Indonesia, Bali aom Mount Agung meimual puakkhamkik leuleu

Indonesia, Bali aom Mount Agung meimual puakkhamkik leuleu

Indonesia gamsung, Bali Island tuikulhtung aom “Mount Agung” akici meimual pen Tuesday (Feb 13) ni in khatvei puakkhamkik leuleu hi. Hih Mount Agung Volcano apuakkhap nunungpen January 02 hi a, tuazawh tawlkhat atawlngak khitciangin apuak khamkik leuleu ahihi.

Hih meimual puakkham vaitawh kisai in thunei ahi “Indonesian National Board for Disaster Management” te genkhiatna ah Volcano apuakkham nunungpen Local Time 11:49am hun ci uhhi. Mount Agung meimual panin atunglam asanna 1500 Meters bang sangto in vukkhu leh meikhu sahmahmah in kilawnkhiato ci uhhi.

Hih Mount Agung Volcano pen puakkham kiktheiding hi ci’n nung Saturday ni inzong kidopding in Level IV (Hazardous) aki tangko ahihi. Ahi zongin Tuesday ni apuakkkhap khitzawh tulaitakpen Level III (Standby) in ki ciamteh kikphot hi.

Hih Mount Agung Volcano pen lauhuailai ahih manin 4km Radius kuamsung tengah kuamah vakkhialo, gamtangkhia theiloding ci’n Local Authorities te’n pulakkhia uhhi.

Bali Island aom vanlengtual “I Gusti Ngurah Rai International Airport” zong tuciangciang angei mahbangin kizangzang saklai phot hi.

26 Nov 2017: Indonesia, Bali tuikulhtung aom Volcano meimual puakkham taktakta

Indonesia, Bali Island tuikulhtung aom Mount Agung akici meimual pen abeisa tawlkhatsung puakkhamding ci’n Warning akipia zelzel hi a, tuni Sunday (Nov 26) ni in puakkham taktakta cih Straits Times pan kiza hi. Mount Agung Volcano mualdawn ah vut asamahmah kiphitkhia ziahziah cihi.

Hih Mount Agung meimual tawh 70km aki gamlatna ah Bali Airport aom hi a, tua vanlengtual pen aki khakcip liannailoh hangin, kumpi thunei te’n tua kuamsungteng vanleng nawklohding in zasakkhin uh cihi.

National disaster management agency (BNPB) panin thuneikhat ahi Spokesman Dr Sutopo Purwo Nugroho in agenkhiatna ah hih Mount Agung meimual pen tuni Sunday nikhatsung zingsanglam bekbek inzong 3 veibang puaktamkhin cihi.

Mount Agung meimual panin vutkhu vive meikai bangin omniainuai in, South-east lam zuamphei ahih manin, tualam aom Lombok khuazong nawngkaisak hi. Tua vutkhu hangin Lombok khua azuanin aleng vanleng teleh tuakhua panin alengkhiading vanlengte nawngkaisak mahmah cihi.

Volcanology and geological hazard mitigation (PVMBG) panin hihpen alauhuaipen dinmun “Highest Level” in ciamteh uh a, hih meimual ii atunkuamsung tengah vanleng lensaklohding inzong ki khamcip cihi.

PVMBG te’n hih Warning tawh kisai in amau website tungah asuahsakna ah Alert Level pen Orange Color panin Red Color ah khanto uhhi.

Hih Volcano puakkhap hangin AirAsia te’nzong Bali atuding leh alengkhiading vanleng akigawm in 32 Flights cancel khinta uh cihi. Tua AirAsia vanleng aki cancel tepen Bali Airport leh Lombok Airport alengding in akigeelsa hi a, ahi zongin Mount Agung meimual buaina hangin aki cancel ahihi.

Video: Bali’s Mount Agung spews ash up to 4km as airport remains open

Indonesia gampen “Ring of Fire” kici meimual puakkhamte akizopna tungah omkha citciat ahih manin, Indonesia gamsung bekbek ahzong Volcano akigawm in 130 bang om cimawk hi.

2010 kuminzong Indonesia gamsung aom Mount Merapi kici meimual Volcano khat puakkham a, mi 300 val in sihlawh hi. Tuaban ah tua meimual puakkhapna hangin ageinai aom mi 280,000 valbang ki hemkhia uhhi. Hih Mount Merapi meimual pen leitung ah ahuaisia penpen, alauhuai penpen Volcano khatin aki ciamteh ahihi.

More: Indonesia, Bali Island ah guihtui tamluatna hangin mencim, mi 12 sikhin

Indonesia gamsung mah ahi Sumatra Island tung aom Mount Sinabung kici meimual zong abeisa 2013 kum akipan apuak khamkikding in kithawi “Active” kik kici a, tulaitak “Highest Alert Level” in akikoih, aki ciamteh leh aki encik khat ahihi. Sawltak #zomidaily