USA, Tulsa pan Pu En Khan Nang (Naulak) in hongnusia

USA, Tulsa pan Pu En Khan Nang (Naulak) in hongnusia

Guasing khuami Tulsa, OK pan’ ZOMUS Founder Pu En Khan Nang in abeisa November 26, 2022 in Stroke natna tawh hongnusia cih thu izakman in ZIUSA kipawlna mintawh dahpihna ipulak hi.
Pu Nang pen Zomi Innkuan Oklahoma ah member khat leh ZIUSA Genvai member pom ni 3/29/2014 pan active member khat ahih manin thumeilet/policy zuiin (100%) Death Benefit $15000 kipiakhia ding aa paakkual $150 man khat tawh zong mangpha khakna kinei hi.

Pu Nang luanghawm tawh anunung pen hunzatkhop ding hongtung ding Wednesday November 30, 2022 11:00AM in FGAIM pawlpi makaihna tawh, Funeral Service bawl khit ciang in Rev. Dr. Dam Suan Mung @ Sia Mung Tawng in han ah vuina nei ding hi.

Pu Nang hong nusiatna hang in adahakap alungleng khuangai tanau meltheih khempeuh hehnemsiampa Kha Siangtho in alamdangin hong hehnem ciatta hen! Dahpihna Lianpitawh, Mun Mang (Zomi Innkuan USA, Inc., Secretary of Genvai)

Pu En Khan Nang Phawkna ~ Pu Thangboi

Ka kiho tawpni uh pen 2018 kum February ni 6 ni hi. Anupa un US pan Kawlgam hong hawh lai un Yangon ah tua ni in nitak an ka nekhawm uh a, tua ni pen hih leitung ah ka kithuah tawp ni uh hong suak mawk hi. Ka kiho tawpni uh hong himawk hi.

Kimuh Ciilna

Pu En Khan Nang ten 2000 kum in Yangon bulphuh in Zomi Music Uplift Society (ZOMUS) na phuan uh hi. 2005 ciang in Lengtong Pauno’ nau (L) Sia Thangno’ tungtawn in Pa Nang tawh ka kithei uh hi. “Na suak nai diam thei keng in Tonzang ah zum nasep siau in kong pai lai un no’ inn hong tung hive ung” cih tawh hong pan ahih man in ka maingap pah hi.

Amah: ZOMUS ah panmun khat hong la dih o
Kei: Kalai ken bang semthei peuhmah ding?
Amah: ZOMUS ah panmun lente pen elected hilo in appointed hi. Veiina tawh kisem hi.
Kei: Kimuang kei veng aw
Amah: Nang na kimuan loh hang ko hong muang ung ei.
Tua a kipan ZOMUS ah ka kithuah pah uh a, ka ki-it mahmah uh hi.

ZOFOP Ah

2005 kum November 30 – December 2 sung Tedim khuapi ah Zomi Festival of Praise (ZOFOP) pawipi bawl ding in Hellelujah Chorus lapi mi 3,000/ in sading cih thu hong om hi. Tua ZOFOP ah music vai khempeuh ZOMUS in tavuan lading cih thu ahi hi. Tua fund ding zong in Yangon khuasung ah muan deuh teng’ kiang kavak uh leh ka ngah pah bilbel uh hi. Tua vai tawh Pu En Khan Nang, JK Kam, Sia Kim Pau leh kei mah Mung Laan Thang ko teng 4 ZOMUS min tawh Tedim ka kahto uh hi. Ko Yangon pan a pai teng Pa Nang’ sungte ahi AIWA ah katung uh hi.

Bilpang Pan Hong Ki Tangko

Tedim ka tun ni uh azing ciang in ZOFOP pawi vai loudspeaker tawh khuasung ah ki tangko kawikawi hi. Tua tangkote ka zin gei vuah khawl ngiat in atangkona uh hoihtak gen ciatciat uh a, “Cik mah a ih zak ngeiloh ZOMUS ten music tavuan lading uh hi” ci ngiatngiat uh hi. Ka lungsim sung ah “Lawm ten ZOMUS hong pakta hetlo uh aive maw. Hoih tak hanciam kul in cei” kaci hi.

