Zomi Kipawlna Khempeuh’ tung-ah Zaaksakna ~ Pu Zokhai

Written on 20 May 2012
Leitung Muntuamtuam-a Zomi Kipawlna Khempeuh’ tung-ah zaaksakna:
Athu: Kawl Gamukte-in “Kawlgam Minam Ciaptehna-ah Zomi Omlo” acih-tawh kisai thumaanlo ahihna pulaakding ahihi.

Lungphona-pen kumpi ahihkeileh thuneite phinna hilo-hi. Mipi’ lungdeih-tawh ki-ukna I-lunggulhna aziak-pen mipi’ deihte ahitheizah ciang-a hong ki-awlmawhsak, hongki thupi-laaksak cihna ahihpah malam man-in tulaai tak-a Kawlgam thuneite’ paizia Democratic belief-tawh akituak mahhiam/kikeelki-hiam cih mikim-in I-thei dinghi.

Kawlgam taangthu asawt naai hetlo, abeisa kum 25 sung bekbek-a thupiang I-lungngaihding naakpi-in thupi-hi (minam aneite I-hihleh).

1990 Kiteelna-ah thukhaamzil tak-in Zomi National Congress-in mee-kuang luui thei-a, Tedim leh Tonzaang Constituency teng-ah gualzawhna ngah-hi. Zomi MP nih kinei cihna ahihi.

Hih thusunna-pen “Minam Khat-in Minam’ ading amawhpuak (responsibility) taangkona ahihi.

Tua hun-a thuneite-in thuneihna piakhia lo-in kum 20 vaalbang minlehpuam kheel maimai lel-in hongki ukcip khinsa ahihi.

Tu-in President Tein Sein-in “Kawlgam ki-ukna leh kiteelna-pen democratic system-tawh akalsuan” bang-in gamsung gampua-ah taangko hi kimlaai, 1990 Kiteelna nangawn-ah theihpihna kipia beklo-in teelcinna-tawh MP nih anei “Zomi” -pen “Kawlgam minam ciaptehna sung-ah omlo” acih thu-in amau’ taangkona-tawh aki-lehbulh ahihlam kilangh sak-hi.

1990 Kiteelna-pen thuneihna akipiakloh hang-in thukhaamzil-a kiteelna hi-a, National League for Democracy inzong thukhaamzil-a kiteelna ahihziak-in mee-kuang aluui ahihi. Kiteelna-ah landslide-in zo cihthu-zong mipi-in I-theihsa ahihi.

Tu-in, democratic system bulphuh ci-pong mawk-in 1990 Kiteelna-a agualzo minam party (a ZNC bek hilo,…) khatpeuh “Kawlgam minam kiciaptehna sung-ah omkei” cihziau mawkpen democratic belief anei mite (a Zomi bek hitase keilehzong) hih kumpi/thuneite’ democratic system cih bangdaan himawk dinghiam cihthu om-hi.

Hihbang gamukte’ thuneihna I-up zawhlohna ahihkeileh I-lungkim zawhlohnate pulaak ngamkei lehang democracy’ alimna, aphattuamna omlo dinghi, banghanghiam cihleh democracy cihciang-in mipi, mihon, pawlpi, kipawlna, mimal kimciat-in “maan” asak thute pulaaktheihna/gelhkhiat theihna, “khial” asakte phunsan theihna-a kipan human rights akici Mihing’ Hihtheihna” abulpi ahihi.

Tu-in Kawlgam kiukna democracy agimnam/aliim kimu bangciang-a akiseh ahih seemleh banghang-in “Hi” I-sak thute pulaak ngamlo zenzending I-hihiam? Tuabang-in thumaan ahihkeileh eima’ “True Identity” I-pulaak ngamkei laailaaileh USA/UK/AU-in Kawlgam hong-uk phialzong-in a rights angen ngamlo mi’ ading-in ama’ nunna/khuasakna…. kidang lodinghi.

Tua hi-a, Zomi National Congress party’ nomination file ding ahihkeileh registration bawlding deadline May 30 hi-mawk ahihman-in tua hun ma peuhmah-in gampua lam-a Zomi kipawlna khempeuh-in Kawlgam Palaai Phualpi (Myanmar Embassy) ciat-ah lungphona I-neihding naakpi-in lunggulhhuai mahmah-hi.

Australia Zomite-in 28 ni-in Political Capital ahi Canberra-ah lungphona neihding ki kipsak khin-hi. Mun tuamtuam-a Zomi khempeuh inzong tua-hun ahilian keizong-in May 30 ma-in kine zoleh hoih-hi, banghanghiam cihleh deadline khit-a va-neihpen neihloh sang-in ahoihzaw ciangbekmah hi-a, pulehpate’ thuciin mahbang-in “sial’ tat nung-a sialdaai kaai” cihbang kihi khading lunghimawhna om-hi.

Lungphona cihpen thuneite phinna ahihlohlam I-gen phapha nuamhi, banghanghiam cihleh “deih ngetna” ahihkeileh “deih sinthu leelna” hibek lel-a, adiak-in democracy gamte-ah kumpi/thuneite aphin bang-in kiseh lo-hi. Adiak-in gamdaai lungphona-pen thusia bang-in kiseh lo-hi. I-tate khat-in adeih hong ngettheih keileh ki lungdamzaw khollo dinghi.

Tua ahihman-in Zomi akuamapeuh’ mawhpuak-pen I-minam hihna kilangh sakding, I-minam paukam tawisaangding, I-minam ngeina keemcingding cihte minam khat’ mawhpuak lianpente ahihi.

Leitung bup-a Zomi khempeuh-in hihthu lungngai leh sepsuah ding-in I-ki haanthawn uhhi. Azenzen-in lungphona neihding avaaihawm om-a press/media release ahihkeileh statement akisam I-omleh aituam mailh-tawh ahizong-in groups sung-ah ahizong I-kizasak ding-a, I-sepkhop liailiaiding I-ki zasak uhhi.

Zomi Pasian’ Thupha!

Zokhai