Zomi leh Sumlepaai ~ Tungg Thang

Zomi leh Sumlepaai ~ Tungg Thang

Zomite sungah sum le paai thu i telloh manin sum sawtpi i kep zawh zah dingin kikeem khalo hi. Sum pen mihing nuntakna ah a kisam, neihloh a phamawh na khat ahihi. A hizongin sum tam lua leh mite a mittawsak thei a, a langkhat ah sum tawm lualeh zong mite thumaan zolosak hi. Tua hi in sum le paai pen i kitaangsap zah i neihzawh ding leh i zat/zeek siam ding a kisam mahmah thu lian khat ahihi. Sum pen a zat/zeek siamte in sauvei khom dinga, a siamlo te in sawt khom lo kha ding uh hi. Tua hi in sum pen koici bangin zangin zeek ding ihi hiam? Paunak sungah mi pawl khat in sum zangh ziahziah napi in hau semsem a, pawl khat pen cil mahmah napi in zawng semsem hi, ci hi.

Zomite pen huhna ngen khat paileh a phun nuam pha deuhte hise hi. Piakloh teh tai a thuah nuam pawl kihi lai hi. Mi huhna za khat za nih piak ding haksa sa mahmah in, nitak khat annekna sai ah tul 20/30 a bei ngamte kihi lai phot hi. Tua hi in sum zatnading mun, bei ngam nading mun ah i bei/zat loh manin sum pen sawt a kizeek khalo hi thei hi.

Sumlepaai koipan?

Mi tampi in sum le paai koi pan cih tello ahih manin, a zat zia ding zong theilo in siamlo pah hi. Na khempeuh ii bulpi pen Pasian kiang pan ahihi. Tua ahih manin sum le paai zong Pasian kiangpan mah ahihi. Mihingte pen Pasian sum ihihi. Banghang hiam cihleh Pasian lim leh meel i puak man ahihi. Lai Siangtho sungah Topa Zeisu Satan in a ze-etna ah leitung hauh khempeuh kei hong kipia khin hi, ka mai ah nong kun leh hih na muh khempeuh kong pia ding hi, Satan in ci hi. Tua hi a, Satan in sum le paai, hauhna cihte ama khut sungah a koih cip nuam ahihi. A hi zongin a bulpi taktak in Pasian kiangpan ahihi. Pasian zia tawn peuh lecin sum le paai, hauhna cihte Satan mai ah kun kullo in Pasian in direct in hong pia thei ahihi.

Sumpen anei hilo in akeem

Sum pen khualzin a tawh a kibang ahihi. Tawl khat sung mi khat kiangah zin tungin tawl khat khitteh zin khia kik leuleu in mi dang khat kiang mah tung kik zel hi. Tua bang in sum pen a kileh kawikawi ahihi. Sum pen a lungkimna ah sawt a om ding ahihi. Zindo a siamte kiangah sawt a om ding hong suak hi. Mi pawl khat in sum a nei kisa a, ngaihsun taktak lehang a nei kihilo in a keem bek i hiphot hi. Sum i kep hun ding pen a sawt pen khan khat ah kum 50 kan hilo kha ding hi. A nei taktak pen a tunga tuangte ahihi. Topa Zeisu in zong Pasian sum Pasian pia unla, Kaiser sum Kaiser pia un, na ci hi.

Sum keem i cih ciangin mi khempeuh in i theih treasurer mah a kibang phot ahihi. Tua in bang hong lak hiam cihleh ei’a ahih lohna hong kilanghsak hi. Sum keem (treasurer) te in zong sum pen a nei hilo hi. A kikeemsak pak bek ahihi. Tua mahbangin leitung i nuntak tawmvei sungin Pasian in a sum hong keemsak pak ahihi. Bang hang hiam cihleh i sih ciangin kikeng theilo ahih man hi.

