Zomi khangnote in khanghamsate kihtak, zahtakna siam hetlo hi

Zomi khangnote in khanghamsate kihtak, zahtakna siam hetlo hi

Tanglai hunin khanghamte zahtak kihta, vang piakna siam uh hi. Zomite ngeina hoih a neiluasa minamte ihi hi. Ahi zongin Pasian thuzui masate in biakna leh ngeina khensiamlo-in i ngeina Dawibiakna sakhinkha-in i ngeinate tampitak zanglo hihang.

Dahna nopna munte ah a tek a hamte zulim salimte kinesak masa kiciamsak masa hi. Zahtakna-in sasin salungte khanghamte bek nesak uh hi.Vailian thuhaksa a kineih ciangin han ah pai-in a sisa, pite pute nute pate luhawmte thudong masa uh hi. Khuasunga, a tek a haampente sasin, salung, sangoi zute puakin nesim hetlo in theisak tektek uh hi. Hih ngeina hoihte beisakin zanglo hihang, tuhun ciangin Kawlgam ah teng ihihmah bangin, Kawlte in nu leh pa khanghamte zahtakna a piakna mumu theithei hihang. Zomite sangin siamzaw pah uh hi. Thupha zong tam ngah zaw uh hi. Khanglui hun-in khanghamte zahtak siamin vaihawmnate ah sialcing makai, sawm upa, hausa upate’ thu mang diamdaim uh-in tangtat phengphilo uh hi. Ettehhuaina tampi na nei uh hi.

Tulai Zomi Khangnote

Tangtat, phengphi, thumang diamdiam hetlo-in angsung ding thupisak masa lua hi hang. Kithutuak hetlo hihang. I Zo paunak- “hawmsem nungta, nebum si, Hausa ziak in tuikuang ban” cih paunak a neite ihi hi. Zu in a lam tawn, sa in a lam tawn ci-in mawknek mawktat peuhmah lo uh hi. Thuman uh hi. Sabetna galsimna ah kitaisan lo-in luang kipham minamte ihi hi. Hih i gen pen tanglai Zomite in thupi asak a zatzia uh ahihi.

Tulai khangthakte a pil a lian ahau zong i om veve lua hi. Ahi zongin ei angsung ding bekbek thupisak lua hihang. Ipsim, neksim hau-in i kinoptuam pihna tawm mahmah hi. I thuneihnate ah kidawm leh lauthawngin kithapaai aa, sep ngam, genngam, piakngam tamlo hi. Mi’ hong mawhsak ding utlo-in kiluzut ciat hi. Pilkeiteh, liankeiteh, haukeiteh kici leh hehnuam ciat hihang. Tanglai Dawibia i pu ipate thukhualna ki-itna, thumaanna, cihtak kuhkalnate koilai ah khahsuah kha ihi hiam?

Khanghamsate hehtheihna

Amau sangin a kum tawmzaw a nau zawte in simmawhin thu kidongkei leh, “kei no sangin ni mu masa, kha mu masa” bang ci-in kitom in heh thei uh hi. Banghang ahi diam? Bang aci nuam uh ahi hiam?

Khanghamsa nute pate mun piak siamin thu dong tangtang in.Hun beisate ah i khialhkhakna ma pailohna ma bingin haksatna i tuahkhakna tamluakhin hi.

Khanghamsate a tuahsa a phutkhaksa tam mahmah ahih manin pilna sangpi aneihloh uh hangin nopna dahna ah thuhaksa a theih uh thu na tam mahmah hi. Tulai hun bangin pilna siamna sangpipi a neihloh uh hang, thu thei mahmah in na ciim mahmah khinkhian thei uh hi. Khangnote nu leh pa a khangham atekte zahtak bawlin thu donlo-in omkhakei ni. Tulai khangthakte sangin khanglui mite itna, hehpihna, deihsakna, nekngaihna nei zaw taktak uh hi. Pasian tektek a na biak nailoh uh hangin khanghamte thu dot huai hi.
Laisiangtho in nu le pa khanghamte koici gen hiam?

Tuhunin Zomite 70,80% bang Christian Pasian thuzuite ihi hi. Biakna sungah i gen thupi isak pen ITNA thu vive kigen kihilh hi-a, zaknop thei mahmah hi. I zakthute zuih ding ahi hi. Za bekin zuilo hihang!

Efesa 6:1-2 Tanute tapate aw, Topa deih bangin na nute na pate thu uh na mang un. Bang hang hiam na cih uh leh, hih gamtatna in thuman ahi hi. Nangmah in nuam sa-in leitungah na nuntakna a sau na dingin ah na nute na pate zahtak in, ci-in thuciamna tawh kipawl a masa bel thukham ahi hi.

Paunak 30:17 A pa a simmawh mipa, a nu’ thu a mang nuamlo mipa, va-ak in a mittang khelkhiat sakin musanete in a sa ne ding uh hi.

Colose 3:20 Tapate tanute aw thu khempeuh ah na nute na pate uh thu na mang un.bang hanghiam nacih uh leh nute pate’ thu man’na in Pasian’ deihna ahihi.

Mattiu 15:4 Pasian in, ‘Na nu leh na pa na zahtak in,’ ci a, tua banah, ‘A nu ahi a, a pa ahi zongin a gensiate in thahna thuak ding hi,’ ci lai hi.

Piancilna 27:4 Ka sih ma-in nang thupha kong piaktheihna dingin kei’ duh bangin anlim hong bawlin la, ka nek dingin hong paipih in,” a ci hi.

Job 12:12 “Khanghamte in pilna nei a, nuntak saute in thu theitel uh hi.
Zomi khangnote-in khanghamte thu donglo,mun pialo in i khasiat sakna tampi nei hi hang. Nu le pate hong huh hong panpih ngeite phawkkiklo in, vak lo, don lo, a khasiasak i tam mahmah ta hi. Pasian deihna Laisiangtho hong hilhna tawh kilehbulhin i gamtakha hi.

Tuhun Zomi khangnote

Zomi hi napi hang i pu i pate zat ngeinate lah theilo-in i zang hetkei mawkta hi. I ngeinate Dawi biakna Sakha hihang. Pasian thu Laisiangtho zong zaza luakeei napi hang i zui hetkei hi. Tanglai i pu i pate khanglai zahin zong ki-it zo nawn hetlo hihang. Khansaulo-in nuamsa zolo i tamkhin mahmah hi.Vaipuak= Tavuan nei zalianpi i suah ciangin kipilsakin khangham nu le pate ki-en giaugiau sak kha bek hihang. Nu le pa khanghamte Pasian in thupha piak theihna ding thu pia hi. (Nu le pa khangham te khasiasak kei ni.)

Khangnote kua etsa kua vaksa kua huhsa in khangkhia i hi hiam? na lungdamnasate uh phawkkikin, a mangngilh kineih kei un. Innlam a na nu leh na pa khanghamte in notung pan itna hong lam-en mahmah uh hi. Hang Cin Hau, Tedim khuapi, Khualai veng inn No. 195, 25/9/2018(Tulsa)