Malaysia ah 66th Zomi Nam Ni thupi takin kizang ~ Hau Za Cin

Malaysia ah 66th Zomi Nam Ni thupi takin kizang

Zomi Association of Malaysia (ZAM) leh Zomi Innkuan Singapore (ZIS) kipawl in a 66veina Zomi Nam Ni thupi takin Malaysia khuapi Kuala Lumpur ah 20 February 2014 niin kizang hi. Zomi Nam Ni zang dinga hong pai mipi khempeuh 4200 val pha a, Zomi Nam Ni zatna innpi sungah kitalo ahih manin a pua ah mihing tul khat bang nisa nuai ah tu dimdiam in thugen ngaiin lasak ngai dimdiam uh hi. Zomi itna leh Zomi hihna a angtang mihing hizah in tukum Zomi Nam Ni kimuak thei ahih manin nakpi takin lungdam huai a, mailam ah hih sangin kitamzaw semsem dingin makaite in lamen uh hi. Tuni zong nasep ni hi kei leh mipi hizah sang nakpi takin tamzaw lai ding kici a, nitak lam nasep kuanding zong honpi khat om ahih hang innpi sungah mipi dim mitmet in tu dimdiam hi. Mai lam ah innpi (Hall) a golzaw, a lianzaw a om hiam ciin kizong kha ding hi ciin makaite in gen uh hi.

Hizaha mihing hong tam theihna ahang pen gam nih kigawm a i zat man hilo in Zomi te kipumkhat semsem man hi ciin makaite in gen uh hi. Kumlui Zomi Khuado laiin Singapore pan a pai ZIS President Pu Hang Khan Lian leh ZAM President Pu Hau Khai te kiholimna panin, “Mai kum Zomi Nam Ni zangkhawm leng hoihlo ding hiam aw” na kici kha uh a, tua kammal hoih khat in dawn hong suangin a nungthuapte in semto suak a tukum in hih bang vai limci a kineithei ahi hi. Zomi Nam Ni hih banga gam nih kigawma a kizat pen a khatveina hi ciin kiciamteh hi. Mipi in zuizo in sem ngap peuh lehang Zomi makaite in thu mu, ngaihsun zo, zong mukhol ban mahmah uh hi cih kilangsak hi.

Singapore pan Bus pi khat dimin Malaysia ah Zomi Nam Ni zang ding pai phei uh hi. Tuate hangin Malaysia ah om Zomi te thalawp in thapia a, tha ngahsak ahih manin mi tampi in nasepna pan ‘tawlnga’ pak in Zomi Nam Ni hong sim uh hi. Pawlkhat bangin ‘leave without pay’ la liang uh hi (nikhat sum ngah ding sangin ni khat Zomi pihte tawh hun nuam zat khop ding telzaw uh hi). Minam itna lian semsem a, minam zun nopna khang semsem hi. Malaysia gam sung bek pan hilo Singapore pan hong paite in Zomi Ngeina tuamtuam – Ton Lam, Lam Ngui lahna neia, Zolapi sakna zong nei uh hi. ZIS makaite in zong thugenna hun ngah ciat uh hi. Malaysia leh Singapore bek pan hilo in mundang, gamdang gam 4 pan zong hih Zomi Nam Ni zang dingin mi hong pai ahih manin thupisak diak a, tuate hong din uh ciang mipi khutbet ging ngaih penpen hauzacinhi.

Hunte nai 11:00 AM in kipan hi. Zomi a hong bawlpa pahtawina la: Pasian minthangta hen cih mipi dingto in kisa a, Zomi a hong bawl Pasian tungah lungdamkohna leh Zomi khempeuh adingin thungetna leh lungdamkohna Rev. Maj. S. Khup Cin Pau, Singapore in hong nei a, AMEN kici diamdiam hi. Zomi Nam Ni ah hong pai khempeuh muakna nasia takin ZAM President Pu Hau Khai in nei a, mipi in khut kibeng ziahziah hi. Nasep ni a hih hangin hong paithei tampi om veve a, hong pai theilo zong a tamzaw hilai a, amau omna mun ciat uh pan hong phawk mahmah uh hi cih hong gen uh hi. Zogam hong paal ciang Zomi Nam Ni in nasem in kuamah kuan kullo nawnlo ding hi cih hong phawksak hi. Hong kihel nuam, hong kihel theilote kiphawk in lungsim ah kiphawk mahmah hi.