Sumpen koihcipding hilo a zatding

Sum in pen na a sem nuam mahmah khat ahihi. A om cip theilo ahihi. Sum pen kikoih cip leh khang theilo a, kizang semsem leh a khang hanhan ahihi. Tua hi in sum in na lianpipi zong semzo hi. Mi zong hoihsak thei, zong siasak thei hi.

Sum nei a i up mi pawl khat kiangah leitawi in i pai ciangin ken sum nei keng, hong cithei uh hi. Tua pen a maan mahmah thu a hihi. Sum a nei hilo ngei in sum a hawh pak zong hithei hi. Pawl khat in ahih leh mi a leitawi noploh manin nei keng, keem keng, aci ahihi. Ahih hangin mun khat ah kikoihcip kha thei hi. Sum pen nei a hong ki-upmawh, kimuan man in hong kileitawi ahihi.

Sum pen Pasian kiangpan, Pasian thupha tawh a ngah mite in ahih leh sum nei keng, keem keng ci nuamlo uhhi. Apia Pasian thei in, a kisamte tungah huh nopna lungsim nei uh hi. A hi zongin sum ngahna maanlo pawl khat in pen angahna meel zong telcianlo ahih manin a sum a seelcip nuam ahihi. Mite in sum tampi keem cih thei leh adah zong pawl khat om mawk hi. Tuni in sum na neih pen nang ading bek a Pasian in hong piak hilo in midangte kisapna huh zawh nadingin zong Pasian in hong piak ahihi. Tua thu a tello te in a sum le paaite sawtpi khom khollo uh hi.

Sumkholna Namnih

Sum kholna nam nih om hi: Nget in a nek theina mun leh nget in a nek theihlohna mun nihte ahihi. 2008 kum beikuan a kipan in leitung bupah Global economy crisis ong piang hi. Mi tampi in sum a kholna ding lopi ah khol kha hi. Thu khat ah nget ii nek theihna mun bek ah khol uh hi. Tua hi in Dollar billion a sim in sumh ziahziah uhhi. Hih pen Pasian in a thuhilhna khat ahihi. Hih tungtawn in mite in Pasian bank ah sum khol ding ngaihsun thei tading uh hi. Mite’n sum hau thei mahmah uh hi.

Ahi zong in a zat nading mun, a kholna ding mun ah khollo, zangh lo ahih manin ngetin na neksak lel ahihi. Huih letkhiat bang in tomno khat sungin beipak lel hi. Zomite neih zawh nailoh dollar billion a sim tomno sungin sumh in bek pak ziau hi. Hih thu ngaihsun lo in leitung bank bek i bulphuh leh lauhuai kha ding ahihna Pasian in hong hilh nuam ahihi. Na sum koi ah khol sawm na hiam?- Leitung bank ah maw/Vantung bank ah?

Sumpen i To hilo a, i sawltak hi

Sum pen To a neih ding hilo in sawltak a zat ding ahihi. Mi pawl khat in To in nei kha uhhi. To in nei ahih manin a sum uh midangte a leitawi ngamlo ahihi. Sum to a nei te in siatpih in sihpih thei zawlai uh hi. A hizongin sawltak (sal) a neite in thamaang lungnuam tak in na lianpipi sem zo uh hi. Tua hi in sum pen i nuntakna ah hong huh hong panpih ding na khat ahihi. Tua sum masak lua in i om khak leh tua pen to a nei kisuak in sum ii sila a kisuak ahihi. Mi pawl khat in sum lehl uh hi.

Sum a neih ciangin a lungkham semsem hi. Sum pen I zawh masiah in I To hong suak ding hi. I zawh takteh I sila hong suakpan ding ahi hi. Tua ahih manin sum ngah nading hipeuh leh ci in bangbang ahi zongin a kisem khathei ahihi. Tua mun ah thumaan cih kingaihsun kha nawnlo thei in sihna, siatna lam damdam in a kizuan hita hi. Sum pen to in na neih laiteng na lunggim mahmah dinga, ahih hangin sila (sawltak) in na neih takteh na lungnuam mahmah ding hi.

