Tulsa ah “Zomi Khang Thak Club” honpawi kinei

Zomi Khang Thak Club, Zomi Future Generations Culb, Inc.

Zomi te’ sungah leitung khanzia tawh kizui in pilna siamna te zong hong khak toto mahmah ta hi. Tua khantohna tawh kizui in siatna tawh hong tonkhawm hi. Tua tawh kizui in adiakdiak in mundang gamdang om tuipi gal kai Zomi te’ sung innkuan sungah hong om zeuhzeuh ta hi.

Tua bang buaina hong kipatna a bulpi in innkuan khat pau leh ham ki sansiam lohna, lungsim tuam neihna leh i dinmun ngeina tel theihlohna hang ahi hi.

Tua bangin i minam sungah buaina a om lohna ding leh ki itna akhan semsem theihna dingin lunggulhna tawh khang kizom minam te i hih ding lunggulhna kinei hi.

Tua ahih man-in khang kizom minam i hih theihna dingin naupang te pattah ding lunggulhna kinei hi. Aisa lo-ngeek a zol cih bangin naupang te’ cidamna ding leh kidalna ding, pau leh lai, ngeina cih bang atuamtuam hilhna kinei hi.

Hih “Zomi Khang Thak Club” hon hun pen July 06, 2019 (2:00 PM – 4:30 PM) sung in Tulsa khuapi ah kinei hi. Tua hun sungah Rev. Dr. Kham Khan Khai @ Sia Khaipi (MCC) in honna, thupha piakna leh Pasian kammal tawh hanthotna hong nei hi.

Tua ban ah Rev. Thang Lam Mang @ Sia Mangpu (ZBCM of Tulsa) leh Pastor Cin Thang (FGAIM) te in zong amau muhna tuamtuam leh Pasian thu tawh hanthotna/ thapiakna hongnei uh ahih man-in tha kingah mahmah hi. Tua sang honna sungah sang naupang te’ nu leh pa ten zong hong uap thei uh ahih man-in hong picin suah mahmah hi. Kizopna ding: Master Kampu (918 406 7194) Pa Mangpi (918 906 9274)