Zogam patau linglawng

Zogam patau linglawng

Zogam ah khuamial mahmah ahihman in khuaimei leh lalcin ciuciaute in khuavak tan zolo hi. Gandhi leh Nerhu ihmu thapai a, Joseph thonginn sung pan a otot hang phawng zolo hi. Chandra lah gamdang zinkhia ahihman in gamkeek namdangte in Zogam lauphawn uh a tagah lubawk bang in patau linglawng den uh hi.

A kilauphawn sim in Zogam mipite vagiah phawn’ bang in miallak zawt in kawkek sa in lengkhia phangphang pong uh hi. Khuamial lak ah bangmah mulo uh ahihman in, suang phukha tawh sing phukha tawh liam le bai in, buai mahmah zelzul hi.

Gandhi leh Nerhu a khanlawh mateng mipite lungmuang ngeilo ding a, Chandra ong ciah mateng khua le tui bit ngeilo ding hi.

Gandhi leh Nerhu in Joseph otna aw za a, meisopi tawh mipite a makaih masiah patauh dipkuatna in lauphawn den ding a, meigong tagah bang in veng le pam in simmawh den ding hi.

Gandhi kua in phong zoding a, Nerhu kua in khanglo sak zoding ahi hiam? Chandra cikciang ong ciah a, Joseph otna aw cikciang kiza ding ahi hiam?

Cikciang mipite in lungmuang tak pawi bawl in lungdamna late sa ziahziah ding ahiam? Pau Khat Suan

A pil masa leh a pilzaw utte hai

A khang masate pil masa a, akhang nunungte pil nunung hilel hi. Kua pil zaw, kua hai zaw cih pen a tehna ding haksa mahmah hi.

Mihingte’ recognize pilna om a, a kiphawk khalo pilna zong om veve hi.

Banghang hiam cih leh Pasian’ bawlsa nate leh leitung khuahun kuamah in theikhin zo ngeilo ding hi.

A pil masa leh a pilzaw utna pen haina ahi hi. Pau Khat Suan

Khasia kei ni. Kuabawl hikei, eima’ bawl hi

I kim i pam, i sanggamte tawh banghang in nikhat khit nikhat ki lamdang hiaihiai mawk ihi hiam? A beisa kum tam hetlo sung i minam milip nuntak khuasak, ngaihsut zia leh i ki makaih zia, i ki pattah zia tawm enkik dih ni. Ki etkak dihni.

Amau thuneihna tawh sum leh khantohna zong uh a, en bel sum zong masa in, sum tawh thuneihna leh khantohna leisawm hihang….. ki gamla hetlo napi hang ki lehngat sitset hihang.

Sum nak deih lua mahmah ihihman in (deihhuai zah sang deihzaw, buaipih zaw) sephuai lo tampi kisem, genhuai lo tampi kigen, ngaihsut huai lo tampi kingaihsun hi.

Tua in duhhop huaihamna ong liansak a, pilna leh thutheihna a manphat lam ong mulo sak ahihman in i mipil misiam khempeuh bangmah manlo ong suah hi. Mipil misiam teng mun i pia nawn kei a, amau’ thugen zong i ngai nawn kei hi. Mipi in bangmah theilo bek hilo, i theihloh nangawn theilo i hihman in ei’theihloh khempeuh midangte’n zong a theilo ding sa, Mipilte nangawn in a theilo ding sakha tazen hihang. Tua ahihman in theihkhak i neih sunsun thei kisa lua pahpah in midangte i hawmthawh gawp pahpah hi.

I dinmun, i ngaihsutna, i zia i tong ei mahmah in i lumlet mateng mitawh i maingat kilehbulh niloh ding ahihman in i dinmun kikaak semsem lai ding hi. Khasia kei ni. Kua bawl hikei, eima’ bawl hi. Koipan pan in, koipan khel le’ng manlang pen ding hiam? Pau Khat Suan