Bangcih Gamtat leng Hoih

No koi-ah thungen,”Lupna sungah”, cihdante pawl zong gamtatna khat hi.
Gamtat ziading nisim in a kisin mihingte ihih manin mite theihsa
zuihsa hi mahleh sutsut leng azemtoto ki hi mailo dia ci-in mimal
muhna tawh hoih ka sak pawl khat ka pulak nuam hi. Hoihsakdan ki
banglo ding ahih manin ki kum khawmni ci-in kong zawn hi.

Sianggen pahpah lel ni. Tui cil zat vet kei ni. Dailen buk( rest room)
na pai ciangin a pusuah masasa kholkhol kei-inla Tui buak pahpah in.
Tua hileh a gim hoihlo pawl khat ki zello pah hi. Tui na cilzat aa, na
kholkhol teh na nunga mi khat peuh in gim namtui zalo hi. Kua mah
ngawt bawlse dah in. Zogam ah Dailenna buk te a bitlo zong hi kei, gim
hoihlo teng a mut khianuam tamlel ahih manin Tui na cilzat zongin
phadawm hi. A bitna mun ah Tui tawh a pusuah ma sasa seng mang pahpah
hi.

Mi inn ah na pai ciangin a lut, a tung phetphet na inn sung uh
lumlua/vot lua, nam tuilua/nam sia lua…ci se dah lel in. Mi zia mi
omdan khat en masa phot in. Ei inn ah hong hawh mi khat aomleh zong a
deih a ki tangsap hong paina ahang..cihte dong masa in. Tu sak nailo
zen in dot pah ding bel hikei. Nupi pawl khat leuleu mi inn ah ki
khopna maw, pawi bawlna khat omleh inn teek te lupna tung khawngah
naunawi piapeuh om thei hi. Na lupna tung uh nuamtak ei ci lai thei
hi. Mi lupna khawngah kuamah mot lut nuamlo hi.

Phone tawh midang khat in hong hopih ciangin nang a hopih masa lo
penin tua zah ci photni maw leeee cih zangh kei-in. Hih pen kenzong ka
zat theih mahmah khat hi aa dik hetlo hi. Hong hopih masa penin a
deihteng a gen ma in, nang na ut teng gen masa keizaw in. Phone pan
mikhat tawh na ki hopih laitak in phone dang khat hong lutleh na ki
hopih masa pen pa tawh man siang phot in. Man nailo pi-in mundang
panin phone hong lut khat lenkik seisai pen a hopih masa te adingin
nuam vetlo hi. Thunget laitak, biak inn sung..cihte ah phone a ginglo
in koih ding manggilh kei-in. Mi pawl khat in An nek lai tak in phone
off lai uhhi. Hisa ing.

Inn sungah na taten Mangpau, namdang pau tawh hong hopih khakleh a
telpipi a tel vetlo ki neihlel inla Zomite kampau tawh pattah tangtang
in. Namdang pau a zat khat na zakteh hong pakta lua ing, pilsi cia cih
sese dahlel in. A za lo, bilngong ki neihlel in. Ahih keileh eipau in
bang hiam cih dong tel inla, inn sungah namdang pau a zatlohna dingin
hoihtak in genpih in. Ei pau na siamsak keileh na tate ahai hilo nu
leh pa ahai hilel hi. A sawtna teh pa hai, nu hai..hong cilai unteh.
Na khua, na beh, na pawlpi, na minam, a nu leh pa te min..cihte dongthawntuang
zelzel in. Penglam, Thangho leh Liando, Khuado thu… cih bangin ih
tangthute gen zelzel in. Ih ngeina hilh leh sin tawh pattah ni.

A theisa te, a zui dente adingin leltak oo cih hiding hi. Phawk khak
sunsun a tomcik tuateng ci phot ni. Lungdam.

Thawn Tuang
Zomi Angvaan
July 1,2014