Zomi State leh Chin State huangkeek koizaw sawmding? ~ J. Thang Lian Pau

Zomi State leh Chin State huangkeek koizaw sawmding? ~ J. Thang Lian Pau

(I deih bang a piang ziau thei ding hile Tedim, Tonzang, Kalay leh Tamu township teng gawmin Zomi State phut ding, namdang teng hawlkhia ding maw…)

1948 kum khawng pan Chin Hill bup pen Zogam danin kituat a, Chin Affairs Council pen Zozum i vawh pah hi. Chin zong Zomi tawh khek theih hi leh i ci lai hi.

2000 khit teh Chin state pen Zogamin kituat nuam tak nawnlo leuleu in, Zogam i cih koi teng cih lah i gencian thei kei hi. Tua bek tham loh Chin cih min zakdahna leh Chin zadah lo teng minam tuama muhna ong thang henhan hi. A bulpi pen Laimite ong khantohna kihaza hi bel kha ding.

Khantoh sawmlo eimite in khantoh sawmte tawh kithuah i ut loh man aikeh kuamah kimakhelh lo ciat ding, cih ki-ut hi pen leh kilawm. Gendan tuamin, ei makaihna bek deih, mi makaihna zui nuam lo, makai kikhek zel ding zong pomlo cihna. Hih lungsim puak i neih manin ei sung zong pawl kiphelkhapna tawh kidim.

Tua hang hiam tunai pan Zomi State hiam Zogam State hiam demand nopna ong thang hi. Deih khang, kisam kei cihna hi pah bambam loin, demand dingin eilam i cing zo diam, a piang thei takpi diam cihte suut to dih ni. Side B lam mah en masa leng –

A. State Demand Vai

1) Zomi sungah makai taak ding leh nungzui taak ding mi ki-om pha lo. Makai siam i omloh manin makai kici khat peuh zuih ding kikihta, amau makaih danin ei zong makaih thei lel hang kici nuam ciat. Tua hangin ei sungah makaite kilem lohna leh pawl kiphelkhapna tawh kidim. Kineuseek ziauziau phamawhsak lohna lungtang i paai ciat sung i minam ading ma i lak sawm zong sawt tou lo ding, kitamkham kik pah ding.

2) Myanmar Constitution 2008 dungzuiin Tedim-Tonzang township niha Assembly Seat (amatt) 4 bek tawh State piang theilo. Cikha leh Khaikam township picing i ngah beh zong amatt 8 tawh zong cing zo nai tuanlo. State khat peuha council of ministers pen member 10 kiim ta ci leng hluttaw ah vaihawm ding om theilo cihna. Myanmar Constitution 2008 a kipuahpha zong Kawlte lak township khata milip om zah zong a pha zolo Tedim-Tonzang area sang State piak ding kilawmzaw tampi om ding.

3) Ei le ei kisik zo ding khop sum muhna (resources of state budget) a nei hi leng thu tuam, union kumpi i sum sik vek dingin Kawl ten state tampi bawl beh nuamlo ding. Tua banah state gol leh neu, milip tam leh tawm zuiin budget kia a, Chin state mah tungnungzaw veve ding. State i neih hang Laimite, Luseite pha zo tuan kei leng i thangpaihna pai suak veve kha thei.

4) Zomite khuapi i cih Tedim khuaa teeng ten innteek lungsim ong puak theih masak leh innteek tavuan ong cit uh kisam mahmah. Tedim khuate ngiat in Tedim-Tonzang area sunga om minam tuamtuamte ong huaisiam kul, deihsakna tak tawh a hamphatna ding uh ong ngaihsutpih zawh kul, belh taak muan taak a hih uh kisam masa. Tu tadihin Tedim in township nih bek puak zong lel lai bang, Tedim khuaa teeng Amatt natawm nei nai mello. State demand i sawmnaah Tedim-Tonzang area sunga minam pawlkhat in ‘ko kihel nuam lo’ ong ci leh vai teng kipelh lawh pah thei.

5) State khat pua zo ding laisiamna nei bangzah kipha zo ding. Kawlte mah ong lut gawp leh kilangbaai lua ding. Kumpi leh kumpi naseemte thuneihna a kikim phialphialna gamah Kawlte tung-etna, Kawlkam laanna, Kawlzia zuihna ong laang pah diam. Sum duh mahmah minam i hih teh state budget teng neksim kituhin a kikawk ding sawn omlo zah dongin kipai thei. State nei dingin i ki-fit hiam cihte i suut kawm kul.

