Zomi Political Activities ah kihel bang nasep tenghiam?
Zomite Politiacian (Naingangyi tama) i cih le Politic (Naingangyi) cih pen i zak i ngaihsut teh a tuampi khat le Party MP mee kuang lui, Nam galkap sem cih te bek nasep dan in tuat mawk hi hang.
Politic i cih pen Nisim i nuntakna ah mimal kim in a kisem le kigen, kinuntak pih den hi zaw hi.
1. FB le social media, laibu le thuthang tuamtuam ah Zolai tawh lai na gelh zong Zomi politic activities hi. Zolai kemna kipsak hi.
2. Na innsung le na lawm na gual tawh kihona ah Zopau nazat zong Zomi politic activities khat hi. Zopau khansawt sak hi.
3. An nek tuidawn Vaimim gatam buhsih le aksa sipian, Tangho, tangcim etc.. an an limsa ngiat in na nek zong Zomi politic activities khat hi. Zomi hihna kipsak semsem hi.
4. Zola awi in Pasian phatna la na sak zong Zomi politic activities khat hi. Za la kem khat hi teh.
5. Na pawlpi ah Pasian thugenna lasakna le thungetna te ah Zopau Zolai na zat ngiat uh le Zomi politic activities khat hi. Zolai Zo pau na pawlpi un a kem a zuun hi uh teh.
6. Na tanu na tapa mopi mokhakna ah Zongeina mah tawh na sep zong Zomi Politic activities khat hi. Na innkuan un Zo ngeina kemcing na hi uh hi.
7. Zominam puan dum,Puan laisan le Zopuan khat peuhpeuh silh le zatna naneih zong Zomi Politic activities khat hi. Na mimal in Zopuan a kemcing ngiat na hihi.
8. Zomi NGO group khat peuh bawl Genthna; GZA, LZI, ZIUSA, ZBCA le WZC etc.. tawh Zogam le Zomi te tung ah nasepna zong Zomi politic activities khat hi. A omlo kipawlna i lametet sang in Gam le nam a ding na tampi semkhin zaw uh hi.
9. Zomi TV, Zomi Media ci in Zopau Zolai tawh Thuthang tuamtuam genna zong Zomi politic activities khat hi. I pau i lai tawh gamkeek na hihi.
10. Mikhang lai le namdang lai khat peuh tawh kigelh laibu, Zolai tawh nong letkik zong Zomi Politic activities khat hi. Zolai ah Pilna a kholkhol na hihi.
11. Hollywood, Bollywood le namdang Movies khat peuh Zolai Zopau tawh nong lehkik zong Zomi Politic activities khat hi. Video na sepna tawh gamkeek na sep sem na hihi.
12. Zomi Film ci in Fungku- Actuon movies, Love story, Missionary movies le carton movies etc khat peuh na sep zong Zomi Politic activities khat hi. Zo lai Zo pau thahatna note tung tampi kinga hi.
13. Zo la phuak Pasian la, Zawlla, Gam ngaih la, Nu itna la, Pa itna la, Khua itna la khat peuh nong bawl zong Zomi politic activities khat hi. Lungzuan teh Hong hehnem ding Zola nong guan hi.
14. Hawhna ciahna le lamkim lam kiang, na sepna mun te ah Zomi te tawh kimu kiho le Zomi hahsat tuak khat peuh huhna etc.. Zomi Politic activities khat hi. Zomi hihna nong ki angtang sak mahmah hi.
15. Khuado pawi, Zomi namni pawi bawl in annek khopna bek na nei zong in Zomi politic activities khat hi. I ngeina pawi en kem kei leng mangthang ding hi.
16. Politic sem nuam keng nacih ngiat zong Zomi Politic activities khat hi in, Zomi te hong thanem sak hi.
17. Zola sanuam keng na cih zong Zomi politic activies khat hi in, ka lungzuan ciang Ka ngaih ding Zola nong sak nuam kei hi.
18. Minam Galkap sem nuam keng na cih zong Zomi Politic activities khat hi in, Zomi Revolutionary movement hong mainawh mawhsak hi.
19. Minam le gam a ding sum pianuam keng na cih zong Zomi Politic activities khat hi, Zomi te sumtha hatna ding kiam sak hi.
20. Zola album leinuam keng, hong anna phum nawn kei un na cih zong Zomi Politic activities khat hi. Zomite La damdam in beisak tulsak thei hi.
21. Zomi tawh kithuah nuam keng haithei lua ci in nam dang lawm le gual tawh na kithuah zong Zomi Politic activities khat hi. A sawt lo in Zomi te mangthang sak thei hi.
22. Zomi Pasal/Zi deih keng Mikhang/ Nam dang zi/ pasal nei ning na cih zong Zomi Politic Activities khat hi.Zomite hong kithusim lohna khangsak hi.
23. Tedim/ Tonzang le na khuatual ah khualmi/ pemta khat peuh na simmawh na bawlsiat zong Zomi Politic activities khat hi. Zomite picingna le thukhualna beisak hi.
24. Nang Biakna upna pawlpi a hilo pawl dangte na langpang na ko bawlna zong Zomi Politic activities khat hi. Zomi sung ah updan sanzia kitelsiam sakna bei sak hi.
25. Nang tawh ngaihsutna kibang lo, Sep nop zia kibanglo mi/ kipawlna khat peuh thagum tawh langpangna zong Zomi Politic activities khat hi. “Zomi Unity in Diversities” i kibatlohna teng hemkhia in i kibatna ah kithutuak ni cih thanem sak hi.
26. Nopna dahna ah Zomi te Pawlpi kibat loh hang i kinoppih dahpih na pen Zomi Politic Activities hoih mahmah khat hi. Zomite kipum khatna le kilainatna ah hong thahat sak hi.
27. FB, Email le Online Social media ah migensiatna zong Zomi Politic activities khat mah hi. Zomite kiminsiatna hat sak hi.
28. Zomi MP le Nam vai na sem khat peuh khialhna na gen pen critics kici a, Zomi Politic Activities thupi khat mah hi. Zomi te Critic kibawl zadah leng a sawtlo in Dictatorship khut sung kitung ding hi.
29. Zomi kipawlna thak le pawlpi thak phuatna zong Zomi politic activities khat hi. Kipawlna tam semsem le na sepna tam semsem ding a, Zomite phat tuampih kipawlna a hi ding bek kisam hi.
30. Zomi khat peuh mavangna le lawhcinna ding langpangna zong Zomi Politic activities khat mah hi. Zomi te a lemlawh kha ding teng mailam suksiat sak thei hi.
31. Sep ding gen ding mahmah theilo neilo, Mite nasepna le pawlpi vai,mimal vai peuh tawh Social media ah Zomite i so vengvung det zong, Zomi Politic activities khat hi. Zomi te in Gam le nam na sepna neih huai zia hong kilangsak semsem hi.
A tung a i gen te pan a hoih le hoih lo khinkhai ngaihsun tek in I nisim Zomi Politic activities te a hoih theih semsemna ding mimal kim in hanciamna nei tek ni. Zomite in sep nei lo in I dai ommawkna in Sihna (Mangthangna) hi. Free Zoland
Comment piaknop aomleh...