CDM panpih ziading ~ Pu Thangboi
Tulaitak mipi’ thahatna pen CDM ahi hi. CDM hat tektek leh kumpi thanem tektek ahi hi. CDM bei leh misok te’n a utbang un ong balmal lian ding uh hi.
Tua ahih man in CDM athahat tektekna ding in panpih kul hi. Sum le pai tawh apanpih ding leh thu le la tawh apanpih ding zong kisam mah hi.
Athupi penpen:
Misokte’n CDM makaite man zeuhzeuh ta uh hi. Mipi in ahotte man zolo uh a, mipi’ hotna angah khalote manzo uh hi. Tua ahih man in mipi in CDM makaite ih hot ih hum loh ong phamawh ta hi.
Kihot Zia Ding:
1. Ong manding a ong pai a om leh CDM makai te’n ahun kaih theih zah in na kai ding in ziakai sak ding
2. Tua kawmkawm in khangno makai te contact ding
3. Khangno te’n thu phamawh aom nak leh meikhuam sat ding. Agin ngaih theithei a sat ding. Meikhuam kisat aza peuh in asun azan cih omlo in delh pah ding. Hon khia ding.
4. CDM makaite’ vaksuk vaktohnate khangno te’n encik gige ding. Amatsawm nak uh leh delh pah ding. Numei pasal cih omlo amupeuh in buakhuan ding. Meikhuam sat ding. (Mindat ah tulaitak mipi in CDM makaite Zothau tawh cing ngiat uh hi)
Mipi ih pankhop nak leh manngamlo ding uh hi. Manngam kei le uh CDM thahat tektek ding a misokte puk lel ding uh hi. Tukha sung peuhmah hanciam ni ei khangnote.
Khamuang Tuam Ing
CDM makaite acing ding a kipiakhia khangno volunteer te’ hang in khamuang tuam mahmah ing. Lungdam mahmah ing. Tulai khangno Generation Z te bel khauhpai in smart mahmah cih pen nidang in kabil tawh kazak bek hi in tu’n ka mit mahmah tawh hong mukha ta kahih man in lungdam in kipak ing. Lungdam, Mung Laan Thang (Tonzang, Zogam)
Comment piaknop aomleh...