Zogam, Zomi, Zolai, Zo ngeina – 3

Zogam, Zomi, Zolai, Zo ngeina – 3
(Zomite In Ngimna Kician Neihkul)

Zomite in tulaitakin minamvai, Lailam leh Ngeina tawh kisai ah bangciang taktak akician dinmun itungta hiam cih thu khatvei kisitkik huai kasa hi. Zomi cih kammal in isi isa sung ah teeng a, ZOMI icihnak leh TAKHEH icih theihna in Zomi ihihna hong lak hi. Kuakua in Zomi cih om kei hong cita leh i’omna leh ihihna kitel mahmah hi. Ahi zongin pawlkhatte paulap leh ahimah ahi ZOMI tawh kisaiin Kawl kumpi zumte ah koici ciang igen ta hiam, bangci maban inei hiam, belhtaak ding mah ihi hiam, mite nopneh lel dinga om ihiam, khangnote leh maban limci aneite akhaktan hilel ding maw, ahihkei leh, lamhonna hizaw ding cih telmun om thei nailo ahih manin lamkalai a ading tawh kibangin koizaw teel ding ihiam cih kician zo nailo hi. Minam makai, Pawlpi makai leh gam makai khat ihih leh, imite aa dingin lungmuan ngamna a’omzo ding hiam, nasep ipia ivaihawmsak zo ding hiam, lampi ihonsak zo ding hiam, pantah tawsawnna ineizo takpi ding hiam cih thute ngaihsunin Zomi maban leh mailam ding saupi khualin isep ding thupi hi. Tua hilopi uingol gamphut bangin geelna, ngimna, mahonsakna cihte om kei leh imipi muanna om thei tuanlo ding hi. ZOMI ciin kam dimdim igen bangin sumtha, thatang leh pilna siamna veina deihsakna tawh mapangin Zotate in hong lunggulh hi.

Tu ciangciang mipi muhna ah biakna lam hita leh, gamvai minamvai ah makaite muanlahna omlai hi cih mipi lungsim ngaihsutna akidot ciangin kitheithei hi. Biakna lam makaite in zong ZOMI cih min tawh koiciang itun hiam – tungsiah leh leitungbup tawh kizopna nei maw neilo, khangnote aa dingin maban limci om maw omlo, panmun kihawmkim maw khatlenih peuh in uksawm den, khangthakte deihna leh ngaihsutna la maw lalo – ama deihna bek Pasian Kha Siangtho hong theihsak hi ci a mipi leh nungzui makaite thu ngai maw ngailo cih tung ah mipi in lim ngaihsut ta hi. Pawlpi pawlkhat ah makaite leh anungzuite tong 3000 sangin kigamlazaw lai uh a, alianpente zong kumpi kisa liang bang omin hitepawl panmun pia ngeilo ding ciin ahagawigawi – Galkap kumpi sangin akiihtak huaizaw makai om thei hi.

Gamvai leh minamvai ah zong tulaitak makaite leh khangthakte kituakzo taktaklo ihitam ciin angaihsun om hi. Khanglui makaite in makai muanhuai ding pantah hetlo phial uhi ciin kigen hi. ZOMI agum asihpih ngam ding khangthak Zomi makaite sung ah Law – upadi lam ah ilapsangte PhD zo or asin i’om ta hiam? Biakna lam ah PhD tampi i’omtei hangin leitung pilna lam ah minam dangte bangin panmun lenkim thei ding omlo hileng kilawm hi. Tua bang kawmkal ah imimuante in Zomi Om Kei – Eimi bek om cih kammal khawng izak lailai ciangin akoici ihiam cih lungngaih huai hi.

Editorial
Lang Khan Khai
Zomi Times