Zomi Cup 2014 hon pawi ah ~ Hau Za Cin

Zomi Cup 2014 hon pawi ah ~ Hau Za Cin

Zomi Cup a 5-veina kipanta ding cih ka zak uh ciangin ko zong Ninoni sima ka football suihte uh nuamsa semsem in hun hoih kimu leh ei zong va kihel thei leng utsi hange maw ka cici uh hi. Kumlui hong bei in kumthak 2014 bang hong tung silsel a, Zomi football lunglutte zong lawp semsem ta hi. Tua laitak in Zomi Association of Malaysia pan “ZOMI CUP 2014” kipanta ding hi ciin hong tangko ciaiciai uh a, ‘no zong nong uap thei uh diam?’ ciin hong dong uh hi. Ko zong, ‘ka utna bek uh ka gen uh hiven, hong kikum nungin a man thei teng hong pai phei le ung aive’ ciin ka ho uh hi.

Zomi Innkuan Singapore ah kimawlna lam makai leh Zomi Football captain Tg. Thangthang zong China gama mun leh mual nuam leh hoihpipi te a va et khit ciangin Singapore hong tung kik a, kiman thei ding ci ahih manin amah leh Vice-Captain Mumung makaihna tawh pasal 10 leh numei 1 ka va kihel thei uh hi. Nu Dimboih pen Pa Andrew Khual tawh mopawi bawl khin lian hi a, Malaysia ah mikang dana ‘Honeymoon’ (a ciil dawn) kawma football suihna ah hong uap hi in, ZIS football team min tawi in marching in parade ciangin hong makaih ahi hi. Pawlkhat Jan 30, 2014 niin paiphei masa in meltheih u leh nau kiangah na hawh masa uh a, pawlkhat Jan 31 ni zan in ka paiphei uh hi. Visa ngah manloh hangin hong paitheilo pawlkhat om a kiphawk mahmah hi.

Ka va kihelna hang uh bel football siam ung in kidem ni cihna hilo zaw in Zomi Cup ah kimawl dingte thapiakna leh kimeltheihna, unau khat sanggam khat bek hilo in minam khat Zomi hi hang cih va lahnopna ahi hi. Kilawmtatna tukpeng kidemna ah zong a zo ding kidem himasa lo in kikholhna, kilawmtatna hizaw ciin uang gen mahmah uh hi. Zomi ihih manin Zomite vai thupi ah va kihel hizaw ung. Amau lah nuamsa ko lah nuamsa hi ung. A taktak in kidem hile ung ko zong zo maithei, amau zong hong zo maithei hi. Tuate thupi masa kei, Zomi ihih mana gualnop hun nuam I zat a thupi pen hizaw.

Zan nai 2:30am in Zomi Zum ka tung uh a, tua sanah Zomi makai Sia Khoi Tuang in hong dawn in kong honsak a, lupna ding nuamtak hong bawlsak in nuamtak in ka ihmu uh hi. Zingsang khuavakpha a tho in kiallap ne dingin ka pai uh a ka nek man khempeuh uh Zomi makai Pa Kam (Pa Dai Kam) in hong piaksak leuleu hi.

Hampha kisa, lungdam gilvah takin ka kimawlna ding mun uh Kepong Ground tualpi nuam mahmah, tuili kicing gei ah tualzang nuam dihdiah ah huihsiang nung hiauhiau mun ka tung uh hi. Tua mun ah ka tun uh ciangin Zomi tukpeng suih siam vive team 43 pan paikhawmte leh amau a thapia ding nungak tangval, nupi papi leh naupangte na vak ziahziah uh a, a vekpi in mihing tul nih phial pha dingin ka um mawh hi. Zomi kimawl thei bekbek hizah om hizen maw ciin team 43 pan kimawl ding bekbek zong a tawmpen mihing 900 bang a pha khin ahi hi. FIFA World Cup nangawn ah kimawlmi tuazah pha ngeilo hi. Ko Zomi Singapore pan paite tawh team 44 a pha hizen ung ei! Guinness World Record a cing himawk dingin ka um hi, mailam ah hisang nasia zaw laitaw…

Zomi makaiteng team khat “914: ZOMI” puan silh tingteng mi 20 valte leh Zomi Innkuan Singapore pan kimawl ding khempeuh mipi maiah kigual in maan kizaih zihziah in tua khit ciang Malaysia football pan qualified referee te phitmutna nuai ah ka kidelh ziahziah uh a, ka khua-ul uh zong luang ziahziah hi. Nuamsa lua kisa a geia mipite bang awng ziahziah in World Cup zong hizah in thupi tuan ding hiam kici mai hi; nuam kisa in khua kiphawk tuanlo cihnopna hi! Hun masa ah 0-0 hi in tui siang leh tuivot cim kilkel dawn phitphet in ka suih kik leuleu uh leh 2-0 in Zomi makaite in hong zo uh a, Singapore te in mai kum ciang hih sang hong siamzaw lai ding hi ung ciin lungdam, maitai, lungnuam takin khut kilen in a thupizaw “Zomi Cup 2014 Hon Pawi” ka manawh uh hi.

Zomi Cup 2014 honna hun sungah Zomi makai Malaysia a omte in kizentak in leh manlang takin kimawl ding mi khempeuh a vekpi in 900 val dingte tualpi sungah kigualsak dimdem in, amau thapia a awng ziahziah mipite lam hong nga tiptep uh a, amau khua min ciat a tawi Zolia melhoih sitsette in maliah in, a nungah kimawlte kigual dimdem a, galkap tul tampi kigual ngitnget mah hong bang in Zomi hih nuam mahmah a, kikhamuang mahmah hi. Tua khit ciangin a khua khua in amau makaih Zoliate khuamin tawi ciat tawh tualpi kimvial in pai uh a, video leh photo kila ziahziah in mipi in khutbeng in kiawng ziahziah hi.

A nuam penpen kasak bel Zomi hizah tukpeng suihsiam a om uh ka mit teekteek tawh ka muh ahi hi. Tua bek hilo in amau a thapia dinga paite khempeuh in nuamsa taka a awng ziahziah zong thalawp huai in a kimawl hun khempeuh ah ka kihel ut tha bang suak mahmah hi. Khangno hi banga kimawl thei dinga siamna leh thahatna, lunglutna leh kihel theihna hunpha a ngahte hampha kasa a, angtanhuai kasa a, thupi kasa mahmah hi.

Zomi makaite in mipite muakna kicingtak a neih khit uh ciangin a honna hun Singapore pan hong paite hamphatna hong tangsak uh a, Zomi Innkuan Singapore President hihna tawh kei hong ngahsak in, lungdamtak, hampha angtang takin Zomi a kihel khempeuh in nuamtaka a zat dinguh deihsakna tawh khau teptat in Zothau lawng 7 lawn uh a, mipi in lungdam khutbetna tawh puak ziahziah uh hi.

Zomi i hihna tel mahmah ding leh nopna dahna ah, minam kalsuanna ah kitaisanlo ding, semkhawm, khut khat khai khe khat khai a kalsuan ding ban ah minam angtanpih ding deihsakna kammal pulakna hunpha hong ngahsak uh a, tua khit a kipan in Zomi Cup 2014 a kipanta ahi hi. Topa in Zomi Cup 2014 a kihel mikim adingin nuamtakin zangsak in thupha pia kim ciatta hen. Hau Za Cin (Phuitong Liim)