Zomi sanggamte,
2003 kum-a kipan Zomi leh Zogam’ ading hihtheih zahzah-a mapang khat ahi Pu Kaampum leh Nu Cingte’ tapa nihna: Pu Zokhup (WZC President., Ex-Minister for Home Ministry – ZRO) leh Pu Tungpi (Pu Nang Sawm TungEx-Captain, ZRA) te’ laaizom Pu Zothawn (Pu Hau Khua Thawn: Kum 41)-in ama’ it tanu 3 leh azii, agam alei leh amipihte hong nusia cihthu kazaak ciang-in naakpi-in hong khoihkha ahihman-in leh “Zomite-in aksi khat khahsuah leuleu” ci-in minsial-in kahong zasak-hi.
Pu Zothawn-pen Mizoram State pansan-in minam vaai-ah naakpi-a amapang khat hi-a, ZRA sung nangawn buaina hongpian ciang-in Mizoram-ah thah ding-a akidelh ZRA pawlkhat ana keembit ngalliam khat ahihi. Mizote’ support ngah nading-in Mizo politics kimawlna sung-ahzong MNF support-a mapang giapgiap khat hi-a, ama’ mapanna ziak-in phattuamna tampi om cihzong kilanghtang mahmah-hi. Tua hi-a, Zomi-in mi-manpha mahmah khat aki khahsuah suak-a, laainat-huai mahmah-hi.
Mimal Kithuahna:
Lawm Hau Khua-pen Tedim Lawibual Saangpi-ah danh 8 ka’ sin ciil-a kipan “khuaneu pan-a hongkah” ci-a mi aki-etniam kawmkaal-ah amah’n hongmuak siam mahmah-in hong kithuahpih-a, Tedim Khuapi sung-ah ka-uut bangbang-a ka’ gamtat ngamna-pen Lawmpa’ vaang ahihi. Asuun azaan phial-in kithuah-in nuam kisa-in kihtaak zahtaak nangawn neilo-in ka-suakta mahmah uh-a, peemta maaineu ding kimlaai, khuatualmite sang nangawn-in maaingalzaw leh tualtangzaw zahdong dinmun hongtun ka’ lawm-it mahmah khat ahihi. Danh 10 zawh ciang-in Kawlpi College ka-kah man-in mimal-a kithuahna hong haksa cihthu hibek-a, kum 2 sung-pen khuapi lungtang hong pantah ka’ makaaipa-zong kaci thei-hi.
Minam’ ading-in Vaaigam zuan-a ka-pai khit nung-ahzong alawmteteng ki-om ahihman-in omthei mahmah lo-in hong paito hi-a, thupoi tuamtuam ziak-in amah-tawh mapang khawm theilianlo cihciang hi-in, lunggulhna leh deihna akibang ahihi. Tu-in naa sakna leh laainatna-tawh ama’ Tualkiatna tung-ah mipihte’ zaak-in ka-minsial-hi.
Na’ zapsa naamtem, na’ nawksa nahsawl, na’ kaansa guunpiau: Zotawi khangsawn lia leh taangte’n lambang zuui dinghi. Na’ sakmin ngaih theibang huut loding Zotuunnu-in lumbang hongsung dinghi. Na’ zuatna thangvaan laailung muan-in tuang vatung in!
Na’ seen gualngaih luankhi-tawh minsial-ei, Hau Khua!!!
Tunsawm (Zokhai)
Comment piaknop aomleh...