Zomi Innkuan Singapore President Dr. Hau Za Cin in Singapore pan a hong paite maitang lahna a neih khit ciangin Malaysia a om Zomi khempeuh tungah hih bang vai thupi limci taka a bawl uh lungdamna thu gen a, nuamtaka Singapore pan hong paite a zindonate uh lungdam zong ko hi. Mailam ah hih banga bawl khop zel ding zong thupi a sak dan gen hi. “ZOMI THU” genna tomno tawh behlap a, tua sungah, “Zomi i cih pen kamphen kullo teng, ngeina kibang teng, Cimnuai a piang teng, etc cih bangin gen ding hilehang sun thapai in zong kigen khin zolo ding hi. Tua ahih manin Zomi cih ciangin Zomi hipah hi. A dang om nawnlo hi. Zomi cih ciang Zomi hi. India gam ah Zomi cih pen ko, na min dimdiamta hi ung. Noh tu’n na buaipih san uh hangin ko a kitel khinta hi ung. Tua ahih manin tu laitak, Kawlgam min kisimna ding vai ah zong “Zomi na kici un” ciin lai hong kikhak kei leh, India lam pan hong kigen tangtang kei leh lamdang na sa kei un, ko Zomi ka kitel zawh uh sauveita a mite hanthawn a kul lai ding lamuh thei nawnlo hita ung. Tua ahih manin kumpi in, i tenna gam kumpite in hunpha hong pia a minam min gelhna ding hun hoih hong bawlsak leh lunghiang hetlo in Zomi na kici un; mual ah i suak khawm liailiai ding hi. Hunpha zatsiam in Zomi ah pangkhawm in kigawm khawm liailiai ni. Tuni Zomi Nam Ni a thupisak mahmah khat pen ZOMI CUP ahi hi. Tuma kha khat sung tawntung Zomi min tawh na kikholhna uh thupi kasa a, na vekpi un champion vive hi uhteh. A gual tungtuangte lungdampih hang. A taktak in a kihel khempeuh a gualzosa vive na hih manun a thupi khin ahi hi. Zomi Cup ah na kihel limlim pen na gualzawhna hikhinta hi; nang a champion hikhin na hi hi. Tuni a Zomi Nam Ni sim a hong pai lak pan gam dang pek pan hong simte thupi kasa hi. Gamdang mun li pan Zomi hih san ah kisutuah khawm ihih manin thupi hi. Zomi Nam Ni lawhcinna dinga i sepkhopnate khempeuh a thupi hikhin a, i vek in a thupite vive ihi hi. Semkhawm i cihna sungah zong a lehsep ut om thei hi. Ahi zongin ‘langpanna a hatna mun ah gualzawhna zong lian a, a gah zong khumzaw hamtang hi.’ Zomi sungah mi thupi tampi a mai ah tu dimdem a, hong mitsuan dimdem uh ahih manin Zomi a minthangsak Zomi Personalities te i zahtak a, amau tawh i om ciang i angtanga, amau hong om man un i khamuang hi. Ka thukhupna dingah – the whole is better than the sum of its parts “Pum khat pen a kiphelkham gawmtuah kik sangin thupizaw hi, hoihzaw hi.” Zomi i cih pen hih teng kigawm Zomi hi cih sangin Zomi cih pen Zomi hi cileng thupizaw, hoihzaw hi. An invasion of army can be resisted but not an idea whose time has come ciin Victor Hugo in na gen hi. French Revolution pen a kinang zolo ding thupiang hi a cihnopna hi. Zomi huih nung in leitungbup a zelh laitak hi a, kuamah in nang zolo ding hi. Banghang hiam cih leh Zomi te hun hong tungta a, Zomi te khanglo in khantoh hithitna hun hong tungta a, kuamah in a dal zawh ding hinawnlo hi. Zomi hun hoih hong tunga, Zomi gim in leitung zel hi. Zomi aw, saipi pai in pai inla, khawl nawn kei in. Z: Zomite, hanlungciam khangto diam. A khangto diam Zomi te hi ciat dingin Topa in thupha hong piata hen. Satu Zomi. Zogam hong paal ding hi (by Lengtong Pauno la pan). Ka lungdam.” Mipi in cim hetlo in na ngai in lawp takin khut na beng ziahziah uh hi.

Zomi lasiam tuamtuam – Zero Band, Zomi Vocal Band, Manna Band, etc ban Zomi Education Centre pan Zomi Ngeina lam leh limcingna, lamna cihte tawh hun nuam takin kizomto deudeu a, a diak in Janet Lee in English leh Chinese la hong sak ciangin Zomi te vang hong pia in hong thupisak a, lungdamna lian diak se hi. Zomi Nam Ni pen Zomi bek hilo minam dangte in zong (i pupite gam pan, china gam pan cihnopna) zong hong uap uh hi. Zomi Vocal Band te in “Zogam Hong Ngai ung” cih la a sak uh ciang Zomi leh Zogam ngaihna hong puang semsem hi.

