Pa’ Thupha ~ Jam Daniel

Pa’ Thupha ~ Jam Daniel

Pa’ Thupha (Piancil 49:22-28) :: Pasian in Pate’ tungah tate masuan nuntak nop nading amanpha mahmah vangliatna hong pia hi. I dinmun tawh kizui-in ahoih lam hiam a sialam hiam tate thuzawhna lianpi inei hi. Tate pawl khat a pate makaihna mang nuam hetloin hanciam in gamta uhi. A nuntak sung tawntung uh a pa’ deihsakna lehsan in gamta uhi. Tua himawk ahih manin pate in zong gamtat luhekna ah tate muanna I ngah theih ding thupi mahmah hi.

Tuni I gen nop thu in: Pate’ PA hihna tawh tate tungah Pasian thupha I hawm theihna thu ahihi. Pa na hih kei lehzong thupi veve ding hi, banghang hiam cihleh I gennop thubulpi in kizopna a hihi. Mi kim in midangte tungah Pasian thupha luanna ihih ding kisam ahihi.

Piancil 49 sungah Jacob in a sih kuan ciangin a ta 12 te tungah thupha pia hi. A diak in I ngaihsut pen dinga thupi kasak in Rachel tawh a ta ahi: Josef le Benjamin te tunga apiak thupha ahihi. Judah tungah a piak thupha ahihleh akhanggui kizomin Messiah hong pian na ding thu a hihi. (Piancil 49:10). Adang thupha alian mahmah khatpen Josef adingin tuamkoihsak hi.

Pasian in tate tungah athupha hong hawm sawn sak nuam hi.

Piancil 49:22-20 sungah tate thupha I piak theih nading thu 3 na gen hi.

1. Tate thupha I piak theih nadingin nuntakna sungah phutkhak thute Pasian kammal tawh khiatdan hilh siam ding hi hang.

Jacob in, tua hun laitak Josef nuntakna pen ciktui gei a kisuan agah pha mahmah lenggui tawh nagenteh hi. Tuakhit ciangin Josef ii phutkhak haksatnate thaltawite in thaltang tawh nakpitakin a kapna thu tawh na genteh hi. Hih gentehna thu nihte in tudinmun a Josef in nopsakna lawhcinna angah theih nadingin Pasian ii thahatna tawh thuakzawhna aneihna hang ahihi.

Josef in haksatna a tuahma kumtampi sung a pa in bangmah gennailo hi. Josef a sanggamte in bangzah in simmawh in abawlksiat uh hangin Pasian kammal tungah ding ahih manin Pasian in ahoih zaw dinga ageel hi cih theisiam hi. (Pian 45:5-9; 50:20). Zuau thu tawh Josef kimawhsak a, thongkikiasak in, kua man phawk kha takeileh Josef in abiak Pasian pen a vanglian Pasian ahihna phawk hi. Hihmun ah Josef in Pasian geelna hi cih a theihsiamna pen a Pa in zong diksa hi. Tua manin Jacob in Josef lawhcing-gahph a(fruitful) hi a cih theihna pen haksatna lianpi a tuah laitak in Pasian thahatna tawh adin theihna hang ahihi.

A pa in a zat kammal I et ciangin pa in a tapa thalkap dingin sinsak hi. A tapa pen thalkapna gawphel kang dingin hatna nei naikei mahleh, pa in a khut ah letpih in angimna a tuk theih nadingin keek pih hi. A thal akeek pih a pa hangin a tapa in zong keek zo in a ngimna tu hi. Hih thu in Topa sungah thahatna hong sinsak hi. Hih tung tawnin Pasian kammal siksan in tate tungah thupha I hawm theih nading thu 3 gen ni.

A. A gahphatna pan

Pasian in a tate a gahpha dingin hong deih hi. Pate in tate pen cilesa bulphuh in lawhcin ding I hanciam pih a, Pasian kammal bulpuh in gahphat sak ding ki thanem hi. Josef in a gahpha mahmah leenggui kulh tungah zaam in Egpt mite ading thupha ahih mah bangin, Jesu in kimle pam mi tampite adingin gahtampi a gah khia dingin eite hong sam ahihi.(John 15).

