Hong hopihpih Se

Tangthu tomnono pawl khat tawh thala to zel ni. A nui nuam peuh nui, a
heh nuam peuh heh, hi a sa ten hisa, thupi kei a ci ten cici
lel….cihdan hi sak ni ee.

Pasal khat in kau kikhung, kanteh hong kan hi. A kan ding simin a awng
gawp masa in hong kanin kanzolo hi. A nihna ah awng gawp teitei in
hong kanteh hong zo dektak hi. A thumna ah awngsa mah in hong kanleh
kanzo sam hi. A kan zawhna pen a awt gawpna sungah omlo in a Tha hatna
sungah om zaw hi.

Tangval 5 bangin Nungak melhoih khat hong het uhhi. Tangval 4 te
ciamnui in om ngeingai uhhi. Nungak nu ngaih theih dingin om ngeingai
dan uhhi. Khat pa pau ngei mahmahlo ahih manin Nungaknu in nang zong
hong pauzel asamve a cihleh Tangval pa in ken Zuau gen theilo cih tawh
dawng hi. Nungaknu in zong amah bek hong en thei pen pah hi. Kam
tamman leh kam tawmman hilo in Nungaknu lungsim sukha dingin a pau
theihna sungah maipha ngahna om hi.

Samson thahatna zong asam ah om hilo hi. Pasian in tanken, hih ken
acih thu amanna hangin Thumanna sungah Thahatna om hi. A samin thahat
sak hilo hi. A hatna Pasian sungah om hi.

Abraham zong Thupha a ngahna dingin Thumang photphot hi. Mual tung lam
apai manin, a Tapa a piak manin Thupha ngah hilo in Pasian tungah
thuman ciampello ahih manin Thupha ngah hi.

Pasal khat in Nungak khat ngai mahmah hi. A hi zongin itna thu leh
ngaihna thu gen ngamlo hi. Nungak nu in zong a ngaihlam thei in aman
zong hong ngai hi. Ki gen ngam tuaklo in om uhhi. A tawpna ah Nungak
in tangthu khat gen hi. Ngasa khat ih matnop ciangin ih matnopna khat
peuh Tui sungah a lut mateng Ngasa ki man theilo hi. Tui koih kha
ngamlo in a kimtengah ih om om hangin ki man kha ngeilo ding hi
acihteh Tangval pa in a deihna hong telpah ahih manin a tawpna ah hong
ki it thei uhhi.

Nisim hunsim in nang hong ki-itna, hong ki ngaihna, na thahatna,
thupha na ngahna, na pilna….cih bang tuamtuamte Satan in koi pan
hong pai hiam cihtawh hong hopihpih hi. Pasian kiang bek panin hong
pai hi icih theih keileh a kip ding khat zong omlo hi cih phawk huai
hi. Ze-etna in ni simin hong nawksuk hong nawkto mahleh Jesuh in,
“Bang hangin ihmu na hi uh hiam? Tho unla ze-etna-ah na pukkhak loh
nadingun thu ngen un,” a ci hi. Luka 22:46