Sumpen lawmzon nadingin hoihpen

Sum neite in lawm hau zaw deuh uh hi. Lawm hoih aneih mah bang un, lawm sia zong nei thei uh hi. Lai Siangtho in sum pen lawm zon nading in na zangh un, ci hi. Sum le paai tawh Kha mangthang kizong thei hi. Ahi zongin sum le paai tawh Kha mangthang kilei theilo hi. Sum pen Pasian gam adingin nasep nadingin zong kizangh thei hi. Sum pen lawm hoih zon nading in a thupi mahmah khat ahihi. Innkuanpih ding, nasep pih ding, cih bangin lawm hoih zon nading in zattak hi. Mi pawlkhat in sum pen a zattak lohna mun peuh ah zangh khathei uhhi. Koi san ah zathuai hiam? cih ngaihsut phat ding thupi hi.

Sum zat nading a thupi pen in a puk ding mi khat a dinsak zawh nading, a si dektak khat a nuntak zawh nading, a lungkia mi khat a tha khauh kik nading cih bang tepawl ah kizangh leh thupi in man nei mahmah ding hi. LST in na sum omna ah na lungsim om ding hi ci hi, na sum koi ah koih in, koi ah zangh na hiam?

Ithuai Sumlepaai

Sum cih pen a ithuai mahmah ahihi. Sum om peuh leh i deihdeih a kilei thei ziauziau ahihi. Sum lo tawh kinungta theilo hi. Tua hi in Sum pen it in, hoih taka kep ding ahihi. Sum pen thupi bawl ding, zahtak bawl ding ahihi, tua hi leh sum in nuamsa in hong lawi lo ding hi. Mi pawl khat in sum laidal thak pawl khat pen a khutsungah hum cip in tonsak gawp uh hi. Sum pen tua bangin i thusim kei leh sum in zong hong ngai lo ding hi. Sum na itna tungtawn in sum in nang hong zuan ding ahihi. Sum pen mihing nuntakna ah a ithuai pen leh lawm hoih pen khat ahihi.

Hunthak Sumzonzia

Zomite a beisa hun a i sum zonzia pen van kham sem cih lamsang ahihi. Tua manin sum bangzah nei cih hong kitheih ding kilau hi, bang hang hiam cihleh ngahna maanlo ahih man hi. A kilangh in zong mi lakah ki-om ngamlo hi. Lau kawmkawm in a kigamta den ahihi. Van kham septawh Millionaire i suak phial zongin Billionaire kisuak ngeilo ding hi. Tu in leitungah sum zonzia zong hong kilaih toto in Multi Level Marketing (MLM) cih pen leitungah a hoih pen sum bawl zia khat in a kingaihsun ahihi.

Hih sum bawl zia pen Kawlgam ah zong omta hi. Hih sumbawlna ah hau sim cih bang omlo in, neihzah a kitheih pih ahihi. A bulpi pen in Networking ahihi. Hih sumbawl zia pen mi dangte na huh leh nang zong a kihuh hiteh cih bang dan hi in a hoih mahmah khat ahihi. Khat kia bek khangto cih hilo in mi tampi tawh i sepkhop teh kihau to cih ahihi. Hih sum bawlna ah networking a siamte pen khangto hanhan in hau hathat hi. Tua hi in i sum zonzia zong ngaihsun pha in lam thak zon kul ding hi. Hih bang dan sumbawlnate tawh Millionaire, Billionaire a kisuakzo pan ding ahihi.