Tuate kizom toto kawm kal ah, a kingaklah penpen leh a kilawp penpen Zinmang thugenna hun ahi hi. Singapore pan hong pai lak ah Zinmang dingin a kicial Dr. Chin Khan Lun Guite, Research Fellow, National Technological University, Singapore zong kihel a, ama’n “ZOGAM ADING BANGCI SEP DING” cih thulu zangin nasia takin Zogam khantohnading i sepzia ding kidam hetlo in hong gen ziahziah hi. Amah a pianna Lamka, India ahih hangin tuni a hong paikhawm Zomi Nam Ni zang khempeuh tawh mi khat, sa khat ahihna gen masa hi. “Minam hihna kilaih theilo a, min tuamtuam in hong kilawh hangin i minam hihna kimangsak thei tuanlo hi. Gentehna in numei paktat khat a min khelkhel in mun tuamtuam ah kizuak taleh a numei hihna kikhel tuanlo a, a minam hihna zong kikhel tuanlo hi. Zomi i hihna pen midangte in min dang tawh hong gen uh hangin a bei hituanlo hi. Zomi leh Zogam khantohna dingin bangci sep ding cih thupi hi. Nasem hoih khat in minam minpha sak a, a sem hoihlo khat in zong minam minsia sak hi. Tua pen ngasa uih khatin ngasa bawm sunga ngasa khempeuh a namsia suaksak tawh kibang hi. Mawtaw kilhna khat kisia leh a mawtaw a siatsak mah bangin makai hoihlo khat in minam sung siatna tampi piangsak hi. Tua manin Zogam adingin na i sep ciangin – i gen bangbang sep kul hi. A gen baih hi, a sep baihlo hi. Kigensak le hang i vek in a gensiam vive hi ni. Ahi zongin a sep taktakk ciang a semzo kitamlo hi. Tua manin nasem dinga makai dinmun ngahte sepna neumuh kei ni. Gensia kei ni. Ei zong amau dinmun ah om leng sep taktak ding baihlo hi. Makai ciang a suak dingin mite in thu tampi, vai tampi na palsat uh hi. Hawmthawh kei ni, tawsawn in a nung uh thuapzaw ni. A sepzia hoihzaw i theih leh zong ei hun cianga i sep ding danin koih ni. Zomi makaite hawmthawh huai het tuanlo uh hi. Midangte makaite zong Zomi makaite zah hi deksuai tuanlo uh hi. Tua manin makai na hih leh makai sep ding sem in. Nungzui na hih leh zong nungzui nasep sem phot in. Nang makaih hun zong hong tung ding hi. Mawhpuak kinei ciat a, sep theih kinei ciat hi. Kizahtak tuah ding ahi hi. Mualpi leh Zulei in tungnun kituh hi, kici hi. Mualpi in, “Nang Zulei maimai in bang sem thei na hiam, kei mualpi in huih khawng ka nangzo a, ka tungah singkung tampi po hi,” ci hi. Tua leh Zulei in dawnga, “Nang hih tungtun na vut let thei hiam, singgahte na sukham thei hiam?” ciin a dot ciangin a hih theihloh lam phawk hi. Zomi khempeuh in sep theih kinei hi. Ei ngaihsutna bek ‘hi’ sa vilvel lo in mite ngaihsutna zong telsiampih ding kisam hi. Zogam ading a sem vive ihih manin i septheih ciat thasiallo ding hi hang. Minam bup in Pasian muang ni. Pasian na muanna pen na mipihte tungah na nasep ciangin kilangsak in. Na mipihte in hong muan ciangin na Pasian muanna zong hong tel semsem ding uh hi. Zomi khansau hen. Ka lungdam.” Mipi ading bek hilo, makaite adingin kam bek hi nawnlo, a kimuthei a sep khiatna tawh kalsuan ding, lakkhiata dingin Zinmangpa hong hanthawtna ah mipi daidide in thu kingai a, hi kisa ciat ahih manin kha pet teta kawm in khut kibeng ziahziah hi. Dr. Lun pen khangthak Zomi laisiam bek hilo in Zomi Innkuan Singapore ah Khangno makai zong ahi hi.

