding ka vaikhak lai hi.

NB:- Kei tua ni in, phuu-khong natna tawh immergency in, BMH-2 ah sunkhat leh zankhat vilvel drip ka kithun hi. Tua ahih manin, tua a nunung bel kikhopna ah ka paithei kei hi.

Mipi in ka vai hong theilo uh ahihmanin, meidawii lua kisa aa a ki tawpsak dinglau aa a pai ngamlo, tua ki khopna a peel bangdan in hong ki genlai hi.

Thu khuphna

U Nu hun lai aa, Parliamentary Assembly ah, Capt. Mang Tungg Nungg(Rtd.) in a thusun, Dawi Biakna, Naingngaandaw Baa-taa (State Religion) suaksak ding, a ngahkei hangin, tua hunlai aa Democracy in Siitmaandaw(genuine)Democracy taktak ahihna hong ki langsak ahih lamtak, teltheihna in ih nei hi. (Excerpt from Pau Za Mung’s Memoirs)

Theihsakna

Hihbang ZOMITE LEH DEMOCRACY a kici in, Zomite tawh aki sai khempeuhte huam ding hi, aci ka hikei hi. Keimah bangin, kei aa tawh aki banglo, a ngaihsun, amu, athei, atel, atuak, athuak, asinh a om dinguh hi. Hihin, keima hihna tengbek ahong suaksak ka hi hi. Pu Pau Za Mung