Hih a lamdang mahmah Gunpi pen US gam nitumna lam-a om Tai (Mile) 1078 sau a thupi Gunlianpi (major river) a hihi. Hih Gunpi pen a teng masa Native American ten Ki-moo-e-nim or Yam-pah-pa na ci uh hi. Hih gunpi sung-ah nidang lai-in tuipi sungpan Salmon ngasa namte a kah ciang a awn (in millions) bang-in kah ci hi. Tuabang ciang-in a phawk masa-sa khat le khat S-lim (S-shaped gesture) khuttawh ki lak-in ngakah vadelh uh hi. Tua S lim a kilak pen khualzin lambangten a muh-uh ciang-in gul tawh ki bang sa uh a hi man in Gunpi min pen Gul ci-in a teptehna uh pan Gul Gunpi (Snake River) min hongpiang a hihi.
Hih Gunpi a lamdangsak mun tuampian tampitak om-a tuate lakah a ki munuam phadeuh teng pen Snake River Canyon (Gul Gun Guampi), Snake River Range (Gul Gun Ciang), Oregan Trail (Oregon Zawi) leh Shoshone Falls (Shoshone Tuizeu) cihte a hihi.
Snake River Canyon (Gul Gun Guampi). Hih guampi pen guntui-i neknekna pan hong piang hi-in Magic Valley a ki-cihna mun Idaho gam-i khanglam pang-ah om hi. Pi zaga (500 feet-deep) bang thuk-in tai lang-i lang (.25 mile) bang zai-a tai sawmga (50 miles) bang sau hi. Guampi tung-ah lei minthang Perrine Bridge zong om hi.
Snake River Range (Gul Gun Ciang). Hih Mualciang pipen Wyoming leh Idaho gam-a om pi tulkua (9000 feet) bang-a sang mualpi sawm (ten mountains) kihel a hihi. Hih Ciangpi pen Sak pan Khang (North to south) tai sawmthum (30 miles) sauin Nisahna pan Nitumna lam (west to east) tai sawmthum leh thum zai-a A kimkot tai zaga leh sawmnih le giat (528 square miles) pha hi.
Oregan Trail (Oregon Zawi). Hih Zawipi pen tai tulsawm le nih (2200-miles) a sau tangtawng pekpan kizang nisuahna lampan nitumna lam paina lenglampi (wheeled wagon route) a hihi. Hih zawi pen a tungin gamvak thangsiah (trappers) te leh khualzin te sial (laid) hi-in khe leh sakol bek pai theih na a hi hi.
Shoshone Falls (Shoshone Tuizeu). Hih Zeupi pen Idaho khanglam Twin Falls khua ii ni suahna lam tai 5 kiim Gul Gun tung-a om tuizeu hoih mahmah khat a hihi. Pi tul (1000 feet- wide) in zai-in pi zanih leh sawm le nih (212 feet- high) sang a hih manin Niagara Falls sang 45 feet in sangzaw hi. Nitumna lamte Niagara ( Niagara of the West) ci-in zong ki samzel hi. Tuksung (Spring season) in hih tuizeu muhnop phadeuh ki ci-hi.
Andrew Khai
Comment piaknop aomleh...