Kuala Lumpur, Chinatown ah Operasi kibawl in gamdangmi 300 thusitna kinei, 170 kimansuak
Malaysia, Kuala Lumpur khuapi sungah zanni Friday (June 01) ni in Operasi nasiatak in kibawl a, gamdangmi bekbek akigawm in mi 300 bang thusitna kinei cih NST pan kiza hi.
Kuala Lumpur, Petaling Street sung aom Chinatown sungteng ah Immigration Department te makaihna tawh Operasi akibawl ahihi. Tua Operasi bawlna panin gamdangmi phalna neilo, permit tawilo “illegal immigrants” mi 170 kimansuak uhhi.
Hih Operasi pen Chinatown sungah zanni nitaklam 4pm hun akipan akibawl hi a, gamdangmi 300 val thusitna akineihna lakpan in mi 170 akimansuak ahihi.
Hih Operasi akibawlna ah Malaysia kumpizum panin Home Minister ngiatzong kihel ciliang hi. Home Minister Tan Sri Muhyiddin Yassin in agenkhiatna ah akiman gamdangmi tepen Immigration Regulations thukhun palsat in, Malaysia gamsung ah naseptheih nadingin Permit tawilo, Malaysia gamsungah omtheihzah hunding sangin asawtzaw om “Overstaying” cihte hangin akiman cihi.
Malaysia gamsung ah daihna, bitna, thuneihna “peace, security, sovereignty” te aomdet nading lunggulhna tawh Operasi akibawl hi a, phalna neilo gamdangmi “illegal immigrants” te ii thunawngkai teng aki siansuahnuam ahihi ci’n genkhia hi.
More: Malaysia, Kuala Kangsar ah Operasi 2 vei lut, mi 37 kiman, Myanmar zong kihel
Tan Sri Muhyiddin Yassin in Dr. Mahathir makaih kumpi nuaiah Home Minister panmun angahzawh Immigration Department tetawh kipawlkhat in Operasi abawlkhop masakna zong ahihi.
Tuabek thamlo, hih Operasi akibawlna ah Immigration panin alianpenpa Immigration director-general Datuk Seri Mustafar Ali zong kihel cih kiza hi. Sawltak #zomidaily
Comment piaknop aomleh...