Ek suaksak kenmaw! ~ Zomi Quavadis

Ek suaksak kenmaw! ~ Zomi Quavadis

Biakinn sung hi in, mopa maiah monu pa dingto in hibangin thugen hi. “Tangthu khat hong gen ning. Nidang laiin papi khat om hi. Tapa khat nei a, nuam mahmah hi. Tua zawh a sawt lo in a it mahmah a zi in nau hong paaikik hi. Pasian khiangah thungen in “Pasian aw tutunga nong piak ding tano pen numei ong hisak in” ci hi. Pasian in tanu pia takpi hi. Tua a tanu a tawi masa pen midang hi lo in amah ngiat a hihi. A tawi laitak mah in thu ngen leuleu a, “Topa aw hih ka tanu pen a nu suun sak in maw” ci hi. A nu hong sun takpi hi. It huai in ngaihbang mahmah a, citakin thukhual mahmah hi.

Ahizongin a sawt lo in a tanu leh anu hong kilimthuah lua uh ahihmanin amah hong val pian hi. Thungen leuleu in “Topa aw, ka tanu pen kei hong suun dingin bawl in” ci leuleu hi. A pa suun pah takpi hi. Nasep hahkat mahmah hi. Mawtaw gol mawtaw neute hawl thei gai hi. Sep theih loh nei lo hi. Zaa zong tep thei in, kunpaung zong hong muam thei zawzen hi. Ama thu bek thusa in, a thuduh mahmah khat hong suah ciangin a pa hong lungkham a thungen leuleu hi “Tun bel nang nuntaakna tawh a kisuun dingin puahpha kik in Topa aw” ci leuleu hi.

A thungetna Pasian in hong dawng a, a tanu in midangte hehpihna nei in, midangte huhnopna, thupha bawl nopna tawh hong kidim ahihman in Zato Syanmah (Nurse) a suak dingin a nuntaakna pia khia hi. A si ding cina tampi damkik sak hi. Gam tuamtuam ah pai kawikawi in gaal kidona munah, thautang leng ziahziah lakah aliam a baite kem in khoi hi. Khuavawt khualum thuakin suang lak vui lakah lum in, gim ingh tawl ingh cise lo hi.

A sawt lo in a tanu meel ah kisap khat om lai leh kilawmsa a hihmanin thu kngen leuleu hi. “Topa aw, ka tanu sungah nuamna kipaakna omsak in” ciin thungen hi. Pasian in a thuumna dawng in a sawt lo in nang tawh hong kimu pah hi. Tua papi pa pen keimah ka hihi. En in, ka tanu meel ah hizah lungdamna ka khatvei muhna hi. Tua pen nang hong muh man ahihi. Kei zong ka lungdam hi.

Tuni in nang khut sungah ka it mahmah, a manpha penpen tanu khatbek ka neih hong pia ka hihi. Ahihang thu khat hong gen nuam ingh. Ka tanu hiciang a tun theihna dingin Pasian tawh kop in ka hanciam mahmah uh hi. Baih het lo hi. Thu kamkhat hong vai khak nuam ingh. Kei leh Pasian pang khawm a ka tanu nuntaakna ah ka hanciamna khempeuh uh ngaihsun inla Ek suak sak ken maw!” (Translated by Francis Lamthang)