Aman kiam semsem mihing pumpi
Mihingte i man neihna ni khat khit ni khat kiam hanhan hi. Pumpi cilesa hoih semsem mannei semsem cih om theilo hi. Nidang lai in melhoih a minthang vangvang kineihsiam numei (actress) khat kiphawk thakna a ngahsak thupiang khat om ngei hi. Nungak melhoih nu pen a lawmngaih pa tawh hong kitengin kamsiatna tawh a sawt lo-in a pasal in sihsan citciat hi.
A melhoih mahmah lai ahih manin, a it, a ngai tampi om lakah a minthang kineisiam pasal (actor) melhoih pilna nei banah sumlepai hau khat in “hong teenpih tapeuh in” ci-in Khamhai ( Golden cup) khat tawi-in va ngen hi. Nuthawi melhoih nu in sangzo lo-in na nawlh hi. Tangvalpa zong lungkia lo-in va paikik a, Ngunhai( Silver cup) khat tawh teenpih ding va ngen leuleu hi. Nuthawi in kei ka melhoih lai lel hong deih tampi om ci-in nawlh leuleu hi.
Tangvalpa zong lungkiatuan lo-in a thumveina Sumngohai( Brass cup ) khat tawi-in hong teenpih in va ci leuleu hi. Nuthawi in a nget masak lai sangin, a man tawm semsem tawh a kuan tangvalpa hong tawnggawp hi. “Nong paicil-in Khamhai nangawn kong sanloh bang dinga, atawmman semsem in hong kuan na hi hiam? Nong simmawh bawlna hi, zumtheilo na hiam? Hi bang zi nget kua hoh ngah ding na?” a cih leh; Tangvalpa in “nuthawi aw, kei pen pilna nei hing.
Na pumpi a man kiam semsem tawh kizui a hong ngen ka hi hi. Nang pen ni khat khit nikhat na teek semsem zaw a, na moi semsem thei kei hi. Tua ahih teh, kong tawi vante zong a masa sangin, a nunungte in manneilo semsem ahi hi. Tua mah bangin nang pumpi zong nikhat khit nikhat teeklam manawhin aman kiam semsem zaw hi,” acih leh nuthawinu zong thakhatin a om dan hong kikhelzo phialin, kiphawk thakna khat hong nei thei hi.
Tangvalpa in genbeh lai a, “na kihoihsakna huhau in na lungsim kiphasak luakha a, thu hoih thupha na ngaihsut khaloh ding, na hoih, na pha nasep khakloh ding kong dahpih hi” ci-in ciahsan hi.
Tangvalpa thugen mah bangin nuthawinu bek hilo, laisim nanglekei zong nikhat khit nikhat kiham semsem hi. Nisim a i thuak gentheih haksatna, khualum nisa kapna, lungkham sinkhamnate in hong zawm sakin pumpi man a kiam semsem mihingte i hih lam kiphawk huai hi.
Ih kizattheihna hong kiam semsem dinga, i pil i siamna, i melhoihnate hong kiakia ding hi. Tomkal nuntak sungin lungsim pha tawh kimlepam a etlawmsak i suahzawh nading uthuai kasa hi.
Pasian thu um eite in a kisiathei i pumpi Pasian minthan nading i zatkhak leh tawntung i kha nuntakna man khangin nosuah semsem ding hi. Hih bang lametna nei i hih manin Pasian adingin hanciam huai mahmah cih zong behlap nuam hang! Hih Thute Manpha Sa Lua Ni Teh!
Comment piaknop aomleh...