Pawi Mukhalo

Pawi ah lasa nuam hong tam lua mahmah ahih man in “Studio ah lakhum ngeite bek sasak ding” kacih uh ciang un hong phadawm zawdeuh hi. La taihna Sakollam Tuiphum Biakinn ah kanei den uh hi. Pawipi ni ciang in lasa dingte leh music tumte’n Hallelujah Lapi sakna amuh loh khak ding uh patau lua liang in saikel om teng tawh ka khaksak uh leh avaihawm kei leh JK Kam ka tuanna ding uh hong om nawnlo mawk hi. Tua hunlai in tulai dan in saikel tam nai hetlo hi.

Sakhollam Tuiphum Biakinn pan pawi kibawlna Galkap Tualpi zuan in khe tawh kapai uh leh ka lapzo nawn kei uh hi. Lam lianpi zong zui ngamlo in lamnuai lam tawn khiankhian in kapai uh hang in pawi ente hong ciah ngeingai tamawk uh ahih man in ak gulmu kabang guauguau uh hi. “Ka nuai vang leh lutnuam sing aw eh” cih bek in om hi. Pawi vai tawh Yangon pan Tedim pai pawi mukhalo in aciah kik kahi uh hi.

Tamu Ah

Tedim pan ciahsuk lam Kawlpi Tahan ah Pa Nangte’ inn mah katung hi. “Saklam a Zogam Artistes’ Association (ZAA) te tawh kimu leng hoih inteh” Ci’n Pa Nang tawh saikel khat tawh Tamu lam zuan in kapai uh hi. Aman saikel hawl in kei anung ah katu hi. Bohkan katun uh ciang un ka kibungh uh hi. Bang mah bel ka cikel bilbel uh hi. Tamu ka tun uh ciang un Moreh lam ah buaina om in lampi kikhak ahih man in Lamka ka paithei nawn kei uh hi. Ka ciah lam uh ciang un zong Bohkan ah ka saikel uh apei hong kitamh sese ahih man in kabuai mahmah uh hi.

ZOMUS Foundation

Yangon katun kik ciang un ZOMUS hoihtak lam ding ka hanciam uh hi. ZOMUS Motto, ZOMUS Logo, ZOMUS Letterhead cihte nakpi in kikum in kabawl uh hi. Tua ban ah short term leh long term planning zong kasuai uh hi. Long term planning lak ah Zomi Idol neih zawhna ding, ZOMUS Radio Station neih zawhna ding, Zogam Lapi neih zawhna ding cihte zong kihel hi.

Kimuh Kikna

Pa Nang a innkuanpihte tawh Malaysia tawn in US tung uh hi. 2016 kum US kapai ciang in Pa Nang tawh nuamtak ka ki thuah thei uh hi. A inn vuah zong kagiak pahpah hi.

Ka Muh Tawpna

2018 kum US kapai kik ciang in Pa Nang dam nawnlo hi. Set bek tawh anak hi a, kiho theih om nawnlo hi. Amah akoihna vuah kava hawh a ka hopih leh ka aw azak ciang in hong kitom in a set bang hong hamgawp hi. Acingte bang in lamdang sa mahmah uh hi. Atapa Sia Thang Tawng tawh ka hopihpih uh leh akhitui hong luang a, kei zong ka khasiat hong suak mahmah hi.

Cidam in kimuh kikna ding thu ka ngetnget hang in angah nawnlo kahi mawk hi. Khangual kahih loh uh hang khangual bang in kinak thuah mahmah kahih man un ka lungzuang mahmah hi. Mi thunuam, mi thukhual, deihsakna nei mahmah khat hi a, mikim tawh kithuah thei khat zong ahi hi. (2007 kum Lutol Buaina ah ki limhel sim kahih man in Yangon 40th Street a Pa Nang te’ inn ah kabu thei zel hi.)

Hong Kam Vaikhak

2016 kum US ah ka kithuah lai un “Thangboi aw ZOMUS tangthu nasuut uh ciang un kei hong hel kei un” hong cimawk hi. Bang adeihna hiam bel kathei kei a, hong vaikhak phapha hi. Pa Nang’ tungtang ah adah akap khempeuh hehnemsiam Huhpa KST in hong hehnem kimciat ta hen. Dahna leh Khuangaihna Lianpi Tawh, Mung Laan Thang (Yangon)