Galtaite a kem dinga leitung gam khempeuh kipawlna pan a kibawl United Nations High Commissions for Refugees (NHCR) te taangmi numei thum Mimi, Grace leh Yin Wei te hong kihelthei uh a; International Catholic Migration Commission (ICMC) pan zong numei nih Jacky Lee leh Santha hong uap thei uh a, Zomi te hong khual, hong huaina bek uh hilo in amau lungdam ni hong lungdampih ahih manin i minam ni hong thupisak tuam mahmah hi. Thank you Mimi, Grace, Yin Wei from UNHCR and Jacky Lee and Santha from ICMC for gracing the auspicious 66th Zomi National Day and encouraging us to keep, preserve and practice our Culture, Traditions and Community spirits. We are much encouraged and thankful for gracing the most auspicious celebration of the Zomi.

Pa Khup Khawm Mung, Secretary, ZIS in tu laitak a leitungbup a zel a sa vilvel Kawlgam Kisimna thu kicingtak in mipi theih dingin hong genkhia hi. Zomi cih pen gam mi in a kiciamteh nailo ahih manin914:ZOMI cih gelh ding patauhna ding omlo hi. Gamdang mi leh Rohingia te ading a koih pawl om cihte ahih loh dan hong gencian a, mipi patauhna teng hong bei pah hi. Zomi kici leng gammi hihna (citizenship, taizinta) khawng a bei pah ding a lauhna omte ahih loh lam hong lak hi. Code neisa pawlkhat in a omsa sangin Zomi mah ah kigawm lehang i mailam ding hizaw ahih dan zong hong gen a, kitelsiam mahmah hi. Zomi te pum khat suak, khe khat khai a, mual ah suak khawm liailiai dingin tutung mi kisimna pan in i hih theih tampi om hi cih hong pulak a, hong telsak a, hong hilhcian in lunghihmawhna tengteng hong gencian hi. A video mahmah tawh hong lak in, computer sung pan a kihih ding dan lianlian mah hong lak thei a, tua ciang min gelh ding dan, biakna gelh ding dan, minam gelh dan ding cihte a vekpi in muhtheih in (visual presentation) tawh hong thuahpah ahih manin a tel baih mahmah hi.

ZOMI CUP ah gualzawhna a ngahte leh kimawl a siam tungtuangte pahtawina a kineih khit ciang ZOMI CUP piak khiatna ZAM President in hong nei a, mipi in khut kibeng ziahziah hi.

Zomi sung pan party khat bek i neih te taangmi in Philip Khaipu in, “Zusa khat in a tanu pasal ding leitungah a hat penpen a zon leh a tawpna ah Zusa mah tawh kitengsak hi,” cih tangthu tawh Zomi te i kual vakvak nop hangin a tawpna ah Zomi bek mah ah kitung ding hi cih hong gen a, mipi in kitelsiam in Zomi simloh midang i suah nop hangin “Utong tangsa va-ak tang” bek i suak ding cih hong lak hi.

“Nang kua na hi hiam?” cih limlahna Zomi Christian Fellowship, Canaan te hong neih pen mahmah in mipi lungsim hong la in ka gei a tute bang a khitui uh lam zilzial hi. Mite in bang min bang minam hong ci zongin na hihna taktak na khek thei tuan kei a, na minam pen sum metngahna, hamphat ngahna tawh na khek thei tuan kei hi. Puan tampi silh thuah neunau bang hilel a, mite in na hihna thei nuam in na puan hong suahsaksak dinga, a tawpna ah na hihna taktak mah hong kipholak veve ding hi, cih hi. Lungsim hong vut in, mit hong tai sak a, kitel mahmah lel ahih manin Zomi hih ding a haksatloh dang hong theisak hi.

La makaite khempeuh in a maiguala tu teng stage tungah hong samto in, “Zogam lei aw sawt nawnlo ding” cih la, Zogam hong paal hun ding a sawt nawnloh ding muhna la hong sakpih khit uh ciangin Rev. Suan Cin Hau in hong pai mimal khempeuh tungah leh hong uap mite khempeuh tungah lungdam kohna gen a, tua khit ciangin Rev. Dr. Cin Sian Pau in thupha piakna tawh hunte khak a, nitak nai 5:30 P.M. in hun kiman hi.

Zolia leh Zotaang te in maan kizaih khawm in hun am mahmah uh a, ut mahmah lai taleng hun in hong ngaklo, a nuamzaw hunte i masuan hi cih bangin “Mai kum ciang a 67th Zomi Nam Ni ah kimu kik ni maw” ciin khitui mualtuang in ka kikhenta uh hi.

Topa in Zogam leh Zomi hong huai denta hen.

Hau Za Cin
Phuitong Liim
www.hauzacin.blogspot.com