Suangtang Nga ~ Hau Za Cin

Suangtang Nga ~ Hau Za Cin

“David in Goliath a dona dingin ‘Suangtang Nga’ la hi” ci in a gen khit ciangin mipi in aam mahmah tase leng hun om nawnlo, a zawma kikhawm dingte hun hong tungta ahih manin tawpna bawl kul a, mipi in khamlo leh khialah pipi in mangpha kikhak phot hi.

USA pek pan Mikang te nangawn in a muan uh, zat taak ding hi, zat theih ding hi ci-a a muan man vua a nupa vua hong leng vengveng a Master Degree student te Facilitator dinga hong pai Rev. Dr. J.M. Ngul Khan Pau leh a zi Nu Lucy Dimnu te tawh Guwahati a Zomi om khempeuh hunzatna nuam kisa mahmah hi. Laphuakpa khat in, “Tua lungdamna Thu hong puakte khe etlawm si e” acih bangin tua ni a Gospel Lungdamna Thu hong tangko a, Christian nuntakna picing taka kiseek dinga hong Thuhilh, Hanthawn i Siate khe kilawm zen si e.

Tua ni Guwahati a Zomi kikhopna om khempeuh mun khat ah kigawm in i Siapa thugen leh thapiakna kingai dimdem hi. Tua mun ah Pasian in Zomi hong laptoh ulian tampi i mu hi. Income Tax Department ah North East India ah a lian penpen Pu Thiauzakhup om a, Telecom Department ah North East India ah a lian penpen mah Pu Gin Khan Chin om leuleu a, Indian Railways ah ulian Pu Dozathang zong om hi.

Ulian leh upa muan huai tampi lak ah Zomi te kikhamuang mahmah a, ZCF India Consultations May 2009 a kineihna ah a lapi uh TOPA LAPTOH ZOMITE (by Kapno) pen dik kasa mahmah hi. Minam dang lak ah Pasian in Zomi te a niam lamah hong koihlo in a lian lam, a tunglam, a bul lam ah hong lamsang a, hong domto in Kumpi za ah hong koih takpi ahih manin hong bawl Pasian hangin i angtang mahmah hi.

Shillong ah sangkahpih leh ko tungah ka u te uh Pu Romuan zong u lianpi in na tu a, a sawtlo in amah zong a lianpen hong tung thei ding ahih manin lawp-huai in limci mahmah hi. Bank Officers, NGO officers, Librarians, Managers, Businessmen, etc. tampi a min uh a kigen khin zolo hon khat omte zong Topa hong laptoh vive hi a, i lungdam hi.

Zomi hih ki angtang mahmah hi.

Sia Paupu (ahih kei leh mikangte cih dan in Dr. Pau) pen North East India ah Tuiphum Pawlpi kipawlna Council of Baptist Churches in North East India (CBCNEI) phualpi Guwahati ah General Secretary full time in a sep khit ciangin Fuller Theological Seminary, Los Angels, USA ah kumkhat sung Zomi Diaspora research bawl dingin a pai ahi hi. Pasian in hong thukimpih leh ama research pen laibu in hong bawl dinga, Zomi te adingin a manpha leh kepcing taak laikhat hong kibehlap ding hi. Kumkhat a cin zawh ciangin amau Colorado Springs ah kumkhat sem ding uh a, leitung mun tuamtuam ah Laihilh in zin kawikawi ding hi. Zomi khat hih banga Topa in hong lapsang sak lungdam mahmah hi.

Ama tangthu a sangkah laia a siate leh amah a theician uliante in a gelhna ka sim khakna ah, ama mizia pen humble, honest, committed, …. (kiniamkhiat, muanhuai, citak, …..) hi ci uh hi. Tungsiah leh siate in tua banga hong muh ding hamphathuai kasa hi.

Aman, tua ni a Guwahati khuapi mun ah Zomi kikhawm te mai ah a thugenna ah “Pasian in David pen Goliath zo sak ziau hilo hi. A zat ding ‘Suangtang Nga’ tawmsak masa hi. Tua suangtangte pen a zol kiuhkeuh hilo hi. A ham phiatphuat, a kizang ngeilo, a khawk liplep hi, kici hi,” ci hi. Bang hanga Topa in David tua bang suangtang nga tawmsak hi ding hiam cih a genna ah Pasian in a mi zat dingte a zolsa bekbek hikhin lo a, a zol dingin a sektawm zong om hi, tua suangtang nga te mah bangin.

Suangtang zollo i cihte pen i Christian nuntakna ah haksatna tuamtuam i tuakte hi thei hi. Tua haksatna khempeuh damdam in hong kihualhual dinga, hong zol dinga, hong zattheih dinga, a manpha nasepna dingin hong kizang ding hi ci hi. Haksatna a tuaklo Christian omlo hi, ahi zongin tua haksatna pan a kizolsak kikte Topa in zang hi.

Siapa USA a tun kik ciangin Tulsa khuapi a Zomi Nam Ni ah thugen dingin kisam ci a, tua laiah zong hun nuamtak leh manpha tak a zat ding ka lamen hi. Aman a genna ah, “Tulsa pen Zomi te adingin Tullo hi, zong tullo ding hi” ci hi. Bang hang hiam cih leh tua khua ah Zomi 1200 (one thousand two hundred) khawng om in kiciamteh a, USA gambup khuapi ah Zomi tamna penpen hi. Kumlui in Sia King Mang te omna Portland ah Khuado va zatpih zo a, Washington DC ah Family Retreat neihpih khin in, tu in Tulsa hawhkik ding cih i zak ciang, a ban zong omlai dingin i lamen a, Topa in a maban khempeuh kalsuanpih dingin i deihsak a, Zomi leh Pasian min thangsak dingin hong zatsak semsem leh cih i deih hi.

Sianu in zong USA ah a tuah thu, a phawk thak thute leh ama muhna pan Zomite in zong mite gamtatdan pan i zuih theih ding thuhoih nono hong hawm a, kikhawm mipi in manpha kisa in, zaknop kisa mahmah hi. Topa in mailam a sauzaw a limcizaw ah kalsuansak ta peuh hen. Dr. Hau Za Cin (Phuitong Liim)