A beisa sum le paai zonzia pen khat kia hauhna (individual wealth) hi a, tu hun ciangin hauhkhopna (collective wealth) hun hita hi. Ni dangin ka hauhna hih hang hi ci in kigen ngamlo a, tuhun ciangin hih bang dan tawh a hau hi ing ci in teci kipang ziahziah ta hi. Tua bang dan tawh Zomite zong hau in a khangto ding ihi ta hi. Zomi thusuak ngah pawl khat in a genna ah Zomite hau ngeingai ding uh hi ci hi. A masa in bang cih hauh ngeingai ding ka ci a, tu in hih Collective wealth tawh kisai a na gen uh ahih lam ka mu a, ka ngaihsutna kituak ka sa mahmah hi. Tua hileh Kawlgam ah omsa in Dollar a kisaang/ne ding ahita hi.

Hih Network marketing tawh hauhna pen kigutheilo, kiam theilo in a khangtoto ahihi. Hih bang sum bawlna pen deihsakna lotawh a piang hilo hi. Kideihsakna, kihuhna tungtawn in hauhkhopna cih a kimu ding ahihi. Hih networking tawh a hau mi in midangte kiangah hong huh ning ci-in a pattah ding mi zong dinga, huhna nget kullo phial kha ding hi (Hong huh in cih kullo). Hih networking tawh deihsakna a nei mi khang hathat dinga, a neilo mipen kiamlo bek ding hi. Hih mun panin hauhna taktak a kimu ding ahihi. Zomite thu maan thutak tawh hauh hunding hong nai ta hi, kigal muh theita hi.

21st Century ah Sumlepaai

Zomite in i sum zonzia zong laih kul tading hi. Mite billionaire ahih ziahziah laitak in van kham peuh tawh sum bawl i sawm laileh Billionaire cih thadah Millionaire i suah ding zong baihlo kha ding hi. I nekkhop ding i ngah tei dinga, i khol khop ding hamsa kha ding hi. Tua hi in i muhna zaisak in sum tampi ngah nading lam zong ding hihang. 20th century pen Zomi tadingin hauh hun hinailo hi. Tua ahih manin Millionaire cih ding zong a omzo nailo phial ahihi. Tua hi in 21st century tawh a kituak sum zonzia ngaihsut ding hi ta hi. Sum zonzia lamthak i muhna tungtawn in Zomite 21st century ah Billionaire suak zo tading hi.

Sum pen nang ading bek a Pasian in hong piak ahih loh lam na tel takteh, sum a zeek dingin Pasian in hong muang pan dinga, na zeek ding sum hong pia tading hi.

Thukhupna

Sum pen a tawm a tam cih a thupi hi masa lo hi. Amasa in lungsim thupi pen hi. Meigong nu sumpi piakna ah hihthu kimu thei hi. Mei gongnu sum piak pen a mal in tawm pen kha ding hi. A hi zongin Topa Zeisu in tampen hi ci hi. Pasian in na piak zah en masa lo in, na inn a omlai zah zong thei gige hi cih zong phawk huai hi. Deihsakna lungsim tawh na piak sum ahih nak leh a kizat/zeek na ah man nei in lawhcing ding hi. Pasian piaksa sum angah te in angahna, a piapa thei ahih manin sum tungah cil tentan cih bang omlo in, midangte ahuh zawh bangin tawm taleh panpih uhhi.

Tua hi in na sum ngahna pen Pasian kiangpan ahih ding thupi mahmah hi. Mi pawlkhat a sum ngahna kidong leh a gen ngamlo om kha ding uh hi. Tuate hangin sum i tungah sawt hong khawllo thei hi. Sum sawtpi na zeek/zat nop leh na zat nading mun, a kisapna mun ah zangh in. Na zatna, na piakna mun a maan ding thupi hi. Tua hileh zanghzangh/piapia napi in hau semsem ding cih thu Lai Siangtho genna na mu/telkha ding hi. Sum tungah ukna, zawhna na neihzawh zah tungtawn in Pasian in na zeek ding hong pia ding ahihi. Topa’ thupha, Tungg Thang (UB Fellow, Silliman University, Dumaguete City, Philippines)