6) Tedim, Tonzang baanah Kalay leh Tamu township ngiim ding ci leng, a sunga om minam tuamtuam teng i zol zo diam. Ei makaih ei khutnuaia lut a ut uh diam. I state bup milip a lang phial Kawlte ong pha ding ci leng i lunggulh danin vai i hawm thei diam.

7) Kalay-Tamu area dong ngiimin lawhcing ding hi leng zong Manipura Zomi leh Kuki in gam min ding a kituh bangin State Min ding leh Capital omna ding i kituh diam – Thadou-Kuki, Zote, Lusei, Laimi, Kawl leh ei ten, cihte zong suut kholh kul lai.

B. Chin State Huang Keek Vai

Zomi state deih khang cihna hi hi pah loin Chin state huang keek sawm masa leng a hoihzaw tam?

Gunkhawm sak siah i gam i cih baanah British ten zong ong uk sung Nagate teenna dong Upper Chindwin District na ci ngiat hiin, Nagate mahmah zong Ne Win hun ciangciang dong Chin Group maha a kituattuat uh hi a, 1948 kuma Special Chin Division ah ong lut khak loh uh teh a na lungleng mahmah in, U Nu zong kuppih zel uh ahi hi. Chin state capital a Kalaymyo i zat lai zong Kawl kumpi in zadah lawmlawm lo hi.

Hih Gunkhawm sak siah keek kilawm lo het lo hi. Myanmar sungah hih kaana i political demand ding thupi omlo kha ding. Aizong Chin state bup mah i pankhop lohin khiatna omlo ding a, a area sunga om a diakin Kukite leh Nagate bang i zol siam kul ding hi. Ei bekin keek i sawm le baih vet lo ding hi. Lusei leh Laimite bekin zong ong nangh zo lel ding hi.

Chin state huang keek lawhcing thei i hihleh kum bangzah hiam khit teh State tuam ngiim kik pan leng a lampi totzia ding hizaw thei.

C. Ngaihsut beh ding

1) Myanmar pen galkapte in thuneihna sut kik hun nei kha thei, aikeh State thuneihna (federal) behlaplap khazaw thei. Bang zawzaw ahi zong, politic sep siam thei lo i hi zong i minam khawsuakna ding taktak laisiamna hi. State i nei zong hamphatna thupi pen zum nasep teng hiin namdang teng sep ding pammaih. Pilna leh sumbawl mah hahkat ni, tou pen ding hi.

2) I lunggulh i demand-te tangtut nei loin Chin state mahah i om suak namel kitel lo. Chin state innteek lungsim mah i vom a, thuneihna i ngah zawh nang mah hanciam ni. State tuam i ngah zenzen zong supna omlo ding. Namdang muhdah langbawl nei kei ni. Demand i nei zongin namdangte huat theih dingin gamtaang lua kei ni.

3) Chin state nungngatsan kha si, i mailam lah nawt thei tuan kei leng kihamsia lua ding. Ngaihsutna nam tampi nei kawmin kalsuan ni.

4) Khangthu, pau, ngeina, teenna dungzuiin Kawl ten ei pen Chin pan minam tuam ciin ong pom nuam ngei lo kha thei, aikeh Chinte in state nih a neih ding kilawmsa lo kha thei.

5) Zomi state, Zomi huang keek i cihcih kaalin Tedim-Tonzang area eu nuama gamlim gitgit zong a omlam phawk ni. Keek sangsikin toizaw tektek thei ahih theihnaah pilvang ni. Ei laka minam tuamtuam om teng beek huaikhop sawm ni, amau phattuamna ding zong seppih ni, belhtaak suah sawm ni.

6) I minam makai nuam ten Manipur leh Mizoram beekah kha khat ta bek ahi zong thu sin kawikawi phot ni. Myanmar in India democracy system et-kaak pen hi. Laimite leh Lusei ten Mizoram model zuizui ta uh hi.

7) Ei bek in thunei thei den ding utna, ei bek makai hi thei den ding utna, ei bek teelcing hi den theih ding utna tawh huang neuseek i sawm sang midang tawh i kidem zelna leh midang i zawh zel theihna pen politician taktak i hihna hizaw ding hi. Quota, reservation dan pianpiante lunggulh sawm kei phot ni. J. Thang Lian Pau