National Education law etna ~ Zomi Times

National Education law etna ~ Zomi Times

November 12-13 sungin Kawlgambup Sangnaupang Thukin Khawmpi om a, thukhensatna bangin November 14-17, ni 4 sungin Kawlgam sangpilna Ngeina tawh kisai lungkimlohna hangin lamzuihna nei uhi. Sangnaupang 300 lamzuihna ah kumpi tungah deihngetna nam 6 nei uh a, ni 60 sungin kumpi in athudon kei leh Kawlgambup ah sangnaupangte kitom ding hi ci-in khauhtakin thu zasak uhi. Hi thu hangin sangzum panin thuneite in sangnaupang makai 10 tawh kimuhna nei uhi.

Sangzum uliante in Ngeina kheltheihna ko tung ah omlo-in Innpi bek ah om hi, zattawm thumeilet bek bawl thei ung acih ciangin Ngeina (law) apuahpha thei kumpi leh Innpi bek tawh kimu ding, ni 60 sungin thukizakna a’om kei leh gambup ah lungkimlohna kilak ding hi ci-in hangsan takin genngam ta uh a, hizong Democracy gah hi ci-in kigen hi. Kumpi luilai hileh khumcip ngah ding uhi.

National Education Law sung ah kumpi ukcipna (Top down policy), Mipil misiamte mapanna ding abit kipialo, Sangnaupang kipawlna suakta tak a neihtheihna ding pialo, Democracy sangpilna tawh kilehbulh, NNER Sangpilna lam kipawlna thusunnate kihello cih thute hangin galkap hunlai sangpilna ukcipna tawh kibang hi ci-in lungphona anei uh ahi hi.

Sangzum panin Sangpilna Mangpi Dr. Daw Khin San Yi, Siapi U Than Oo, Professor Dr. Aung Min, Professor Dr. Khine Me, Law Professor Dr. Daw Khin Chit Chit, Professor Dr. Chin Naing Oo, Dr. Myint Thein kihelin Democracy Sangpilna Makai Committe tawh kimuhna ah media group 30 val mai ah suakta kilangtangin holimna neihna zong Democracy gah hi. Kipawlna leh biakna ah zong hibangin mipi deihna pulak theihna pen mipi lunggulhna lianpen ahi hi.

Dr. Mg Htin (Mandalay University Siapipa) in agenna ah National Education Law pen Sangzum pan group 18 in Yangon Diamond Jubilee Hall ah zum hongin mipi tungah ngaihsutna kila hi. State leh Region sung ah zong minam leh mipil uliante tungah thu kidongin Nipidaw kimuhna pan Draft kibawl hi. Mipi Innpi inzong minamkim, mangpizum tuamtuam, party makaite leh apualam mipilte dongin Draft khat bawl uh a, hih Draft nih gawmkhawmin Minam Innpi ah puakin Gambup Innpi ah kikup khit ciangin President tungah etkik dingin kipuak hi.

President in thu 25 puahkik ding acih hangin 19 bek kisansak hi. Hih Law (ngeina) pen kumpite ukcip dingin kibawl lo-a, limtakin sim leng kitel mahmah hi ci-in apuahnoplohna thu gen hi. Sangzum mangpi Dr. Daw Khin San Yi in zong akizang nailo upadi pen puah dinga kitomna in sep ding makhelh hi-a, eideih bek kiguang theilo, kikum khawmin guanhuaite kiguang thei hi ci-in gen hi. Ahi zongin hih ngeina abawlte galkap leh USDP galkaplui kumpi mite vive bawl hi-a, Democracy tawh kituak nailo ngeina hi ci-in mipi leh sangnaupangte in mu hi.

Sangnaupangte deihngetna in sanglam bek tawh kisai abat hangin adang thute ah zong tulai ulian kumpite nasepnate kimuang zolo, ki-um zolo, kilam-en ngam nawnlo hi cih kilang hi. 2015 ma 2008 Danbupi puah kizolo dinga, kiteelna kibawl masa ding hi. Tua hikei leh ki-ukna kikhelmang ding hi ci-in Innpi ukpi U Shwe Mann in agenna hangin 2015-2020 sung galkapluite in amau deih bangin uksawm uknuamlai uh hi cih kitel hi.

Nipidaw, State/Region leh District, Myone galkaplui uliante mipi in guigawp ta hita leh Galkap neihsa Upaing Company leh galkaplui uliante neihsa Company tuamtuamte hutnopna hangin mipi deihna leh kisapna mulo kineihin amau ut bangin Kawlgam neihsa zeek nuamlai uhi ci-in mipi lungsim ah om hi. University siapite in ko mimal min tawh kimu nuam hi ung cinapi kumpi laihawm ah sangzum min tawh kimuhna om hi ci-in suah uh a, sangnaupangte hehna sang semsemin mikhem zuauphuak kumpi ki-umzo nawnlo hi ci uhi. Hithu in adang thute ameizop khak ding patauhna zong om a, sangnaupangte kitomna peuhmah ah buaina lianpi tawh kizom thei hi ciin kigen hi. Tua hiin Democracy ukna deihte pilvan huai hi. Ref: DT Editorial (Zomi Times)