B. A hatna pan

Anihna ah, eite hatna hong paina pen ei hattawmna pan hiloin Topa kiangpan ahihi. Josef leenggui pen gahpha hi, banghang hiamcihleh lui gei ah kisuan hi. A leng zung pen thukpi ah tumsuk ahih manin nisat hun pen nangawn in nuntakna guan zo hi. Thaltang a lot ciangin zong thahat hi, banghang hiam cihleh ama khut tungah Pasian khut in tuam hi.

I tate kiang I sinsak ding thu in I hatna pen eimau tha hiloin Topa hong piak tha hi ci a I gen ding ahihi. Ni sim I nuntak kalsuanna pen Pasian kammal tung pan hi cih hilh ding ahihi. Leitung I kisapna khempeuh I ngah theihna pen thungetna tungtawn a I ngah hi cihte a theih ding uh ahihi. Pa pen na hih mah bangin na thungetna tawh na gamtatna te hongmuh ding uh kisam mahmah hi. Nang hatna aomloh hangin na muan Topa’ thahatna amuh theih ding uh thupi hi.

C. Haksatna pan

Pasian mi ihih manin haksatna tawh kipelh ding cihna hilo hi. Bektham loin nuntakna sungah gahphatna cih pen haksatna tungtawn a kingah hizaw hi. Jacob tate lakah Josef pen Pasian a um pen khat hiding hi. Ahizongin haksatna a tamthuak pen ahihi. A laizomte ngiat in bawlsia hi. Potifar zi in nisim in khemna tawh zol hi. Bangmah mawhna a neihlohpi mah in Potifar in thong sung denna hi. Inn sungpi haitawipa na ngawn in Josef hut ding akamciamna mangngilh hi. Bangbang ahizongin Josef in Pasian muanna tawh gualzawhna ngah hi.

Pasian’ nung I zuihna ah hamphatna tampi a om mah bangin haksatna zong om hi cih pen tate I hilh ding ahihi. Hamphatna ngah theih nading bek in Pasian a zong te hilo ding hi hang. Anungta Pasian ahihna le akammalte thuman ahihna hangin zui ding hi hang. I lawp hun sung bek Pasian sungah nuam a sa hiloin, buaina haksatna hong tun ciangin zong I muanna khahsuah lo ding hi hang.

Hong simmawh hong nopneh hong gensia khatpeuh aom ciangin thuak zolo in na om hiam? Tua bangin thuakzawhna I neih keileh I tate in Pasian muanna hong nei thei lo ding uhi. Tate thupha na piak theih nadingin nuntak haksatna na tuah uhteh Pasian geelna khat om hi ci a Pasian kammal tawh gensiam ding ahihi.

2. Tate thupha na piak theih nadingin Pasian mahmah tawh ton khawm in.

Pasian thu ki um sak mahmah napi a, Pasian deih hetloh in gamtatna sangin alianzaw tate makaih khialhna omlo hi. Tate Pasian thu sungah thahat ding deihsakna I neih leh, nisim nuntakna ah eile Pasian tonkhop masak sanga ahoih zaw thuhilhna omlo hi. Ni sim in Pasian deihna bangin bukim tak in nungta zo ni cihna hilo a, ahizongin upna tawh kiniamkhiak a tuahkhak thulelate Pasian deihna hi cih theihna tawh kalsuan ding ahihi.

Jocob zong pen a bucing pen PA hipeuhmah lo hi. Pasian tawh a kizopna sang zel niam zel mi khat ahihi. Ahizongin buaina tampi sung pan mahin Jacob in hoihtakin Pasian thei hi. Tuamanin Pian 49:24 sungah, “Jacob’ Vanglian Pa’ khut” naci hi. Pian 49:24; 25 sungah, “na pa Abraham Pasian” na ci hi. Ahizongin Pian 31:5, 42 sungah, “Ka pa Pasian” na ci hi. Pasian min a lawhna in Pasian tawh a kizopna uh hong musak hi. Jocob in haksatna sungah amah tawh a om khawm Pasian pen ama Pasian taktak hihna tawh muanna nei hi. Jacob pen ngimna tawh a kidimpakhat ahihi.

Ahizongin Pasian lo tawh ngimnate amawkna ahihna Pasian in sinsak hi. Pasian in Esau le Laban thah theih nading lauhuaina pan Jacob kem a Pasian ahihna kilangh sak hi. Jacob tate in Shechem mite thahna pan in Cannan mite thah theih nading pan limtak in kem hi. Tuukempa in a tuu te limtak in akep mah bangin kem in lamlak a thuman lampi ah kha hi.

