Zomi Political Orchestra ~ Pau Khat Suan
Orchestra ah tumging kibang lo tampi kitumkhawm hi. Anam kibang teng tukhawm uh a, a kihual teng kinai in, a ginngaih zawdeuh teng anung ah om a, a zepna namte apang lam deuh ah om hi. A vek in amau’ a ciat, amau’ hun in tum khawm, tum diamdiam uh a, conductor in tua orchestra a en a ngai mipi nungngat in music tumte conduct hi. Mipi conduct dihdih lo a, mipi in zong conductor pa’ mai mulo uh hi.
Music van khatpeuh a-aw agin hoih lua mahmah in, a tumte zong siam lua ahihman in amah guak kitum vauvau in ginngaih valval deuh cihbang omlo hi. Amau’ hun in a ginngaihna a kisam zah ciang bek tawh kitum diamdiam, kitumkhawm liailiai hi. Tuaciang in music hoih mahmah ong piang khia theipan hi.
Nidang in Zogam ah concert a kibawl ciang music tumte in amau’ a ciat a kizadeuh ding deihmawk uh a, a aw na khankhan uh ahihman in amplifier controlte buai mahmah den hi. Music zong hoih leh kilem, kitawikim, ging sialsial cihbang om theilo hi. Gamlum cihtak gamlum pong lel a, lasate’ aw nangawn kiza zolo thei zen hi.
Tu ciangciang Zomite i nam leh gamvai ah i orchestra conductorte’n a mipi consduct pahpah mawk in, a musician teng in tum thei nawnlo uh hi.
We need a special talented orchestra conductor in our political constellation to conduct the orchestra, not the audience….
Tu-masiah a kipan tuni ciang pen a beisa hi a, kikhel thei nawnlo hi. Tu-a kipan mailam kalsuanna ding ah a beisa siksan in ma i suan ding kisam hi. A beisa ah khialhna leh thanemna cihte kimawhsak leh kizungkawkna a i zat sang in, mailam ah i khialh nawnlohna ding leh i thahat zawkna ding a, siksan a i zattheih ding deihhuai mahmah hi. A beisa hun pen veilam mit tawh enlo in, taklam mit tawh en ni.
I ngim i tup, i lunggulh a kibang ahih leh i kibatlohna a om phial lehzong lemtuah in, ki tuhteh sang khut kilet ding hanciam zaw lehang a, ngaihsutna a kibangte hualkhawm in, a kibanglote lemtuah thei lehang i minam vai kalsuanna thahat in mazang ding hi. A beisa ah a kibangte a golzaw leh a khauhzaw kidem sak kha pahpah hang a, a kibanglote kisai sak pahpah kha hihang.
Mimal khat a liat, a thupi’ man in minam bup lian leh thupi pah zolo a, khatguak tuam liat, tuam thupi nopna in mipi khantohna leh thupina khaktan in etlawmlo sak zawzek hi. A kilanglek kim dimdiam a thupina leh khantohna in minambup lian leh thupi sak ding a, i minam lian in thupi hileh mimal kim, mi khempeuh lian in thupi lel ding hihang.
Zomite i political orchestra a en a ngai mipi, midangte ading nangawn in a zaknop ahihna ding limtak leptuah huai mahmah hi. Pau Khat Suan
Comment piaknop aomleh...