Zolai Kum Za Cin Jubilee Thuciam

Zolai Kum Za Cin Jubilee Thuciam

KUM ZA CIN JUBILEE THUCIAM (Centenary Jubilee Covenant) – Vanpi Leipi abawl asiam, tung PASIAN in ZOMITE hong puah hong zun dingin, tuma kum zakhat lai 1910 kumin, COPE topa-te nupa,Tedim khuapi-ah hong puak hi.

Cope topate hong tun KUM ZA CIN PAWIPI panin Zomite’ khang tangthu-ah mailam kalsuan nadingin Pasian hong huhna muangin, hih thute sem ding bawl dingin Pasian mai-ah ka kiciam hi.

Pasian hong piaksa, ZOGAM nuampi, le Zosuan’ tate tenna, giahna, luahna mun khempeuh Pasian’ ukna gam a suah theih nadingin, ki-itna, kilemna, hanciamna tawh nungta ning ci-in Pasian tungah ka kiciam hi.

Kum Za Cin Pawi akipanin, Jehovah Pasian pen, Zomi Nam bup Pasian hi-in Zosuan tate khempeuh zong Pasian minam hi dingin Zomi Nam bup Pasian tungah ap-in, Amah tawh hih lai munah ka kiciam uh hi. Tung Pasian aw, nangma minam dingin tuni akipan Zomi Nam bup hong sang ta in.

Pasian hong piaksa ka Zomi nam it-in, a manthanloh nading, le a minsiat a mindailoh nadingin, nungta ning, ci-in, Pasian tung leh Zomi nam bup tung’h ka kiciam hi.

Pasian hong piak etlawm Zogam, le ithuai Zomi namte a siat, a muat, a muih loh nadingin, Zogam bup le ka ten ka giahna, ka khawlna mun tengtengah guih theih, kham theih, zu le bengte a kipan adang guih theihte khempeuh ne lo, zang lo, zuak lo, pei lo dingin hih mun panin Pasian tungah ka kiciam hi.

Zomite hong kikhenkham sak thei Biakna, Pawlpi, pau le ham, tual lungsimte a kipan ki-el ki-huat theih nading thute khempeuh peelin, Zomi a piang pum khat a suah theih nadingin, ka hih theih tawpin hanciam ning, ci-in hihlai munah ka kiciam hi. Zomi Nam leh Zo khang tangthu a kipden nadingin, a kizang kipsa February kha 20 ni sim a, a kibawl ZOMI NAM NI ka omna mun peuhah, ka Zomipihte tawh ahi zongin, Pawlpi kim-in ahi zongin, phawk den bawl den ding hing, ci-in, hihlai munah ka kiciam hi.

Zomi Namte minam picing a suah theih nadingin, Cope topa hong patsak sa Zolai itin, zangin. puah ning, zun ning. Tua bangmah-in, Zopau, Zoham, Zonik, Zopuan, le hong phungvuh thei Zo ngeina hoih khempeuh zong zangin, kemin, puahin, zun ning, ci-in hihlai munah ka kiciam hi.

Pasian hong piak Zogam nuampi meihalna le mannei lo-a sing phukna tawh siatsuah lo-in, singkung lopa, nuntakna nei ganhingte, le huih le tui-te cing in, kem in, puah ning, zun ning, ci-in hihlai munah ka kiciam hi.

Cope topa le Sangmang dangte’n hong pantah-in, tualsung Sia masate hanciamna tawh Lungdamna thu kum zakhat sung hong tualbual zota-a, Zomite pen Pasian’ thupha ngah minam suak khinta hi. Kum Za Cin Pawi khen-ah Lungdamna thu, a za nai lo minam dangte tungah puak in,

ZOMI Vannuai PASIAN’ ZAT MINAM a suah theih nadingin, lungdam thupuak Mission nasepna, mimal kim le Pawlpi kimin, kin pen le sep penin nei nung, ci-in Pasian maiah hihlai mun pan ka kiciam uh hi.

HONG BAWL, HONG SIAM, TUNG PASIAN AW, HIHLAI MUNAH NANGMA TUNGA KONG KICIAMNATE, KA TAKSUAH ZAWH NADINGIN KEIMA LAMAH HONG PANG TA IN. AMEN.

(Hih pen Tedim khua-a Cope Centennial Jubilee pawi a khak nitak 28.11.2010 in Rev. Dr. Simon Pau Khan En in Pasian muanna le mipite tungah deihsakna tawh hong makaihna hi a, mipi ding kawmin taklam khutpek ciat veilam lungtang tungah nga kawmin Zomi bup Pasian tungh kiciamna (ki-apna) ahi hi. Kiciamna kammalte Siapa in simkhia-in, mipi in a gen bangin kizui diamdiam hi)