Haksatna sungah Josef mansuah in kialpi hangin lungkham mahmah in a omlaitak in Jacob in Pasian muanzia ding sin hi.

Jacob in Pasian pen amah huhpa bek hilo in atate huhpa a hihna zong phawk hi. Tuamah bangin nulepa te in zong I Pa Pasian pen I tate’ Pasian zong ahih theih nadingin upna nei a muanna tawh I ap ngam ding thupi mahmah hi. Na tate thupha na piak theih nadingin Pasian muanna tawh na kalsuan ding ahihi.

3. Tate thupha napiak theih nadingin amau thahatna zui-in lamlak zel in.

Jacob in Josef thahatna leh a cihtakna pen thuakna tampi sungpan Pasian kiang pan thupha ahihna phawk hi. A tate khatle khat kibang hetloin amau ii ziale tong in lim-hihna khatciat nei uhi.

A. Na tate thei in.

Tate hihna taktak a thei zolo pa tampi mah om hi. Innkuan khat sungah a omkhop hangun amau vaiciat tawh buai in thu kikum a omkhop hun ding haksa sa mahmah uhi. Tuahangin pate le tate kikal ah kimaingapna om theilo hi.

Nule pa pawlkhat te in ka tate a kibang mah a ka makaih uh hiveh aw ci thei uhi. Banghang a amah tuampianse hiam aw cithei uhi. A kibang a I makaih khak manin akikhial hizaw hi. Naupangte pen kibang hetlo uhi. A suah pih uh lungtang-ziale tong a tuamciat ahih manin a tuamciat mah a amau uukdan zui a pantah theih ding thupi mahmah ahihi. Khatveivei, bangdinga na innlaibawl lo na hia ci in I tai thei hi. Amah a u hilo ahih manin a u dan khempeuh zui zolo ding hi cih phawk huai hi.

Tua ahih manin na tate tawh hun zangkhawm ding cin a, amau uukna zongin tua tawh Pasian in manpha tak a abawlna lakkhia sak ding na hihi.

B. Na tate hatna gen inla, a thanemnate hilh in.

Tate taina sangin phatna kipia nuam zaw hi. Ahizongin I tate hatna le thanemna mukhia a ahun zui a hilh theih ding zong thupi mahmah hi. Na pahtaknate genkhia in pahtawi pah in. Ahizongin agamtatna na muh theih ciang bek tawh lungkim sawm kenla, a ngaihsutna uh lungsim puak zia zong muh khiat theih ding thupi hi.

C. Pate kammal athupitna phawksak in.

Lai Siangtho in kammal hangin kilamna le kisiatna piangsak ci hi. Mi khat in, pate’n a pau khiat maimai kammal khat pen dynamo tawh kibang ci hi. Taten maipha mu nuam mahmah a hong nehneh in hong hopih zel pen na thusim keileh aluzang pan a ciang khat tawh kisat mah bang hi ci hi. Tuamah bangin thapiakna le pahtawi siamna in mizat tak cing khat a suah theih nading uh lampi bawlsakna hi ci hi.

Charles Haddon Spurgeon in kum 10 a phaklai thu gen hi. Khualzin mi khat tawh a pute inn ah tungkhawm kha uhi. Tuapa in a ngawng ah kawi in Pasian itna genpih in thu ngetsak a, Pasian mizat ahih nading thu pulak hi. Zingsang khat a innkuan un thungen ding in tukhawm uhi. Mipa in kum 10 a pha pan Charles tawh khukdin in kamsanna pulaakna nei hi. “Hih naupangpa pen nikhatni ciangin mipi tampite mai ah lungdamna thu gen ding hi. Nikhat ni teh Rowland Hill chapel hall ah thugen ding hi ci hi…” Hun khat takteh Spurgeon kiangah nang tunga kamsanna hong tung takpi dingin na um hiam? ci’n akidotleh, ka um hi. Tua hun ding ngak a om ka hihi ci hi. Agen behna ah tua hunin kei ka piangthak nai kei hi. Ahizongin tua hong pulaak kammalte in Topa ka zon nadingin hong tawsawn mahmah kammal hi ci hi.

Pate khempeuh innkuan sungah thupha ahawm siam dingin Topa’n thupha hong pia hen! Happy Fathers’ Day, Jam Daniel