Saddam Hussein inzong “VX nerve agent” tawh mi tultampi thatngei

Saddam Hussein inzong “VX nerve agent” tawh mi tultampi thatngei

“VX nerve agent” kici alauhuai, akhauhmahmah Chemical Weapon pen 1988 kum inzong Iraq gamsung ah Saddam Hussein in limzat mahmah ngei hi. “Halabja Massacre” kici Iraq gamsung aom Halabja City sungah “VX nerve agent” tawh mi tampitak alomlom in na thatlum ngei cimawk hi. Ref: AFP & Bernama

Saddam Hussein in 1988 kum March 16 ni in Kurdish leh Iraqi te omna Halabja khuasung ah “VX nerve agent” kici Chemical Weapon thehthang sakgawp ahih manin, tawmveisung in mi 3500 pan 5000 bangin sihlawhziau cimawk hi.

Asi tuazah banah hih guza hangin adang mi 7000 pan 10,000 kikalbang liamgawp, zawcipgawp in mi bangzo nawnlo in omcip uhhi. Asih donguh mi cidam in omnawnlo uh a, natna tampitawh kidim tawntung uhhi.

Hih Chemical Weapon tawh tualthahna pen “Supreme Iraqi Criminal Tribunal” in Iraq gamsung aom Kurdish mite tualthahna ahuaisia pen khatin Official in ciamteh uhhi. Tuabek thamlo khuasung mipi te teenna ah Chemical Weapon tawh akikap lakah ahuaisia penpen khatin tangthu ah akiciamteh khat suakmawk hi.

Iraq gamsung ah Saddam Hussein in azatngei mithah nadingin akhauh, athahat, asisakpah lianlian “VX nerve agent” kicipen tu in Malaysia gamsung ah akizangkik himawk hi.

Malaysia Inspector-General of Police Tan Sri Khalid Abu Bakar in KL International Airport 2 ah abeisa February 13 ni in aki suamlum Kim Jong Nam pen “VX nerve agent” tawh amai kizutsak cih pulakkhia hi. Kim Jong Nam pen Macau City zuandingin KLIA2 vanlengtual ah aomlaitak in numei nih in amai ah zutsakkhat nei a, aneihkhit phet un tua numei nihte ki hemkhiaziau uhhi.

Kim Jong Nam akicipa pen tulaitak North Korea Leader Kim Jong Un ii asanggam hia, amai ah guza aki zutsakkhitciang aomdan nuamlo ahih manin KLIA2 Airport aom Customer Service te kiangah huhna ngenhi.

Airport Police te vaihawmsakna tawh Putrajaya Hospital kipuak himahleh zato tungmanlo in, lamkal ah siziau hi.

More: KL Airport sungah suamlupna in akizang guza bangnam te cih kitheita

Tua akizan guza pen “VX nerve agent” hi a, mihing vuntung ah themcik tukha lehzong Minute 15 sungin ki siziau cimawk hi. Athemneng leh akhu dikkhak dingzong lauhuai mahmah ahih manin, tu’n Malaysia kumpi thunei te’n KLIA2 sungteng siansuahna aneihsawm uh ahihi. ZD Sawltak #zomidaily